Kitango 89

Mwingilo wa Lusa ye Aingijile mu Yudea

KIMYE kya Kijiilo kya Kuzhijika Nzubo ya Lesa, Bayudea bakebele kwipaya Yesu. Onkao mambo, wayile ku mpunzha yajinga ku kabeta ka buyeke yajinga ku bwipi na Kalunga ka Ngalilea.

Papichiletu moba acheche, wayile jibiji ja ku kabeta ka ku bulenge ku Yelusalema saka asapwila mu mizhi ya mu Pelia, kibunji kyajinga ku musela wa Mukola wa Yodano. Panyuma ya kwela kishimpi kya muntu nonshi ne Lazalasa, watwajijile kufunjisha baana banji ba bwanga bintu byo afunjishe kimye kyo ajinga mu Ngalilea.

Kyakumwenako waambile’mba, kyafwainwe muntu “umvwe jibwe jikatampe ja kupelelako bamukashilajo mu nshingo ne kumwibizha pa kalunga ka mema” kukila kutuntwisha muntu wa Lesa uji nobe “bano bacheche.” Kabiji waambishepo pa buneme bwa kwilekelako mambo byo alumbulwile’mba: “Nangwa kya kuba [mulongo wenu] wimulenga mambo bimye bitanu na bibiji pa juba, ne aye wabwela kwi anweba bimye bitanu na bibiji amba, ‘Nalapila,’ mwafwainwa kumulekelako mambo.”

Baana banji ba bwanga byo bamulombele amba, “vuzhai lwitabilo lwetu,” Yesu wibakumbwile’mba: “Umvwe muji na lwitabilo nobe luchacha wa masitate, mukambila kikye kichi kya malubenyi amba, “Jimbuka ne kujimbwa mu kalunga ka mema!’ ne akyo kikemukokela.” Onkao mambo, nangwatu lwitabilo lucheche lwakonsha kulengela kuba bintu bikatampe.

Yesu wibashimikizhe kintu kya kine kimweka kusolwelamo byubilo byafwainwa kwikala na kalume wa Lesa wabulume bonse. Yesu waambile’mba: “Ñanyi pe anweba uji na kalume ubena kujima mu bujimi nangwa kufunga jitanga ja mikooko umwambila inge wabwela kufuma ku bujimi amba, ‘Iya kuno wikale ne kuja ku tebulu’? Pakuba umwambila amba, ‘Vwala kisapi unnengezhezhe kajo kamulajilo ne kumpa poso mpwishe kuja ne kutoma; apa bino ne obewa uje ne kutoma.’ Uno kalume kechi ukamusanchila ne, mambo waingila mingilo yanji. Byonkabyo, ne anweba umvwe mwapwisha kwingila byonse byo bemupa, ambai amba, ‘Atweba twi bakalumetu. Twauba kyonka kyo twafwainwa kuba.’” Onkao mambo, bakalume ba Lesa kechi bafwainwa kulangulukanga’mba babena kukwasha Lesa kupichila mu kumwingijila ne. Bino bafwainwa kuvulukanga kimye kyonse mwingilo ye baji nanji wa kumupopwela byo baji ba mu nzubo yanji bo aketekela.

Kyamweka Yesu aku upwishatu kwela kino kishimpi, muluwe wafikile. Maliya ne Mata banyenga ya kwa Lazalasa baikalanga ku Betani wa mu Yudea, bo bamutumine. Awa muluwe waambile’mba: “Nkambo, awa ye mwatemwa, wakolwa.”

Yesu waambile amba: “Kino kikola kechi kya lufu ne, bino kyo kya lukumo lwa Lesa, kuba amba Mwana Lesa atumbijikilwemo.” Byo aikeleko moba abiji, Yesu waambijile baana banji ba bwanga amba: “Twayai tubwele jibiji ku Yudea.” Nangwa byonkabyo, baana banji ba bwanga bamushikishe’mba: “Mufunjishi, katatakatu papo Bayudea basakile kwimwasa mabwe, kabiji mukeba kubwelako jibiji nyi?”

Yesu wibakumbwile’mba: “Nanchi kechi muji na maola jikumi na abiji a mute nenyi? Umvwe muntu waenda mu mute kechi uketuntula ku kintu nangwa kimo ne, mambo ubena kumona kyeya kya ba pano pa ntanda. Bino umvwe muntu waenda bufuku, uketuntula mu kintu, mambo ufwakyo kyeya.”

Kyamweka Yesu walumbulwilenga amba “maola a mute” nangwa’mba kimye Lesa kyo apele Yesu kya kwingijilamo mwingilo wanji pano pa ntanda kyajinga kikyangye kufika kabiji kafwako nangwa umo wakonsheshe kumuba kyatama ne. Wafwainwe kwingijisha bulongo kimye kicheche kyo ashajile nakyo kya “mute” mambo palutwe kacheche “bufuku” bwafikile kimye balwanyi banji kyo bamwipayijilemo.

Yesu wanungilepo amba: “Lazalasa mulunda nami, walaala tulo, bino mbena kuya na kumubusha.”

Baana banji ba bwanga byo balangulukilenga amba Lazalasa walaala tulo kabiji amba usakukosa baambile’mba: “Nkambo, umvwe walaala tulo, ko kuba amba usakubukwa.”

Kepo Yesu ebambijile kipasu amba: “Lazalasa wafwa, ne amiwa nasekela bingi kuba amba kechi najingako ne, pa kuba amba anweba mwitabile. Bino twayai tuye koaji.”

