Kitango 65

Wayile mu Bufyamfya ku Yelusalema

KYAJINGA kimye kya kibundo mu 32 C.E., kabiji Kijiilo kya Tente wa Lusambakeno kyajinga pepi. Kufumatu pa Kijiilo kya Lupitailo mu 31 C.E., kimye Bayudea kyo bakebelenga kumwipaya, waingijilenga mwingilo wanji mu Ngalilea. Kyamweka kufumatu kyokya kimye, Yesu wayangatu ku Yelusalema na kutanwa ku bijiilo bisatu bya pa mwaka pa mwaka bya Bayudea.

Bankasanji Yesu bamwambijile amba: “Fumai kuno muyenga ku Yudea.” Yelusalema wajinga muzhi mukatampe wa Yudea kabiji kyalo kyonse ko ko bayanga na kupopwela. Bankasanji baambilenga amba: “Kafwako muntu ukeba kuyukanyikwa patoka uba kintu mu bufyamfya ne.”

Nangwa kya kuba ba Yakoba, Shimona, Yosefwa ne Yudasa kechi baitabijile amba kolojabo aye Yesu wajinga Mesiasa ne, bakebelenga amba aye na kumwesha mingilo yanji ya kukumya ku bonse bayile ku kijiilo. Nangwa byonkabyo, Yesu wayukile kizumba kyo ajingamo. Waambile’mba: “Ba pano pa ntanda kechi bakonsha kwimushikwa ne, bino amiwa banshikwa mambo nshimuna kuba amba mingilo yabo yatama.” Kepo aambijile bankasanji amba: “Anweba yainga ku kijiilo; amiwa kechi nsakuyako ne.”

Kijiilo kya Tente wa Lusambakeno bekyubanga mu moba atanu na abiji. Pa juba ja butanu na busatu bapezhangako kino kijiilo na mingilo ya lusekelo. Kino kijiilo kyo kyamweshanga amba kimye kya kubungizha kajo kyapwa kabiji kyajinga kimye kyo bamwesheshangamo lusanchilo ne kwikala na lusekelo lukatampe. Byo papichile moba kufuma payijile bankasanji Yesu na kutanwa ku kijiilo pamo na bakwabo bavula, aye ne baana banji ba bwanga bayile mu bufyamfya. Bapichile ja ku Samaliya mu kifulo kya kuya mu jishinda jatemenwe kupitamo bantu bavula kwipi na Mukola wa Yodano.

Byo kyajinga kuba’mba Yesu ne bo ayilenga nabo bakebelenga kwa kufikila mu muzhi wa Samaliya, watumineko baluwe kuya na kunengezha mwa kufikila. Nangwa byonkabyo, bantu bakaine kukwasha Yesu byo bayukile amba wayilenga ku Yelusalema. Ba Yakoba ne Yoano byo bazhingijile, bamwipwizhe’mba: “Nkambo, nanchi mubena kukeba amba twambile mujilo afume mwiulu ne kwibasoka nyi?” Byo baambile bino, Yesu wibakajipijile. Kepo bayile ku muzhi mukwabo.

Byo bayilenga mu jishinda, munembeshi umo wamwambijile Yesu amba: “Amiwa nsakwimulondelanga konse ko mubena kuya.”

Yesu wamwambijile mba: “Balubwala baji na mimbwa yabo ne bañonyi nabo baji na binsa, pakuba Mwana muntu kechi uji ne na pa kushamina mutwe ne.” Yesu walumbulwilenga amba awa munembeshi wakonsheshe kupita mu makatazho umvwe wamulondejilenga. Kabiji kyamweka na mambo a kwilundumika, awa munembeshi kechi wakonsheshe kuswa bobwa bwikalo ne.

Yesu waambijile muntu mukwabo amba: “Ndondelenga.”

Awa muntu wakumbwile’mba: “Patanshi nswishai ngye nkazhike batata.”

Yesu wamubujile’mba: “Leka bafu bazhike bafu babo bene, pakuba obewa yanga ukasapwile Bufumu bwa Lesa konse konse.” Awa muntu kyamweka bashanji bajinga bakyangye kufwa. Mambo umvwe bafwile, mwanabo inge kechi waishile na kuteleka kwi Yesu ne. Kampe awa mwana walombelenga kumupako kimye kya kupembelela poso bashanji bakafwe. Kechi winengezhezhe kutangizhako Bufumu bwa Lesa mu bwikalo bwanji ne.

Byo bakiyilenga ku Yelusalema, muntu mukwabo waambijile Yesu amba: “Nsakwimulondela, Nkambo, bino patanshi nswishai nkashajikepo ba mu nzubo yami.”

Yesu wamwambijile’mba: “Kafwako muntu wakonsha kukwata kuboko kwanji ku pulao ne kutala ku bintu bya kunyuma wafwainwa kutwela mu Bufumu bwa Lesa ne.” Aba bakeba kwikala baana ba bwanga ba kwa Yesu bafwainwa kuta muchima ku mwingilo wa Bufumu. Byonkatu tumimpalala byo twakonsha kukonkomana umvwe ubena kujima ke abule kutala kulutwe, ne yense utala kunyuma mu buno bwikalo wakonsha kusenduka mu jishinda ja ku bumi bwa myaka. Yoano 7:2-10; Luka 9:51-62; Mateo 8:19-22.

▪ Bankasanji Yesu bo bañanyi, kabiji baambilenga’mba ka pe aye?

▪ Mambo ka bena Samaliya o bakanyijile, kabiji ñanyi kintu ba Yakoba ne Yoano kyo bakebele kuba?

▪ Ñanyi misambo Yesu yo esambilenga na bantu basatu mu mukwakwa, kabiji waambilepo amba ka pa mwingilo wa kwipana?

