Butemwe bo Bulengela Mwingilo Kwingijiwa Bulongo

¹ “Iyai ko nji, . . . ne amiwa nkemukokolosha.” (Mat. 11:28) Bino byambo byawama byamwesheshe butemwe bukatampe Yesu bo atemenwe bantu. Byo tuji bamwingilo wa bwina Kilishitu tusaka kulonda Yesu mu kumwesha butemwe bwetu ku bantu babena kumanama na mambo a bapanopantanda babula butemwe. Twakonsha kumwesha byepi butemwe ku bantu mu mwingilo wetu wa busapwishi?

² Kupichila mu Byambo: Butemwe Yesu bo atemenwe bantu bwamulengejile kushukilwa kimye kiji kyonse kusapwila mambo awama. (Yoa. 4:7-14) Butemwe buketukwasha kubula kukankazhama kusapwila busapwishi bwa kushukilwa. Mushimbi umo wa myaka ya kusemwa itanu na umo wasapwijile bingi bulongo ku mwanamukazhi waikele kipikipi nanji mu kibamba mwa kupembelela kumonañana na dokotala. Ki ka kyamulengejile kuba bino? Walondolwele amba: “Uno mwanamukazhi wamwekelenga nobe ukeba kuyuka Yehoba.”

³ Twakonsha kumwesha lusekelo mu bantu kupichila mu kumwemwesela ne kwamba na jiwi jakoka bulongo. Kutelekesha bulongo bibena kwamba bantu ne kwitabizha bintu bibena kwibakatazha kabiji ne kumwesha lusekelo lwa kine nako kumwesha butemwe. (Mana. 15:23) Twafwainwa kulonda Yesu kupichila mu kutentemesha mambo awama a Bufumu kabiji ne lusa lwa Yehoba lwa butemwe ku bantu.—Mat. 24:14; Luka 4:18.

⁴ Kupichila mu Byubilo: Yesu watelenga bingi muchima kukwasha bantu ku mubiji. (Mat. 15:32) Ne atweba twakonsha kwikalapo na kimye kya kubilamo byubilo bya butemwe bubula kwaluka kimye kyo tuji mu mwingilo. Nyenga umo wamwene mwanamukazhi umo saka ayandakana kukeba kumvwa mulaka waambilenga muntu wamutumijile foni. Nyenga yetu wamukwashishe uno mwanamukazhi kupichila mu kumutuntulwilako byambo bya muntu watumine foni. Kino kyubilo kya butemwe kyalengejile kwisamba mwisambo wa mu Binembelo walengejile uno mwanamukazhi kuswa lufunjisho lwa Baibolo. Kukwabo nako, mulongo wajinga pa lwendo lwa kubwelako wataine mwina nzubo wazhingila na mambo a kulukuta na kipona kikatampe kyakankelwe kupita pa kibelo. Panyuma ya kumukwashako, mulongo waikele pa kyonkakya kipona ne kutendeka lufunjisho lwa Baibolo na yewa muntu.

⁵ Byo tuya mu mwingilo, tumwesha butemwe kwi Lesa ne ku bakwetu. (Mat. 22:36-40) Kumwesha butemwe kwa uno mutundu mu byambo ne mu byubilo kukwasha ba michima ya kishinka kuyuka mba tuji na bukine.

“Kechi Mbena Kukeba Ne”

¹ Bavula byo byo bakumbula ku byambo byetu mu mapunzha amo. Ki ka kiketukwasha kubula kulefulwa umvwe twatana bantu ba misula mu nyaunda? Twakonsha kulengela byepi bantu kutako muchima ku mambo awama?

² Ikalai Balusekelo: Umvwe sa tuvuluka ene mambo bantu bavula o baikela na misula, kiketukwasha kwikala balusekelo. Bantu bafunjishiwe’mba bilengwa bilengeletu bine nangwa aba bakomejile mu bantu bamba’mba Lesa kafwako, kechi bayuka buneme bwa Baibolo ne. Bamo bakonsha kulefulwa na mambo a bukamfutumfutu bo bamona mu bupopweshi. Bakwabo nabo misula yabo iya na mambo a kulefulwa ne kubula luketekelo. (Efi. 2:12) Bamo na mambo a kunemenwa na bya kutabataba bya buno bwikalo, ‘kechi bayuka ne.’—Mat. 24:37-39.

³ Nangwa kya kuba bantu bamo bo tutana boba misula, twakonsha kwikala balusekelo mu mwingilo, sa twayuka kuba’mba kwibikako kwetu kutumbijika Yehoba. (1 Pe. 4:11) Kunungapo, kwamba pa mambo a bukine nangwatu ku boba babula kwibunemeka, kukosesha lwitabilo lwetu. Twayai twesekenga kumona bantu mu nyaunda yetu byonka Yehoba byo ebamona. Wibobile lusa bantu ba mu Ninevwa babujile “kuyuka mwapusena kuboko kwa kilujo na kwa kipiko.” (Yona 4:11) Bantu bekala mu nyaunda yetu bakebewa mambo awama! Onkao mambo, kechi twafwainwa kukoka ne, twafwainwa kukeba mashinda mwa kutundaikila bantu kutako muchima ku byambo bya mu Baibolo.

⁴ Isambai pa Bintu Bibena Kukatazha Bantu: Kampe mu byambo byenu bya kutendekelapo mwakonsha kutongolapo kintu kimo kibena kukatazha bantu mu nyaunda yenu kabiji ne kwipuzha mwina nzubo kwambapo milanguluko yanji. Telekai byo abena kwamba, apa bino mumubule byambo bya lutekenesho biji mu Baibolo pa kwisamba pa bintu byamukatazha. Panyuma ya kuponako malwa mu nyaunda imo, Kamonyi umo wapichilengamo ku nzubo ne nzubo na kwambañana na bantu pa oa malwa. Waambile’mba: “Ponkapotu, bantu bakasulukile kwambañana nabo. Nesambile na bantu bavula misambo yawama bingi pa joja juba mambo nebamwesheshe lusekelo.”

⁵ Makatazho aji onse o babena kupitamo bantu akafumishiwapo na Bufumu bwa Lesa. Esekai kumonapo lukatazho lumo lwakatazha mwina nzubo. Wakonsha kwimuswisha kulondolola byambo bya luketekelo biji mu Baibolo. Inge ne, wakonsha kutemwa kukomvwako “ne jibiji.”—Byubilo 17:32.