Tomase byo ayukile’mba Yesu basakile kumwipaya mu Yudea, ne byo akebeshe kumukwasha, watundaikile bakwabo baana ba bwanga amba: “Ne atweba twayai tuyeko, kuba amba tukafwile nanji pamo.” Onkao mambo, byo babikile bumi bwabo mu kizumba, baana ba bwanga bashinjikinyeko Yesu ku uno mwingilo wa lusa ye aingijile mu Yudea. Luka 13:22; 17:1-10; Yoano 10:22, 31, 40-42; 11:1-16.

▪ Kwepi Yesu ko asapwijilenga?

▪ Ñanyi mafunjisho Yesu o abwezhezhepo, kabiji ñanyi kintu kya kine kimweka kyo aingijishe kabiji kyalumbulwilenga ka?

▪ Ñanyi sawakya Yesu ye atambwijile, kabiji watazhizhe mu ka byo aambile pa “mute” ne “bufuku”?

▪ Tomase watazhizhe mu ka byo aambile’mba, ‘Twayai tukafwile nanji pamo’?

Kitango 90

Luketekelo lwa Lusanguko

YESU wafikile kwipi na Betani, muzhi wajinga kwipi na Yelusalema pajinga makilomita pepi na asatu. Papichiletu moba acheche kufuma pafwijile Lazalasa ne kuzhikwa kwanji. Banyenga yanji ba Maliya ne Mata bajinga na bulanda kabiji bavula baishile ku nzubo yabo na kwibatekenesha.

Byo bakijijilenga, muntu umo wabujile Mata amba Yesu ubena kwiya. Onkao mambo, wamutundaijile kabiji kyamweka kechi wabujile nkasanji ne. Mata byo afikile kwi Yesu, wamubujile kampe byo besambilengapo na nkasanji pa moba ana amba: “Umvwe mwajinga kuno, bayaya inge kechi bafwa ne.”

Nangwa byonkabyo, Mata wamwesheshe luketekelo byo aambile’mba Yesu wakonsha kubapo kimo pa kolojanji. Waambile’mba: “Nayuka namba byonse byo musakulomba kwi Lesa, usakwimupabyo.”

Yesu wamubujile’mba: “Kolojobe usakusanguka.”

Mata walangulukilenga’mba Yesu waambilenga pa lusanguko lwa kulutwe lukobiwa pano pa ntanda, lwatengejilenga Abalahama ne bakalume bakwabo ba Lesa. Onkao mambo, Mata wakumbwile’mba: “Nayuka namba ukasanguka mu juba jikapelako.”

Pano bino, Yesu wamulengejile kwikala na luketekelo kabiji wamutekeneshe’mba: “Amiwa yami lusanguko ne bumi.” Wavulwilemo Mata amba Lesa wamupa bulume bwa kushinda lufu amba: “Awa wangitabila, nangwa wafwa, ukasanguka. Kabiji yense uji na bumi ne kungitabila kechi ukafwa ne.”

Yesu kechi wabujilenga Mata amba bantu bakishinka bakiji na bumi kechi bakafwa ne. Pano bino, kishinka kyo aambilengapo ke kya kuba’mba awa yense wamwitabila ukekala na bumi bwa myaka ne myaka. Buno bumi bukeyowa kikatakata bantu bakasangulwa mu juba jikapelako. Pakuba bakwabo bakishinka bakapuluka mpelo ya buno bwikalo bwa ino ntanda kabiji byambo byaambile Yesu bikekala bya kine ku bano. Bano kechi bakafwa jibiji ne! Yesu byo aambile bino byambo bitekenesha, washikishe Mata amba: “Nanchi waitabila kino nyi?”

Aye wakumbwile’mba: “Ee, Nkambo; amiwa naitabila kuba amba yenu Kilishitu Mwana Lesa, Lesa ye aambile amba ukeya pano pa ntanda.”

Mata wafumineko ne kuya na kubula nkasanji ku mbaji amba: “Mufunjishi waiya kabiji ubena kukwita.” Ponkapotu Maliya walupukilemo mu nzubo. Bakwabo byo bamumwene na kuya, bamulondejile mambo balangulukilenga amba waya ku kilende.

Maliya byo afikile kwi Yesu wafukamine saka ajila. Waambile’mba: “Nkambo, umvwe mwajinga kuno, bayaya inge kechi bafwa ne.” Yesu waumvwine bingi bulanda byo amwene Maliya ne bantu bavula bamulondejilenga saka bajila. Washikishe’mba: “Nanchi mwa muzhika kwepi?”

Abo bakumbwile’mba: “Nkambo, twayai mukamone.”

Yesu naye wajijile ne mipolo, kino kyalengejile Bayudea kwamba’mba: “Akitalai byo amutemenwe!”

Bamo nabo bavulukile’mba Yesu pa juba ja Kijiilo kya Tente wa Lusambakeno wabukile muntu wasemekelwe saka aji mpofu kabiji bashikishe’mba: “Nanchi uno muntu walabishe meso a yewa muntu wajinga mpofu, kechi wafwainwe kuzhikijila uno muntu kubula kufwa nenyi?” Yoano 5:21; 6:40; 9:1-7; 11:17-37.

▪ Ñanyi kimye kyafikile Yesu kwipi na Betani, kabiji bintu byajinga byepi kokwa?

▪ Ñanyi kintu kyalengejile Mata kwikala na luketekelo mu lusanguko?

▪ Yesu waumvwine byepi ku muchima pa lufu lwa kwa Lazalasa?