Kitango 61

Wabukile Kalombwana Wajinga na Ndemona

YESU, Petelo, Yakoba ne Yoano byo bakijinga ku Mutumba wa Helemone, baana ba bwanga bakwabo batainwe mu lukatazho. Yesu byo abwelele, ponkapo wamwene amba kuji kyatama kyamweka. Kwajinga jibumba jazhokolokele baana banji ba bwanga ne banembeshi saka bepachika nabo. Jibumba byo jamwene Yesu, jakuminye bingi kabiji jamunyemejile ne kumwimuna. Wibashikishe amba: “Ñanyi kintu kyo mubena kwipachikila nabo?”

Umo mu jibumba waishile kufukama kwi Yesu ne kumwambila’mba: “Mufunjishi, naji kuleta mwanami wamulume kwi anweba, mambo uji na ndemona wamulengela kwikala kamaama, kabiji umvwe wavulumuka, umutaya panshi, ne kapofu ku kanwa kabiji ushenka ku meno ne bulume bumupwa. Naji kwambila baana benu ba bwanga namba bamupangemo, bino bajikukankalwa.”

Kyamweka banembeshi balengulwilenga baana ba bwanga na mambo a kukankalwa kubuka awa kalombwana. Pa kyonkakya kimye kyakatezhe bintu, Yesu po po afikile. Wibambijile’mba: “Anweba kisemi kyabula lwitabilo, bimye binga byo nkatwajijila kwikala nenu? Bimye binga byo nkemutekenya?”

Kyamweka Yesu waambijilenga bonse bajingapo, kikatakata banembeshi bakatezhenga baana banji ba bwanga. Kepo Yesu aambile amba: “Muletai kuno.” Bino kalombwana byo aishilenga kwi Yesu, ndemona wajinga mwi aye wamuponeshe panshi ne kumuvulañanya. Uno kalombwana waalañenenga panshi ne kapofu ku kanwa.

Yesu washikishe’mba: “Kino kyamutatwile ñanyi kimye?”

Shanji wakumbwile’mba: “Kufumatu ku bwanyike, javula [ndemona] umutaya mu mujilo ne mu mema kukeba kumwipaya.” Kepo shanji asashijile’mba: “Umvwe paji kyo mwakonsha kwitubila, tubilai lusa ne kwitukwasha.”

Kampe pa myaka yavula shanji wakebanga bukwasho. Baana ba bwanga ba kwa Yesu byo bakankelwe kubuka mwananji, wamwene amba kyapwa bunga bwapwila pa mpuki. Yesu byo amwene lukatazho lwajinga na uno muntu, wamukoseshe amba: “Mambo ka o ubena kwambila amba, ‘Umvwe mwakonsha’? Mambo bintu byonse byakonsheka ku yense uji na lwitabilo.”

Ponkapo shanji wabijikile ne kumusashijila amba: “Nji na lwitabilo! Nkwashai nkoseshe lwitabilo lwami!”

Yesu byo amwene’mba jibumba jibena kunyemena ko bajinga, wakajipijile ndemona amba: “Obewa ndemona kamaama kabiji washinka matwi, nakukambizha namba, lupukamo mwi aye kabiji kutwelamo jibiji ne.” Ndemona byo alupukilemo, walengejile kalombwana kubijika jibiji ne kumuvulañanya. Uno kalombwana walaajiletu sulubya kya kuba bantu batatwile kwamba’mba: “Wafwa!” Bino Yesu wakwachile kalombwana ku kuboko ne kumwimanya.

Kimye baana ba bwanga kyo ebatumine na kusapwila, bapangilenga bandemona. Onkao mambo, byo batwelele mu nzubo bamushikishe Yesu ku mbaji amba: “Mambo ka o twaji kukankelwa kumupangamo ndemona?”

Yesu byo amwesheshe’mba bakankelwe na mambo a kubula lwitabilo, wibakumbwile’mba: “Uno ndemona wakonsha kufumamotu kana na lulombelo.” Bafwainwe kwinengezha pa kupangamo awa ndemona wajinga na bulume. Kyakebewenga lwitabilo lwakosa ne kulomba kwi Lesa kwibapa bulume bwa kwibakwasha.

Kepo Yesu anungilepo amba: “Kine nemwambila namba: Umvwe mwaikala na lwitabilo nobe luchacha wa masitate, mukambila iwe mutumba amba, ‘Fuma papo uye popa,’ ne aye ukafumapo kabiji kafwako kyo mukakankalwa ne.” Kine, lwitabilo lukwasha bingi!

Mikika ne makatazho alengela kubula kwingila bulongo mwingilo wa Yehoba akonsha kumweka nobe mitumba ikatampe ya kukankalwa kukanjila nangwa kupalañanya. Pano bino, Yesu wamwesheshe’mba umvwe twaikala na lwitabilo, kwilutekezha ne kwilukomesha lukakosa ne kwitukwasha kushinda mikika ne makatazho aji nobe mitumba. Mako 9:14-29; Mateo 17:19, 20; Luka 9:37-43.

▪ Yesu byo afumine ku Mutumba wa Helemone, ñanyi kintu kyo amwene?

▪ Yesu wakoseshe byepi shanja kalombwana wajinga na ndemona?

▪ Mambo ka baana ba bwanga o bakankejilwe kupangamo ndemona?

▪ Yesu wamwesheshe byepi kuba’mba lwitabilo lukwasha bingi?

