Kitango 67

Bakankelwe Kumukwata

KIJIILO kya Tente wa Lusambakeno saka kikyangye kupwa, bantangi ba bupopweshi batumineko bakapaso kuya na kukwata Yesu. Aye kechi wafyamine ne. Yesu watwajijiletu na kufunjisha pa mvula bantu amba: “Nji nenu pa kakimye kacheche saka nkyangye kubwela ku wantumine. Anweba mukankeba, bino kechi mukantana ne, kabiji akwa ko nji, anweba kechi mwakonsha kwiyako ne.”

Bayudea kechi baumvwine mo atazhizhe ne. Onkao mambo, beshikishenga mulwabo amba: “Nanchi uno muntu kwepi ko abena kukeba kuya, kyakuba atweba tukakankalwe kumutana? Nanchi ubena kukeba kuya na kwikala na Bayudea bapalañena mu Bangiliki ne kufunjisha Bangiliki nyi? Nanchi watazha mwepi byo aamba amba, ‘Anweba mukankeba, bino kechi mukantana ne, kabiji akwa konji anweba kechi mwakonsha kwiyako ne’?” Yesu waambilenga pa lufu lwanji ne kusangukila ku bumi bwa mwiulu, balwanyi banji ko babujile kukonsha kulondela.

Juba ja butanu na bubiji kabiji japeleleko, jafikile. Umvwe bwakya pa juba ja kijiilo jonse, ñanga waichilanga mema o atapulanga mu Kizhiba kya Shiloma kuba’mba akunkulukile ku kitako kya kya kusokelapo bitapisho. Kampe na mambo a kuvululamo bantu pa kino kintu kyo baubanga pa juba pa juba, Yesu wabijikile amba: “Yense wafwa kilaka eye kwi amiwa, ne amiwa nsakumupa mema a kutoma. Awa wangitabila, monka mwaambila Kinembelo, ‘Mu muchima wanji mukafumanga tukola twa mema a bumi.’”

Yesu waambilenga pa bintu bikatampe bikafumamo umvwe mupashi wazhila waitululwa. Mwaka walondejilepo, kuno kwitululwa kwa mupashi wazhila kwaubiwe pa Pentekosita. Tukola twa mema a bumi twakunkulukilenga kimye baana ba bwanga 120 kyo batatwile kusapwila bantu. Bino akya kimye saka kikyangye kufika, kechi kwakijinga mupashi ne, mambo baana ba bwanga ba kwa Kilishitu kechi bakishingilwe mupashi wazhila ne kwibeta ku bumi bwa mwiulu ne.

Pa mambo a mfunjishisho ya kwa Yesu bamo batatwile kwamba’mba: “Kine uno ye Ngauzhi.” Baambilenga pe ngauzhi wakila Mosesa walayilwe kwiya. Bakwabo baambile’mba: “Uno ye Kilishitu.” Bino bakwabo nabo bakainenga amba: “Nanchi Kilishitu ukafuma mu Ngalilea nyi? Nanchi Kinembelo kechi kyaamba amba, Kilishitu ukafuma mu baana ba Davida ne kuba amba mu Betelema muzhi mucheche mwaikalanga Davida mo mo akafuma nenyi?”

Onkao mambo, jibumba japusenejilemo. Bamo bakebelenga amba Yesu bamukwate, bino kafwako wamukwachile ne. Bakapaso byo babwelele kwa kubula kukwata Yesu, bañanga bakatampe ne Bafaliseo bebashikishe amba: “Mambo ka o mwabujila kumuleta?”

Bakapaso bakumbwile’mba: “Kafwako muntu nangwa umo wakyambapo kala mu jino jishinda ne.”

Bantangi ba bupopweshi byo bazhingijile, baimene na kwibakosamika, ne kwibambila byambo bya mukeyu. Bebambijile na bukaji amba: “Nanchi ne anweba bemutwala mungi nyi? Nanchi bantangi nangwa Bafaliseo bamo bamwitabila nyi? Pakuba jino jibumba jabula kuyuka Mizhilo ke ja bantu bafingwa.”