Kitango 66

Ku Kijiilo kya Tente wa Lusambakeno

YESU wayile bingi nkuwa pepi myaka isatu kufumatu kimye kyo abatizhiwe. Bantu bavula bamwene bya kukumya byo aubile ne nkuwa ya mingilo yanji yakumbene kyalo kyonse. Bantu byo bakonkene ku Kijiilo kya Tente wa Lusambakeno mu Yelusalema, bamukebelenga. Bashikishe’mba: “Nanchi uno muntu uji pi?”

Yesu bamwambilengapo bingi ku bantu. Bamo baambilenga amba: “Ke muntu wawama bingi.” Bakwabo nabo amba: “Kechi wawama ne, utwala bantu mungi.” Bantu baambilengapo bingi pe aye pa oa moba atanshi a kijiilo. Pano bino, kafwako waambilengapo patoka pe Yesu ne. Mambo bantu bachiinenga bantangi ba Bayudea.

Kijiilo byo kyajinga pepi kupwa, Yesu wafikile. Watwelele mu nzubo ya Lesa bantu mo bakuminye mo afunjishishenga. Yesu byo abujile kutanwa ku masukulu a Bayudea, Bayudea bakuminye ne kwamba’mba: “Nanchi uno muntu waikala byepi na ano maana ne kuyuka bintu saka abujile kuyapo ku sukulu?”

Yesu walumbulwile’mba: “Byo mfunjisha kechi byami ne, bino bya yewa wantumine. Umvwe muntu ukeba kuba kyaswa muchima wa Lesa, ukayuka umvwe byo mfunjisha bifuma kwi Lesa nangwa ñambatu milanguluko yami.” Bintu Yesu byo afunjishenga kechi byapusene na mizhilo ya Lesa ne. Onkao mambo, wakebelenga lukumo lwa Lesa kechi kwitumbijika aye mwine ne. Yesu wibashikishe’mba: “Nanchi Mosesa kechi wimupele Mizhilo nenyi?” Wibakajipijile amba: “Kafwako nangwa umo mwi anweba wakokela Mizhilo ne.”

Kepo Yesu ebashikishe amba: “Mambo ka o mubena kukeba kungipayila?”

Bantu bajinga mu jibumba, kampe benyi baishile ku kijiilo kechi bayukile’mba bakeba kumwipaya ne. Balangulukilenga amba kechi kyakonsheka kwipaya mufunjishi wawama ne. Onkao mambo, balangulukile amba Yesu kechi ujitu bulongo pa kuba’mba alangulukenga kintu kya uno mutundu ne. Baambile’mba: “Obewa uji na ndemona. Ñanyi ubena kukeba kukwipaya?”

Bantangi ba Bayudea bakebelenga’mba Yesu afwe nangwa kya kuba jibumba kechi jayukile kino ne. Yesu byo abukile muntu pa juba ja Sabado saka papita kala mwaka umo ne kichika, bantangi basakile kumwipaya. Onkao mambo, Yesu wasolwele byajinga michima yabo yatama amba: “Umvwe muntu bamutwala ku mukanda pa juba ja sabado kuba amba muzhilo wa Mosesa abule kuzhilululwa, nanchi mwanzhingijila amiwa na mambo a kuba nabukile muntu pa juba ja sabado nyi? Kilekai kutalanga ku bilungi pa kuchiba mambo, pakuba chibilai mambo monka mo aolokela.”

Bangikazhi ba mu Yelusalema bayukile kino, bamushikishe amba: “Nanchi uno kechi ye muntu ye babena kukeba kwipaya nenyi? Pano talai! ubena kwamba pa mvula bantu, kabiji kafwako kyo bamubapo ne. Nanchi bantangi kechi bayuka amba uno ye Kilishitu nenyi?” Bano bangikazhi ba mu Yelusalema baambile pa ene mambo o babujile kwitabila amba Yesu ye Kilishitu. Baambile’mba: “Atweba twayuka kwafuma uno muntu; bino Kilishitu byo akeya, kafwako ukayuka ko akafuma ne.”

Yesu wibakumbwile amba: “Anweba mwangyuka ne ko nafuma. Kabiji kechi neishijile ami mwine ne, bino awa wantumine wakine, kabiji anweba kechi mwamuyuka ne. Amiwa namuyuka mambo nafuma ko aji, ne aye ye wantuma.” Byo baumvwine kino bakebele kumukwata kampe ne kumutaya mu kaleya nangwatu kumwipaya. Bino bakankelwe mambo kechi kyafikile kimye kya kuba’mba Yesu afwe ne.

Nangwa byonkabyo, bavula bamwitabijile Yesu, mambo kyo kyo bafwainwe kuba. Waendele pa mema, wakainye lubesha, wazhindamikile luvula pa kalunga, wajishishe bantu mu jishinda ja kukumya na bashikwa bacheche ne masabi, wabukile bakolwa, walengejile bilema kwenda, walabishe meso a bampofu, wabukile bambumba ne kusangulatu bafu. Beshikishenga amba: “Umvwe Kilishitu waiya, nanchi ukoba biyukilo byakila byaubapo uno muntu nyi?”

Bafaliseo byo baumvwine jibumba na kunyinyita pa bino bintu, abo ne bañanga bakatampe batumineko bakapaso amba bakakwate Yesu. Yoano 7:11-32.

▪ Ñanyi kimye kyafikile Yesu ku kijiilo, kabiji bantu baambilengapo amba ka pe aye?

▪ Mambo ka bamo o baambijilenga amba Yesu wajinga na ndemona?

▪ Bangikazhi ba mu Yelusalema bamumwenenga byepi Yesu?

▪ Mambo ka bavula o baitabijile Yesu?