Kitango 77

Bwipuzho pa Mambo a Bintu bya Buswanyi

BANTU bayukile’mba Yesu wajiilenga mu nzubo ya Mufaliseo. Onkao mambo, bantu bavula bakonkene pangye saka bapembelela amba Yesu alupuke. Aba bantu bamutelekelenga bingi, kupusanako na Bafaliseo bashikilwe Yesu kabiji bakebelenga kumukwata kupichila mu kumweseka’mba ambe kintu kyatama.

Yesu wakyambijile baana banji ba bwanga amba: “Saka mulaba ne kujimuka na mambo a mbizho ya Bafaliseo, ko kuba amba bukamfutumfutu.” Byonka byo baubile pa kuja kajo, bupopweshi bonse bwa Bafaliseo bwayujile na bukamfutumfutu. Nangwa kya kuba bubi bwa Bafaliseo bwafyamine na mambo a kwibepekezha koloka, bwaishile kusoloka palutwe kacheche. Yesu waambile’mba: “Kafwako kintu kyo bakafya pa nkonkoso kikabula kusololwa ne, kabiji kafwako kyafyamika kikabula kuyukanyikwa ne.”

Yesu wabwezhezhepo lutundaiko lo atundaikile batumwa 12 kimye kyo ebatumine na kusapwila mu Ngalilea. Waambile’mba: “Kange muchine aba bakonsha kwimwipaya ne, kabiji panyuma ya kuba kino kafwako kintu kikwabo kyo boba ne.” Byo kiji kuba’mba Lesa kechi ulubako kabwalula nangwa kamo ne, Yesu walayilenga baana banji ba bwanga amba Lesa kechi ukebavulama ne. Waambile’mba: “Byo bakemufikizha na kwimutotolwesha ku mvula bantu, . . . mupashi wazhila ukemubula byo mukamba pa kyonkakya kimye.”

Muntu umo mu jibumba wasashijile Yesu amba: “Mufunjishi, ambilai mulongo wami twabane nanji bya buswanyi.” Mizhilo ya Mosesa yaambile’mba mubeji wamulume wafwainwe kutambula lubaji lubiji lwa bya buswanyi. Onkao mambo, abo kechi bafwainwe kwitobosha ne. Bino kyamweka awa muntu wakebelenga byakila pa bya buswanyi byo afwainwe kutambula.

Yesu wakaine kwivwangamo. Wamushikishe’mba: “Obewa mukwetu, ñanyi wantongwele kwikala mutonyi nangwa wa kwimwabanya bipe anweba babiji?” Kepo ajimwine jibumba amba: “Labainga ne kuchinuzhuka lwiso lonse, mambo muntu nangwatu ekale na bintu byavula, bintu byo aji nabyo kechi byo bimulengela kwikala na bumi ne.” Muntu nangwa ekale na bintu byavula, ukafwa ne kwibisha byonse. Pa kukosesha kino kishinka ne butame buji mu kubula kwikala na bulunda bwawama ne Lesa, Yesu waelele kishimpi amba:

“Bujimi bwa muntu umo nonshi bwamenene bingi bulongo. Ponkapo walangulukile’mba, ‘Pano byo nabula pa kulonga kajo kami, nsakuba byepi?’ Waambile amba, ‘Nsakuba bino: Nsakushimukulula matala ami ne kushimika akatampe, kabiji mo mo nkalonga kajo kami konse ne bintu byami byonse byawama, ne kwamba amba: “Amiwa nji na bintu byavula byawama bya kuja pa myaka yavula; nsakukokolokangatu, kuja, kutoma ne kwiyowa.”’ Bino Lesa wamwambijile amba, ‘Obewa kilubi, buno bonka bufuku basakukwipaya. Pano nga abya byo walonga mu matala bikekala bya kwa ñanyi?’”