Ponkapo Nikodema, wajinga Mufaliseo kabiji ntangi wa Bayudea (ko kuba’mba wa mu Kije Kikatampe) waambijileko Yesu. Musakuvuluka amba myaka ibiji ne kichika yapichilepo, Nikodema wayile kwi Yesu bufuku ne kumwesha’mba wamwitabila. Pa kikye kimye, Nikodema waambile’mba: “Kwesakana na muzhilo wetu, umvwe tukeba kuzhachisha muntu, nanchi kechi tukyumvwa kwi aye patanshi pa kuba amba tuyuke kyo abena kuba nenyi?”

Bafaliseo bazhingijile bingi byo bamwene’mba umo mwi abo ubena kupokololako Yesu. Bamwambijile’mba: “Nanchi ne obewa wafuma ku Ngalilea nyi? Pesapesa mu Binembelo ne kumona amba kafwako ngauzhi ukafuma mu Ngalilea ne.”

Nangwa kya kuba Binembelo kechi byaambapo mu kushinkamika amba ngauzhi ukafuma mu Ngalilea ne, bino bimwesha’mba Kilishitu mo mo afumine, byo byaamba’mba “kyeya kikatampe” kikamweka mu yoya mpunzha. Yesu wasemekejilwe mu Betelema, kabiji wajinga wa mu kisemi kya Davida. Nangwa kya kuba Bafaliseo bayukile kino, bajinga na mambo a kubula bantu bya bubela pe Yesu. Yoano 7:32-52; Isaya 9:1, 2; Mateo 4:13-17.

▪ Ñanyi kintu kyo baubanga lukelo pa juba ja kijiilo, kabiji Yesu waambilepo byepi pa kino?

▪ Mambo ka bakapaso o bakankejilwe kukwata Yesu, kabiji bantangi ba bupopweshi baubilepo ka?

▪ Nikodema wajinga ñanyi, wamonanga byepi Yesu, kabiji Bafaliseo bakwabo bamubile byepi?

▪ Ñanyi bishiino bimwesha’mba Kilishitu wafumine mu Ngalilea?

Kitango 68

Watwajijile Kufunjisha pa Juba ja Butanu na Bubiji

PA JUBA japeleleko Kijiilo kya Tente wa Lusambakeno kyatwajijile, ko kuba’mba juba ja butanu na bubiji. Yesu wafunjishenga mu nzubo ya Lesa mu “kibamba mwajinga bilambwilo.” Kino kibamba kyamweka kyajinga pa mpunzha patelwanga amba Lubanza wa Banabakazhi mwajinga tubilambwilo bantu mo babikanga mibingu yabo.

Kimye kya kijiilo bufuku, mu uno lubanza wa nzubo ya Lesa mwaikalanga kyeya kikatampe. Mwajinga bitulwapo malampi bina bikatampe, byonse byajinga na bintu bikatampe mwajinga manyi. Kyeya kyafumanga ku ano malampi ajinga na bya kubikamo manyi 16, kyabayile bingi kya kuba kyatokeshanga mpunzha yonse bufuku. Byaambile Yesu byavulwilemo bamutelekelenga pa mambo a kino. Waambile’mba: “Amiwa ne kyeya kya pano pa ntanda. Awa undondela kechi ukenda mu mfishi ne, bino ukekala mu kyeya kya bumi.”

Bafaliseo bakaine’mba: “Ubena kwishimuna obe mwine; ne kushimuna kobe kechi kwa kine ne.”

Yesu wibakumbwile amba: “Nangwa neshimuna ami mwine, kushimuna kwami kwa kine, mambo nayuka ko nafumine ne ko mbena kuya. Bino anweba kechi mwayuka ko nafumine ne ko mbena kuya ne.” Kabiji wanungilepo amba: “Amiwa neshimuna ami mwine, ne Batata bantumine nabo banshimuna.”

Bafaliseo bamushikishe amba: “Nanchi Bashobe bekala pi?”

Yesu wibakumbwile amba: “Anweba kechi mwangyuka amiwa nangwa Batata ne. Mambo umvwe mwangyuka inge mwayuka ne Batata.” Nangwa kya kuba Bafaliseo bakebelenga amba Yesu bamukwate, kafwako nangwa umo wamukwachile ne.

