Kitango 57

Waubijile Lusa Bamanaminenga

PANYUMA ya kunena Bafaliseo pa mambo a mizhilo yabo, Yesu ne baana banji ba bwanga bafuminepo. Mwakonsha kuvuluka’mba kechi papichile kimye kyabaya ne, Yesu wayile na baana banji ba bwanga amba bakokolokeko, bino bakankelwe kukokoloka mambo jibumba jibalondejile. Bino pa kikye kimye, aye ne baana banji ba bwanga bayilenga ku mapunzha a Tila ne Shidona ajinga ku kabeta ka buyeke palepele bingi. Kyamweka luno lwendo lo lonkatu Yesu lo ayijile pamo na baana banji ba bwanga kwalepa kukilayila mipaka ya Isalela.

Byo atwelele mu nzubo mo bafikijile, Yesu kechi wakebele muntu nangwa umo kuyuka ko bajinga ne. Pano bino, nangwatu mu ino nyaunda yabujile ya bena Isalela, bantu bamumwene. Mwanamukazhi Mungiliki wasemekejilwe mu Sailofenisha wa mu Silya wamutaine ne kumusashijila amba: “Nkambo, anweba Mwana Davida ngubilai lusa. Mwanami wamukazhi bamumanyika bingi ku ndemona.” Bino Yesu kechi wamukumbwile ne.

Ponkapo baana banji ba bwanga baambijile Yesu amba: “Mwambilai abwelemo, mambo ubena kwitulondela na kwitubijikizha.” Yesu walumbulwile ene mambo o abujile kumuta muchima amba: “Amiwa kechi natuminwe ku bonse ne, kana ku mikooko yaeleka ya kisaka kya Isalela.”

Nangwa byonkabyo, uno mwanamukazhi kechi wabwelelemo ne. Waishile kwi Yesu ne kufukama kabiji wamusashijile’mba, “Nkambo, nkwashai!”

Yesu waumvwine bingi lusa na mambo a byamusashijile uno mwanamukazhi! Bino waambile jikwabo pa mwingilo wanji mutanshi wa kwingijila bantu ba Lesa bena Isalela. Kabiji pa kimye kimotu, kyamweka waesekelenga lwitabilo lwa mwanamukazhi, waambile pa misalululo yajinga na Bayudea byo bamonanga bantu ba mu bisaka bikwabo amba: “Kechi kyawama kushikula kajo ka baana ne kupa twana twa kabwa ne.”

Kupichila mu ñambilo ya lusa ne mwekelo ya kilungi, Yesu waubijile lusa bantu babujile Bayudea. Kabiji waambile ne pa bantu ba mu kisaka kikwabo kwibesakanya ku bakabwa kupichila mu kwibatela’mba “twana twa kabwa.” Mu kifulo kya kuzhingila, uno mwanamukazhi naye waambile na kwipelula pa byaambile Yesu pa misalululo ya Bayudea amba: “Ibyo Nkambo, pano bino twana twa kabwa tuja bukuku bupona ku tebulu wa bankambo yato.”

Yesu wamwambijile’mba: “Obewa mwanamukazhi, uji na lwitabilo lukatampe; kyubiwe monka mo wakebela.” Kabiji kyaubiwe byonkabyo. Byo abwelele ku nzubo wataine mwananji wamukazhi waikala pa mwanya saka abukwa.

Byo afumine ku Shidona, Yesu ne baana banji ba bwanga bayile ne kukapita ku nsulo ya Mukola wa Yodano. Kyamweka baabukile pa mwaba wa Yodano ne kusha Kalunga ka Ngalilea ne kutwela mu mapunzha a Ndekapoli ku musela wa kalunga ka mema. Akwa bakanjijile pa mutumba, bino jibumba jikatampe jaishile ko baji ne kuleta kwi Yesu bantu balemana, bampofu, bakamaama ne bakwabotu bakolelwe bikola bikwabo. Bebatujile ku maulu a kwa Yesu ne aye wibabukile. Bantu bakuminye bingi pa kumona bakamaama ke bambe, balemana ke bende ne bampofu kebamone; kabiji bamutumbijikile Lesa wa Isalela.

Yesu watele bingi muchima ku muntu umo washinkile matwi kabiji wabulanga kwamba. Javula bantu bashinka matwi bomvwa bingi bumvu kwikala paji bantu bavula. Kyamweka Yesu wamwene’mba uno muntu waakamwa. Onkao mambo, Yesu na lusa wamutwajile kwa bunke kumufumya mu jibumba. Byo bajinga kwa bunke bwabo, Yesu wamwesheshe kintu kyo akebele kumubila. Wakujile minwe yanji mu matwi a uno muntu, byo ashipile mate wamukwachile pa lujimi. Yesu byo atajile mwiulu, waikizhe kyefu ne kwamba’mba: “Ashinkuke.” Ponkapo matwi uno muntu ashinkukile kabiji watatwile ne kwamba.

Yesu byo abukile bantu bavula, jibumba jamusanchijile bingi ne kwamba’mba: “Wauba bingi bulongo bino byonse. Mambo ulengela bashinka matwi kumvwa ne bakamaama kwamba.” Mateo 15:21-31; Mako 7:24-37.

▪ Mambo ka Yesu o abujile kubuka yewa mwana wa mwanamukazhi Mungiliki ponkapotu?

▪ Panyuma ya kuba bino, kwepi Yesu ko atwajile baana banji ba bwanga?

▪ Yesu na lusa wabukile byepi muntu washinkile matwi kabiji wabulanga kwamba?

