Kitango 51

Baipayile Muntu pa Kijiilo kya Kuvuluka Juba ja Kusemwa

PANYUMA ya kupa batumwa banji mikambizho, Yesu wibatumine babiji babiji mu nyaunda. Kampe bankasa ne kolo abo ba Petelo ne Andeleo baijile pamo, Yakoba ne Yoano, Filipa ne Batolomo, Tomase ne Mateo, Yakoba ne Tadeusa, Shimona ne Yudasa Isakaliota. Ano mabumba atanu na jimo a basapwishi, basapwijilenga mambo awama a Bufumu ne kubuka bantu mu jishinda ja kukumya konse konse ko bayilenga.

Pa kikye kimye Yoano Mubatizhi saka akiji mu kaleya. Kabiji saka apwishamo kala myaka pepi na ibiji. Mwakonsha kuvuluka amba Yoano waambile patoka kuba’mba kyatama Heloda Antipasa kusongola Helodyasa muka kolojanji aye Filipa. Byo kiji kuba’mba Heloda Antipasa waambanga’mba walondelanga Mizhilo ya Mosesa, Yoano waubile bingi bulongo pa kusolola abwa bukende. Na mambo a kino, Heloda wamutayile Yoano mu kaleya kampe na mambo a kumukambizha kwi Helodyasa.

Heloda Antipasa wayukile’mba Yoano wajinga muntu waoloka kabiji wamumvwinanga bingi. Onkao mambo, wakankelwe ne kya kumuba. Nangwa byonkabyo, Helodyasa wamushikilwe Yoano kabiji wakebelenga kumwipaya. Kimye kyafikile kyo akebelenga kuba kino.

Mu 32 C.E., Kijiilo kya Lupitailo saka kikyangye kufika, Heloda watekele kijiilo kikatampe kya kuvuluka juba ja kusemwa kwanji. Pa kino kijiilo pajinga babinemanga banji bonse, bakulumpe ba bashilikale ne bene bakatampe ba mu Ngalilea. Byo pafichile, Salome mwana wamukazhi wa kwa Helodyasa ye asemene na mwatawanji mutanshi aye Filipa, watwelelemo na kuzhila benyi. Jibumba jonse ja banabalume jasangalele bingi pa kumona byo azhilenga.

Salome wamutokeshe bingi ku muchima Heloda. Wamwambijile amba: “Kyonse kyo usakundomba, nsakukupa.” Wachipile ne kuba’mba: “Kyonse kyo usakundomba, nsakukupa, kufikatu ne ku lubaji lumo lwa bufumu bwami.”

Salome saka akyangye kubula Heloda kyo akebelenga, wayile na kushikisha inanji. Washikishe’mba: “Ñanyi kintu kyo nsakulomba?”

Kimye kyafikile kya kuba kintu kyo akebelenga! Helodyasa wakumbwile kwa kubula nangwa kukankazhama ne, amba: “Mutwe wa kwa Yoano Mubatizhi.”

Ponkapo Salome wabwelele kwi Heloda ne kulomba amba: “Mbena kukeba mumpe lonka luno mutwe wa kwa Yoano Mubatizhi pa lomvu.”

Heloda waubile bingi bulanda. Pano bino, na mambo a benyi banji baumvwineko byo achipile, kechi wakebele kubula kufikizha kyo achipile ne, nangwa kyajinga kya kwipaya muntu wabula mambo. Ponkapo wakambizhe muntu wa kwipayañana kuya ku kaleya. Papichiletu kakimye kacheche wabwelele saka asenda mutwe wa kwa Yoano pa lomvu ne kumupana kwi Salome. Ne aye Salome wamutwajile kwi inanji. Baana ba bwanga ba kwa Yoano byo baumvwine kyamwekele, baishile ne kusenda mubiji wanji ne kukamuzhika. Kabiji Yesu bamubujile kino.

Palutwe kacheche, Heloda byo aumvwine amba Yesu ubena kubuka bantu ne kupanga bandemona waumvwine moyo, kabiji waakaminwe amba Yesu ye Yoano wasanguka ku bafu. Kepo akebeshe kumonañana ne Yesu kechi na mambo a kukeba kumvwa byo asapwijilenga ne, bino na mambo a kukeba kuyuka umvwe byo aakaminwe byajinga bya kine nangwa ne. Mateo 10:1-5; 11:1; 14:1-12; Mako 6:14-29; Luka 9:7-9.

