Kitango 59

Nanchi Kine Yesu ye Ñanyi?

BWATO mwakanjijile Yesu ne baana banji ba bwanga byo bwafikile ku Beteseda, bantu bamuletejile mwanamulume mpofu ne kumusashijila amba amukwate ne kumubuka. Yesu walupwile uno mwanamulume pangye ya muzhi. Byo amushipijile mate mu meso, wamushikishe amba: “Ki ka kyo wamona?”

Uno mwanamulume wakumbwile’mba: “Namona bantu. Babena kumweka nobe bichi, pano bino babena kwenda.” Byo amukwachile mu meso, Yesu walengejile uno mwanamulume kulaba ne kutatula kumona bulongo. Yesu wamutumine uno muntu ku nzubo ne kumukambizha amba kange atwele mu muzhi ne.

Yesu ne baana banji ba bwanga bayile ku mizhi ya Kesalea Filipai, ku kabeta ka buyeke ka Pelisitina. Palepele bingi, pajinga pepi makilomita 48 kufika ku mpunzha ya Kesalea Filipai kabiji yaikajile patuntama mamita 350. Kyamweka luno lwendo baendelepo moba abiji.

Byo bayilenga, Yesu wayile kwa bunke na kulomba. Kwashajiletu bañondo batanu na bana nangwa jikumi kuba’mba afwe, kabiji wateleko bingi muchima ku baana banji ba bwanga. Bavula balekele kumulondela. Bakwabo kampe bavulañene ne kwibafita ku muchima mambo wakaine byakebelenga bantu amba ekale mfumu, ne byo akaine balwanyi banji byo bamwambijile’mba amweshepo kiyukilo kufuma mwiulu kya kumwesha amba mfumu. Batumwa banji bamuyukile’mba ñanyi? Byo baishile ko alombejilenga, Yesu wibashikishe amba: “Nanchi bantu bantela amba ne ñanyi?”

Bakumbwile’mba: “Bamo bamba amba, Yoano Mubatizhi, bakwabo amba Elaija, bakwabo nabo amba Yelemiya nangwa amba umo wa mu bangauzhi.” Bantu balangulukilenga amba Yesu ye umo wa mu bano banabalume wasanguka ku bafu!

Yesu wibashikishe’mba: “Nga anweba muntela amba ne ñanyi?”

Petelo wakumbwile’mba: “Anweba mwi Kilishitu, Mwana Lesa mumi.”

Yesu byo aitabizhe byakumbwile Petelo, wamwambijile’mba: “Nakwambila namba: Obewa wi Petelo, kabiji pa jonka jino jibwe jikatampe po po nkashimikila kipwilo kyami, ne Kilende kechi kikakonsha kwikishinda ne.” Akye kyo kimye kitanshi Yesu kyo aambile amba ukashimika kipwilo kya kuba nangwatu lufu kechi lukebashinda panyuma ya kwikala bakishinka pano pa ntanda ne. Kepo abujile Petelo amba: “Nkakupa makii a Bufumu bwa mwiulu.”

Onkao mambo, Yesu walumbulwile’mba Petelo ukengila mingilo yanema. Bino kechi walumbulwilenga amba Petelo wamupele kifulo kikatampe kukila batumwa bakwabo nangwa kwikala kitendekesho kya kipwilo ne. Yesu mwine ye Jibwe Jikatampe pashimikwa kipwilo kyanji. Bino Petelo waingijishe makii asatu kushinkwila jibumba ja bantu kutwela mu Bufumu bwa mwiulu.

Petelo waingijishe kii mutanshi pa Pentekosita mu 33 C.E. kulumbulwila Bayudea balapijile kintu kyo bafwainwe kuba pa kuba’mba bakapuluke. Kabiji kechi papichile kimye kyabaya ne, waingijishe kii wa bubiji kukwasha bena Samaliya baitabijile kutwela mu Bufumu bwa Lesa. Kepo mu 36 C.E. waingijishe kii wa busatu kukwasha ba mu bisaka bikwabo babujile kuya kumukanda, Koneleusa ne balunda nanji nabo kutwela mu Bufumu bwa Lesa.

Yesu watwajijile kwisamba na batumwa. Kibafichishe bingi ku muchima byo ebabujile amba ukamanama ne kufwa mu Yelusalema. Petelo byo akankelwe kuyuka amba Yesu ukasangukila ku bumi bwa mwiulu, wasendele Yesu ku mbaji ne kumwambila amba: “Kwakamwa ne, Nkambo; kino kechi kikemumwekela ne.” Yesu byo aalulukile wamwambijile amba: “Pita kunyuma yami, Satana! Obewa wi kya kwituntulako kyami, mambo ulanguluka milanguluko ya bantu kechi ya Lesa ne.”

Kununga pa batumwa, pajinga ne bantu bakwabo bayijile pamo ne Yesu. Kepo ebechile ne kwibalumbulwila amba kechi kikebapelela kumulondela ne. Waambile’mba: “Umvwe muntu ukeba kundondela, ekane mwine ne kusenda kichi kyanji kya lumanamo, andondelenga. Mambo yense ukeba kupulusha mweo wanji ukamwela, pakuba yense wela mweo wanji na mambo a amiwa ne na mambo a mambo awama ukamupulusha.”