Yesu wapezhezheko amba: “Onkao mambo, byo biji ne muntu wibikila nsabo aye mwine bino saka abula kwikala nonshi kwi Lesa.” Nangwa kya kuba baana banji ba bwanga kechi bafwile mu kano kakose ka kukebesha bunonshi ne, bino na mambo a bintu bya pa juba pa juba bya mu bwikalo byakonsheshe kwibalengela kubula kwingijila Yehoba na mweo yense. Onkao mambo, Yesu waingijishe akya kimye kwamba jibiji pa lujimuno lwawama lo ebajimwineko mwaka umo ne kichika wapichilepo kimye kyo aambile Jashi ja pa Mutumba. Byo atajile ku baana banji ba bwanga, wibambijile’mba:

“Pa kyo kino nemwambila namba: Kubambisha michima na mambo a myeo yenu na byo mukaja nangwa na byo mukavwala ne. . . . Langulukai pa bikwangala. Abyo kechi bikusa nkunwa nangwa kunowa ne; kabiji kechi biji na matala ne. Bino Lesa wibijisha. . . . Langulukai pa maluba byo akoma; kechi engila mwingilo nangwa kwisonena kivwalo ne, pakuba amiwa nemwambila namba: Nangwatu Solomone mu lukumo lwanji lonse kechi wavwajile pamo nobe maluba ne. . . .

“Onkao mambo, kange mubambishenga michima na byo mukaja, byo mukatoma ne, kabiji kange mukizhengamo kwakamwa ne, mambo bino byonse byo bintu bikebesha bantu ba mu ntanda, pakuba Shenu wayuka amba mwibikeba bino bintu byonse. Nangwa byonkabyo, twajijilai na kukeba Bufumu ne bino bintu byonse bikemubikilwapo.”

Kimye kikatazha bintu, kyo kimye kya kulangulukishapo pa byambo bya kwa Yesu. Muntu ukizhamo kubambisha muchima na mambo a bintu bya ku mubiji, utatula kusankilapo bintu bya ku mupashi. Kuba bino kumwesha’mba muntu kechi waketekela’mba Lesa uji na bulume bwakunengezhezha bintu bakalume banji ne. Luka 12:1-31; Mpitulukilo ya mu mizhilo 21:17.

▪ Ñanyi kintu kyalengejile amba awa muntu ashikishe pa bya buswanyi, kabiji Yesu wajimwineko amba ka?

▪ Ñanyi kishimpi Yesu kyo aelele, kabiji kyalumbulwilenga ka?

▪ Ñanyi lujimo Yesu lo abwezhezhepo, kabiji mambo ka o lwafwanyijilwe?

Kitango 78

Inengezhezhai Jimo!

PANYUMA ya kujimunako jibumba pa mambo a lwiso ne baana banji ba bwanga pa mambo a kubula kukizhamo kutesha muchima ku bintu bya ku mubiji, Yesu wibatundaikile amba: “Kwakamwa ne, anweba kajitanga kacheche, mambo Shenu wimutongwejile kwimupa Bufumu.” Onkao mambo, Yesu wasolwele amba kibelengelo kya bantutu bacheche (kyaikele 144,000) bo bakekala mwiulu mu Bufumu. Bavula bakatambula bumi bwa myaka ne myaka, bakekala bangikazhi mu Bufumu pano pa ntanda.

“Bufumu” ke bupe bwawama bingi! Yesu byo alumbulwijile baana banji ba bwanga muchima ye bafwainwe kwikala nanji pa kwibutambula, wibakambizhe amba: “Poteshai bipe byo muji nabyo, ne kupana bya bupe.” Bafwainwe kwingijisha bintu byabo kukwashishamo bakwabo ku mupashi. Pa kuba kino, ko kuba’mba bebikijilenga “nsabo ibula kupwa mwiulu.”

Kabiji Yesu wajimwineko baana banji ba bwanga kwinengezhezha jimo kimye kyo akabwela. Waambile’mba: “Vwalai ne kwinengezhezha jimo ne kwambula malampi enu, kabiji mwikale pamo nobe banabalume bapembejilenga nkambo yabo kufuma ku masongola pa kuba amba byo asakufika ne kukonkonsha bamushinkwileko bukiji. Batokwa aba bakalume pa kwiya nkambo yabo bo akatana saka balaba! Kine nemwambila namba: Ukenengezha kuba amba engile ne kwikazha bonse ku tebulu, ne kwiya na kwibapa kajo.”

Mu kino kishimpi, kwinengezhezha jimo kwa bakalume pa kubwela kwa nkambo yabo kwamwekejile mu byo bapimpile mikangyo yabo ne kwiikasa mu bifuka byabo ne kutwajijila kwingila mingilo yabo bufuku saka baji na malampi aambuka ayujile manyi. Yesu walumbulwile’mba: ‘Umvwe nkambo wafika mu kilo kya bubiji [ko kuba’mba 9 koloko wa bufuku kufika pakachi ka bufuku] nangwa kya busatu, [ko kuba’mba pakachi ka bufuku kufika ku 3 koloko wa kumakya] wibatana saka balaba, batokwa!’