Yesu waambile jibiji amba: “Akwa ko mbena kuya kechi mwakonsha kwiyako ne.”

Ponkapo Bayudea batatwile kwamba’mba: “Nanchi ukeba kwiipaya aye mwine nyi? Mambo ubena kwamba amba, ‘Akwa ko mbena kuya kechi mwakonsha kwiyako ne.’”

Yesu wibalumbulwijile amba: “Anweba mwafuma pano panshi; pakuba amiwa nafuma mwiulu. Anweba mwafuma pano pa ntanda, pakuba amiwa kechi nafuma pano pa ntanda ne.” Wanungilepo amba: “Inge mwabula kwitabila amba yami iye, mukafwa mu bundengamambo bwenu.”

Yesu waambilenga pa byo ajinga saka akyangye kwiya pano pa ntanda ne byo ajinga Mesiasa walayilwe nangwa’mba Kilishitu. Nangwa byonkabyo, kyamweka bamushikishe na mukeyu amba: “Nanchi yobe ñanyi?”

Na mambo a kumukana, Yesu wibakumbwile amba: “Mambo ka o mbena kutayila ne kimye kwisamba ne anweba?” Watwajijile kwamba’mba: “Aye wantumine ye wakine, ne bintu byonka byo naumvwine kwi aye byo byo ñamba ku ba pano pa ntanda.” Yesu wanungilepo amba: “Byo mukamwimika Mwana muntu pa kichi, kepo mukayuka amba yami iye, ne kuba amba kechi neubila bintu ami mwine ne; pakuba monka mwamfunjishishe Batata mo mo ñambila bino bintu. Kabiji awa wantumine uji ne amiwa; kechi wansha bunke ne, mambo nguba bintu bimutokesha pa muchima.”

Yesu byo aambile bino bintu, bavula bamwitabijile. Aba bamwitabijile wibambijile’mba: “Umvwe saka mulama byambo byami, mukekala baana bami ba bwanga, kabiji mukayuka bukine, ne bukine bukemukasulula.”

Aba bamulengulwilenga bamwambijile amba: “Atweba twi baana ba kwa Abalahama kabiji tukyangye kwikalapo bazha ku muntu nangwa umo ne. Pano waamba byepi amba, ‘Bakemukasulula’?”

Nangwa kya kuba, Bayudea bebalamanga ku bangi, bantu bebamanyikanga kechi bebamonanga amba bankambo yabo ne. Bakaine kutelwa’mba bazha. Bino Yesu wibambijile amba bazha. Mu ñanyi jishinda? Yesu waambile’mba: “Kine nemwambila namba, Yense ulenga mambo ye muzha wa bundengamambo.”

Bayudea byo bakainenga amba kechi bazha ba bundengamambo ne, bebikilenga bene mu kizumba. Yesu walumbulwile’mba: “Muzha kechi utwajijila kwikala mu nzubo ya nkambo yanji ne; mwana ye wikalamo myaka.” Byo kyajinga kuba’mba muzha kechi wajinga na lūsa lwa kutambula bya buswanyi ne, bakonshanga kumupanga pa kimye kyonse. Kanatu mwana wasemwa nangwa ye bashinda ye waikalanga “myaka” mu nzubo, ko kuba’mba kimye kyonse kyo ajinga mumi.

Yesu watwajijile kwamba’mba: “Onkao mambo, inge Mwana wimukasulula, kine mukakasuluka.” Bukine bukasulula bantu ke bukine bwaamba pa Mwana aye Yesu Kilishitu. Kupichilatu mu kitapisho kya bumi bwanji bwalumbuluka, muntu mo mo akonsha kukasulukila ku bundengamambo ne lufu. Yoano 8:12-36.

▪ Kwepi kwafunjishenga Yesu pa juba ja butanu na bubiji? Ñanyi kintu kyamwekele bufuku konkakwa, kabiji kino kyakwatankene byepi na byafunjishenga Yesu?

▪ Yesu waambilepo amba ka pa bwikalo bwanji butanshi, kabiji kino kyasolwelepo ka pe aye?

▪ Mu ñanyi jishinda Bayudea mo baikajile bazha, bino ñanyi bukine bwafwainwe kwibakasulula?