Aba balondela Yesu umvwe bakeba kutalwa bulongo kwi aye, bafwainwa kuchinchika ne kwipana. Waambile’mba: “Mambo muntu yense umvwa bumvu kwikala mwanami wa bwanga ne kubula kwitabila mambo ami mu kino kisemi kyabula bukishinka kabiji kyatama, Mwana muntu naye ukakana kumutambula kimye kyo akeya na bamalaika bazhila mu lukumo lwa Shanji.” Mako 8:22-38; Mateo 16:13-28; Luka 9:18-27.

▪ Mambo ka Yesu o atelejile muchima baana banji ba bwanga?

▪ Bantu bamuyukile Yesu amba ñanyi?

▪ Ñanyi makii o bapele Petelo kabiji wiengijishe byepi?

▪ Petelo bamolweleko byepi kabiji mambo ka?

Kitango 60

Bikekala Bufumu bwa Lukumo bwa Kilishitu

YESU wayile mu mapunzha a Kesalea Filipai kabiji wafunjishenga jibumba pajinga ne batumwa banji. Waambile bino byambo bya kuba’mba: “Kine nemwambila namba, mwi anweba baimana pano, bamo kechi bakafwa ne, poso bakamone Mwana muntu saka eya mu Bufumu bwanji.”

Baana banji ba bwanga kyamweka balangulukilenga amba ‘Yesu watazha mu ka?’ Byo papichile mulungu umo, Yesu wasendele Petelo, Yakoba ne Yoano ne kuya nabo ku mutumba walepa. Kampe bwaijile mambo baana banji ba bwanga bakunukilenga. Yesu byo alombelenga, waalukile kwi abo. Kilungi kyanji kyasamine nobe juba kabiji bivwalo byanji byatokeletu too nobe kyeya.

Kabiji bantu babiji abo ba “Mosesa ne Elaija” bamwekele ne kutatula kwisamba ne Yesu ‘pa mambo a kufumapo kwanji, ko afwainwe kufikizha ku Yelusalema.’ Kuno kufumapo kwalumbulwilenga lufu ne lusanguko lwa Yesu. Onkao mambo, uno mwisambo wamwesheshe kuba’mba kechi wakonsheshe kuchinuzhuka alwa lufu lwatama byonka byakebelenga Petelo ne.

Baana banji ba bwanga byo babukile, bakuminye bingi pa kyo bamwene ne kumvwa. Nangwa kya kuba kino kyajinga kimwesho, Petelo wikimwene nobe kyakine, kya kuba waambile’mba: “Nkambo, kituwamina kwikala ponka pano. Umvwe mukeba, nsakupopa matente asatu, imo yenu, ikwabo ya kwa Mosesa ne ikwabo ya kwa Elaija.”

Petelo byo akyambilenga, jikumbi jabembela jibavwetele kabiji jiwi jafumine mu jikumbi amba: “Uno ye Mwanami ye natemwa, mo namwena lusekelo, mumvwinai.” Baana ba bwanga byo baumvwine jiwi baponene kinkuvumene. Bino Yesu wibambijile’mba: “Imanai, kuba moyo ne.” Byo baimene bamwenekotu Yesu bunke.

Juba jalondejilepo byo bakunkulukilenga pa mutumba, Yesu wibakambizhe’mba: “Kange mubulepotu muntu nangwa umo kino kimwesho ne, poso Mwana muntu akasanguke ku bafu.” Baana ba bwanga byo bamwene Elaija mu kino kimwesho, kibalengejile kwikala na mepuzho. Bashikishe’mba: “Pano mambo ka banembeshi o bambila amba, Elaija wafwainwa kwiya patanshi?”

Yesu wibakumbwile’mba: “Elaija waishile kala kabiji bantu kechi bamuyukile ne.” Nangwa byonkabyo, Yesu waambilenga pe Yoano Mubatizhi wafikizhe mwingilo waingijilepo Elaija. Yoano wanengezhejile jishinda Kilishitu byonkatu Elaija byo anengezhejile jishinda Elisha.

Kino kimwesho kyakoseshe bingi Yesu ne baana banji ba bwanga. Kabiji kyamwesheshenga bikekala Bufumu bwa lukumo bwa Kilishitu. Kiji nobe baana banji ba bwanga bamwene “Mwana muntu saka eya mu Bufumu bwanji,” byonkatu Yesu byo ebabujile mulungu umo wapichilepo. Panyuma ya lufu lwa kwa Yesu, Petelo wanembele pa ‘byo bemwenejile na meso lukumo lukatampe lwa Kilishitu kimye kyo bajinga nanji ku mutumba wazhila.’

Bafaliseo bakebele’mba Yesu ebamweshepo kiyukilo kya kuyukanyikisha amba ye yewa ye baambilepo mu Binembelo kuba’mba ye ukekala Mfumu, Lesa ye asalulula. Wakaine kwibamwesha kiyukilo. Pano bino, baana ba bwanga ba kwa Yesu bebaswishishe kumona kimwesho kya kwaluka kwa Yesu kyafikizhe bungauzhi bwa Bufumu. Palutwe kacheche, Petelo wanembele amba: “Byonkabyo, luketekelo lwetu mu byambo bya bungauzhi lwakoselako.” Mateo 16:13, 16:28–17:13; Mako 9:1-13; Luka 9:27-37; 2 Petelo 1:16-19.

▪ Kilishitu saka akyangye kufwa, bamo bamumwene byepi saka eya mu Bufumu bwanji?

▪ Mu kimwesho ba Mosesa ne Elaija besambilenga pa ñanyi kintu ne Yesu?

▪ Mambo ka kino kimwesho o kyakoseshe baana ba bwanga?