Nkambo yabo wafwetele bakalume banji mu jishinda ja kukumya. Wibambijile kwikala nanji ku tebulu ne kutatula kwibanengezhezha kajo. Kechi wibalaminenga nobe bakalume ne, bino bajinga balunda nanji bakishinka. Byo yajingapo mfweto yawama yafuminemo na mambo a kutwajijila kwingila mwingilo wa nkambo yabo bufuku bonse saka bamupembelela kubwela! Yesu wapezhezheko amba: “Ne anweba inengezhezhai jimo, mambo Mwana muntu ukeya pa kimye kyo mwabula kuketekela.”

Petelo washikishe’mba: “Nkambo, nanchi mubena kwambila atweba kino kishimpi nyi, inyi ku bantu bonse?”

Mu kifulo kya kumukumbula mu kushinkamika, Yesu waelele kishimpi kikwabo amba: “Ñanyi kalama wakishinka kabiji wa maana, Nkambo yanji ye akatongola kwikala mukulumpe wa jibumba ja bakalume banji kuba amba ebanengezhezhenga kajo kabo kawaina pa kimye kyafwainwa? Watokwa awa kalume umvwe Nkambo yanji pa kwiya wamutana na kuba bino! Kine nemwambila namba: Ukamutongola kwikala kalama wa bintu byanji byonse.”

“Nkambo” ke Yesu Kilishitu. “Kalama” wimenako “kajitanga kacheche” ka jibumba jonse ja baana ba bwanga, kabiji “jibumba ja bakalume” ke jibumba jintutu jimo ja ba 144,000 bakatambula Bufumu bwa mwiulu. Bino kino kyambo kimwesha mwingilo wabo pa muntu pa muntu. “Bintu” kalama wakishinka byo bamutongwela kulama ke bintu bya nkambo bya bufumu biji pano pa ntanda, byavwangamo ne bangikazhi ba mu Bufumu bakekala pano pa ntanda.

Byo atwajijile kwela kishimpi, Yesu waambile’mba kechi bonse ba mu jibumba ja kalama nangwa’mba kalume bakekala bakishinka ne. Walumbulwile amba: “Bino umvwe awa kalume watatula kwamba mu muchima wanji amba, ‘Nkambo yami wabanda kwiya,’ kabiji watatula kupuma bakalume bakwabo babalume ne babakazhi ne kuja, kutoma, ne kupendwa, Nkambo ya yewa kalume ukeya pa juba jo abula kuketekela . . . , bakamupuma bipumo byavula.”

Yesu wayukile’mba kwiya kwanji kwaambwile mujilo mu Bayudea, mambo bamo baswile byo afunjishenga pakuba bakwabo bakaine. Kukila pa myaka isatu yapichilepo, bamubatizhe mu mema, bino kubatizhiwa kwanji mu lufu kwajinga pepi kufika kabiji waambile’mba: “Muchima ubena kunkatazha bingi poso lukapite!”

Panyuma ya kwamba bino byambo ku baana banji ba bwanga, Yesu waambile jibiji ku jibumba. Wibomvwijile bulanda na mambo a kukosa michima kwabo kwa kubula kuswa kishiino kyamwesheshenga amba ye iye ne buneme bwakyo. Waambile’mba: “Umvwe mwamona jikumbi ku muzhika ponkapo mwamba amba, ‘Mvula usakunoka,’ kabiji kikala byonkabyo. Kabiji umvwe mwamona luvula ubena kupupa kufuma ku kabeta ka ku bulenge, mwamba amba, ‘Kusakuba kyuya,’ kabiji kikala byonkabyo. Anweba bakamfutumfutu, mwayuka kulumbulula bimweka ntanda ne jiulu, pano mambo ka o mukankelwa kuyuka mwatala bibena kumweka pa kino kimye?” Luka 12:32-59.

▪ Bantu banga balenga “kajitanga kacheche,” kabiji ñanyi kintu kyo batambula?

▪ Yesu waambishepo byepi pa buneme bwa kwinengezhezha jimo kwa bakalume banji?

▪ Mu kishimpi kya kwa Yesu, bañanyi bemenwako na “nkambo,” “kalama,” “jibumba ja bakalume,” ne “bintu”?