▪ Mambo ka Yoano o bamukashijile mu kaleya, kabiji mambo ka Heloda o abujile kukeba kumwipaya?

▪ Helodyasa waubile byepi pa kuba’mba Yoano bamwipaye?

▪ Yoano byo afwile, mambo ka Heloda o akebejile kumonañana ne Yesu?

Kitango 52

Yesu Wajishishe Biumbi mu Jishinda ja Kukumya

BATUMWA 12 basangalele bingi pa lwendo lwabo lwa kusapwila mu Ngalilea monse. Aku Yoano ufwatu, babwelele kwi Yesu ne kumubula bintu byawama byaubiwe. Byo amwene’mba bakoka kabiji bantu nabo bavujile bingi baishilenga ne kuya kya kuba kechi bajingapo ne na kimye kya kuja ne, Yesu wibambijile’mba: ‘Twayai kwa bunke bwetu mukakokolokeko pacheche.’

Byo bakanjile mu bwato, kampe kwipi na Kapenama bayile kwa bunke ku musela wa Yodano kusha Beteseda. Nangwa byonkabyo, bantu bavula bebamwene byo bayilenga kabiji bavula bayukile kino. Bano bonse bapichile lubilo ku musezho kabiji bwato byo bwafikile bataine bantu bafika kala.

Yesu byo afumine mu bwato, wamwene jibumba jikatampe kabiji wijubile lusa mambo bantu bajinga nobe mikooko yabula kafunga. Onkao mambo, wabukile bakolwa babo ne kutatula kwibafunjisha bintu byavula.

Kimye kyapwile bingi bukiji. Kabiji baana banji bwanga baishile kwi aye ne kumwambila’mba: “Muno mo tuji mungye kabiji bwaila kala. Bambilai bayenga ku majimi aji kwipi ne mu mizhi icheche ne kwipotela bene kajo.”

Nangwa byonkabyo, Yesu wibambijile’mba: “Bapai kajo baje.” Byo ayukijile jimo kintu kyo akebelenga kuba, waesekele Filipa kupichila mu kumushikisha amba: “Kwepi ko tusakupota bashinkwa ba kujisha jino jibumba?”

Filipa wamwene kino kuba’mba kyakatezhe bingi. Mambo pajinga banabalume 5,000 kabiji kampe bantu bakijile pa 10,000 kubajilako banabakazhi ne baana. Filipa wakumbwile’mba, “bashinkwa bafwainwa kupotwa mandenali 200, bantu kechi bakonsha kwibakumbana ne.”

Kampe na mambo a kulanguluka’mba kyakatezhe bingi kujisha bantu bavula, Andeleo waambile’mba: “Paji kalombwana uji na bashinkwa batanu ne tumasabi tubiji. Nanchi bino byakonsha kukumbana bano bonse nyi?”

Byo kyajinga kimye kya mwela wa mebele mu 32 C.E., Kijiilo kya Lupitailo kya saka kikyangye kufika, nsono ya munyemvu yavujile bingi. Onkao mambo, Yesu wabujile baana banji ba bwanga kwikajika bantu pa nsono mu bilumbiji bya bantu 50 ne 100. Washikwile bashinkwa batanu ne masabi abiji, kabiji watajile mwiulu ne kulomba. Kepo atebawile bashinkwa ne kwabanya masabi. Wapele baana banji ba bwanga ne abo baabenye bantu. Bantu bonse bajiile ne kwikuta.

Panyuma ya kino, Yesu wabujile baana banji ba bwanga amba: “Tolaulai bibese byashalapo kuba amba bibule konaika.” Byo batolawile, bayuzhizhe bitumbe 12 na bibese byo bashilepo. Mateo 14:13-21; Mako 6:30-44; Luka 9:10-17; Yoano 6:1-13.

▪ Mambo ka Yesu o akebejile kuya kwa bunke na batumwa banji?

▪ Yesu watwajile baana banji ba bwanga kwepi, kabiji mambo ka o babujile kukokoloka?

▪ Byo kyafikile ke mabanga, baana banji ba bwanga bamwambijile kuba ka, bino ñanyi kintu Yesu kyo aubijile bantu?