Kitango 58

Bashinkwa ne Mbizho

JIBUMBA jikatampe jaishile kwi Yesu mu Ndekapoli. Bavula baishile mu ino mpunzha mwavujile bantu ba mu bisaka bikwabo na kuteleka kwi aye ne kuba’mba ebabuke bikola byabo. Basendele bitumbe bikatampe nangwa’mba misansa mo basendelanga kajo pa kuya mu mapunzha mwaikalanga ba mu bisaka bikwabo.

Yesu waichile baana banji ba bwanga ne kwibambila’mba: “Nejumvwina bingi lusa jibumba mambo ke moba asatu o naikala najo kabiji kafwako kyo bajapo ne. Mambo umvwe nebambile amba bwelai ku mazubo enu na nzala, basakutembuka mu jishinda kabiji bamo bafuma kwalepa.”

Baana banji ba bwanga bamushikishe’mba: “Muno mo tuji mungye, kwepi ko twakonsha kutana bashinkwa bakujisha bano bantu?”

Yesu wibashikishe’mba: “Muji na bashinkwa banga?”

Abo bamukumbwile’mba: “Tuji na batanu na babiji ne tumasabi tucheche.”

Byo aambijile bantu kwikala panshi, Yesu washikwile bashinkwa ne masabi, walombele kwi Lesa, watebawile ne kupa baana banji ba bwanga. Ne abo nabo bapaine ku bantu kabiji bonse bajiile ne kwikuta. Kepo bashikwile bibese byashajilepo ne kuyuzha bitumbe bitanu na bibiji. Nangwa kya kuba pajinga banabalume pepi 4,000, bonse bajiile kuvwangakotu ne banabakazhi ne baana.

Yesu waambijile jibumba kuya kabiji wakanjijile mu bwato ne kwabukila ku muzhika wa Kalunga ka Ngalilea. Akwa Bafaliseo ne ba mu bupopweshi bwa Basadusea baishile pamo na kweseka Yesu amba amweshepo kiyukilo kimo kufuma mwiulu.

Yesu byo ayukile’mba babena kumweseka, wibambijile’mba: “Umvwe kyafika mabanga mwatemwa kwamba amba, ‘Kwakya bulongo, mambo jiulu jachila,’ kabiji lukelo amba kusakwikala mvula, mambo jiulu jachila ne kufinda.’ Mwayuka kulumbulula bimweka jiulu, bino biyukilo bya ano moba mukankalwa kwibilumbulula.”

Yesu byo aambile bino, wibatelele’mba kisemi kibi kabiji bantu babula kwikala bakishinka kwi Lesa ne kwibajimuna byonka byo abujile Bafaliseo amba kafwako kiyukilo kya kwimumwesha ne, poso kyonkakya kya kwa Yona. Aye ne baana banji ba bwanga bafumineko ne kukanjila mu bwato ne kuya ku Beteseda ku kabeta ka buyeke musela ka Kalunga ka Ngalilea. Byo bakiyilenga, baana banji ba bwanga bavulukile amba balubako kusenda bashinkwa, bino bajingatu na shinkwa umo.

Yesu byo avulukile bintu byo afuminetu na kwisamba na Bafaliseo ne Basadusea batundaikanga Heloda, wajimwine baana banji ba bwanga amba: “Saka mulaba ne kujimuka pa mambo a mbizho ya Bafaliseo ne Basadusea.” Byo aambile pa mbizho, baana banji ba bwanga balangulukilenga amba Yesu watongwelenga bashinkwa bo balubileko. Onkao mambo, batatwile kwambañana mulwabo pa kino kintu. Yesu byo ayukile’mba kechi bakwatakanya ne, wibashikishe amba: “Mambo ka o mubena kwambañena pa kino?”

Yesu po po afuminetu na kujiisha biumbi bya bantu na bashinkwa mu jishinda ja kukumya, kampe papichiletu juba jimo nangwa abiji kufuma po aubijile kino kya kukumya kyapeleleko. Bafwainwe kuyuka amba kechi waambilenga pa kubula bashinkwa bonkabe ne. Wibavulwilemo amba: “Nanchi kechi mwavuluka byo natebawile bashinkwa batanu banabalume 5,000 bo bajiile nenyi? Bitumbe binga byayujile na bibese byo mwasendele?”

Abo bakumbwile’mba: “Jikumi na bibiji.”

“Kabiji byo natebawile bashinkwa batanu na babiji banabalume 4,000 bo bajiile, bitumbe binga byayujile na bibese byo mwasendele?”

Bakumbwile’mba: “Bitanu na bibiji.”

Yesu wibashikishe’mba: “Nanchi ne luno mukyangye kumvwisha mo kyatala nyi?” “Mambo ka o mwaji kubujila kukwatakanya kino? Nabaambenga pa kwikala bajimuka pa mambo a mbizho ya Bafaliseo ne Basadusea.”

Kepo baana ba bwanga bakwatakenye kyo aambilengapo. Mbizho ke kintu kilengela shinkwa kututumuka kabiji kyo kyambo kyo baingijishanga kumwesheshamo bubi. Onkao mambo, baana ba bwanga bakwatakanye mambo Yesu waingijishenga ñambilo ya kifwanyikizho, kuba’mba wibambijilenga kujimuka pa mambo “a mafunjisho a Bafaliseo ne Basadusea,” ano mafunjisho atwalanga bantu mungi. Mako 8:1-21; Mateo 15:32–16:12.

▪ Mambo ka bantu o basendejile bitumbe bikatampe?

▪ Byo afumine ku Ndekapoli, Yesu wayile kwepi na bwato?

▪ Ñanyi kintu baana ba bwanga kyo bakankelwe kukwatakanya pa byaambile Yesu pa mbizho?

▪ Yesu watazhizhe mwepi byo aambile’mba “mbizho ya Bafaliseo ne Basadusea”?