Kitango 62

Wibafunjishe pa Mambo a Kwipelula

PANYUMA ya kubuka kalombwana wajinga na ndemona mu mpunzha yajinga kwipi na Kesalea Filipai, Yesu wakebele kubwela ku Kapenama. Nangwa byonkabyo, wakebele kubwelatu na baana banji ba bwanga kuba’mba ebakwashe saka akyangye kufwa ne kwibafunjisha mingilo yo bakengilanga. Wibalumbulwijile amba: “Mwana muntu bakamusolola ku bantu, kabiji bakamwipaya, ne pa juba ja busatu ukasangulwa.”

Nangwa kya kuba Yesu waambilepo kala pa kino, kabiji batumwa basatu bamwene kimwesho kya kwaluka mo besambilenga pa ‘kufumapo kwanji,’ baana banji ba bwanga kechi bakikwatakenye mwatajile bintu Yesu byo aambilengapo ne. Nangwa kya kuba kafwako nangwa umo wakaine amba bakamwipaya byonka byakaine Petelo, bachiine kumushikisha jikwabo.

Kepo bafikile ku Kapenama, muzhi mwaikelenga Yesu kimye kya mwingilo wanji. Kabiji ye muzhi mwaikalanga Petelo ne batumwa bakwabo. Akwa banabalume batambulanga misonko ya ku nzubo ya Lesa, baishile kwi Petelo. Kampe na mambo a kukeba kuvwangamo Yesu mu kuzhilulula kisho kyo baitabizhe, bashikishe’mba: “Nanchi Mufunjishi wenu kechi upana misonko ya ku nzubo ya Lesa nenyi?”

Petelo wakumbwile’mba: “Ee.”

Yesu byo afikile mu nzubo, wayukile kyamwekele. Onkao mambo, Petelo saka akyangye ne kumubula ne, Yesu wamushikishe amba: “Shimona, walangulukapo amba ka? Nanchi bamfumu ba pano pa ntanda batambula misonko ku bañanyi? Ku baana babo nyi, inyi ku bantu bangi?”

Petelo wakumbwile’mba: “Ku bantu bangi.”

Yesu waambile’mba: “Ko kuba amba baana kechi bafwainwa kupana misonko ne.” Byo kiji kuba’mba Shanji Yesu ye Mfumu wa bilengwa byonse, ye bapopwelanga pa nzubo ya Lesa, ko kuba’mba Mwana Lesa kechi wafwainwe kupana musonko wa ku nzubo ya Lesa ne. Yesu waambile’mba: “Bino pa kuba amba tubule kwibatuntwisha, yanga ku kalunga ka mema, ukatayepo kanda, kabiji jisabi jitanshi jo usakuloba, wijasamike mukanwa usakutanamo mali a siliva [ana]. Usende ne kwibapa, imo yami ikwabo yobe.”

Baana ba bwanga byo bakonkene pamo panyuma ya kubwela ku Kapenama, kampe ku nzubo ya kwa Petelo, bashikishe’mba: “Ñanyi mukulumpe mu Bufumu bwa mwiulu?” Yesu wayukile kyalengejile kuba’mba bamushikishe, mambo wayukile byo besambilengapo kimye kyo bamulondejilenga kufuma ku Kesalea Filipai. Onkao mambo, wibashikishe amba: “Nanchi ñanyi kintu kyo mubepachikengapo mu jishinda?” Baana ba bwanga byo baumvwine bumvu, bazhindaminetu nzoo mambo mu jishinda bepachikilenga pa wafwainwe kwikala mukulumpe pe abo.

Pa myaka pepi na isatu yafunjishenga Yesu, nanchi kyafwainwe baana ba bwanga kwipachika nyi? Kino kyamwesheshe amba bumbulwakulumbuluka ne bupopweshi bwakomenamo muntu biji bingi na bulume. Bupopweshi bwa Bayudea mwakomejile baana ba bwanga bwatundaikanga kukeba bifulo nangwa bukulumpe. Kabiji kampe Petelo na mambo a kumulaya kwi Yesu kutambula “makii” a Bufumu, wimwenenga amba ye mukulumpe. Ba Yakoba ne Yoano nabo kampe bajinga na milanguluko intutu imo mambo bamweneko kwaluka kwa kwa Yesu.

Nangwa byonkabyo, Yesu waingijishe kyakumwenako kuba’mba olole milanguluko yabo. Waichile mwana mucheche, wamwimikile pakachi kabo ne kumukumbata. Kabiji wibambijile’mba: “Umvwe mwabula kupimpula byubilo byenu ne kwikala nobe baana babacheche, kechi mukatwelamo mu Bufumu bwa mwiulu ne. Onkao mambo, yense ukepelula nobe uno mwana mucheche, ye mukulumpe mu Bufumu bwa mwiulu, kabiji yense utambwila mwana mucheche mu jizhina jami, untambwila ne amiwa.”

Jino jajinga jishinda jawama ja kolwelamo baana banji ba bwanga. Yesu kechi wibazhingijile ne, kabiji kechi wibambijile amba belundumika, baji na kichima nangwa kukebesha bifulo ne. Bino wibafunjishe kupichila mu kwingijisha kyakumwenako kya baana babacheche bepelula babula kukeba bukulumpe pa bakwabo. Onkao mambo, Yesu wamwesheshe amba baana banji ba bwanga bafwainwe kwikala na bino byubilo bijipo na banyike. Wapezhezheko amba: “Mambo yense wipelula mwine mwi anweba ye mukulumpe.” Mateo 17:22-27; 18:1-5; Mako 9:30-37; Luka 9:43-48.

▪ Byo babwelele ku Kapenama, ñanyi lufunjisho Yesu lo abwezhezhepo, kabiji belutambwijile byepi?

▪ Mambo ka Yesu o afwainwe kubula kupana musonko wa ku nzubo ya Lesa, bino mambo ka o apanyijile?

▪ Ki ka kyalengejile baana ba bwanga kwipachika, kabiji Yesu wibolweleko byepi?