Kitango 91

Kimye Lazalasa kyo Bamusangwile

YESU pamo na bo ayilenga nabo bafikile ku kilende ko bazhikile Lazalasa. Kino kilende kyajinga mu jiyengo ko babikile jibwe. Yesu waambile’mba: “Jalumunaiko jibwe.”

Mata byo abujile kuyuka byakebelenga Yesu kuba, wamukainye. Waambile’mba: “Nkambo, pa kino kimye wafwainwa ubena kununka, mambo ke moba ana.”

Bino Yesu wamushikishe’mba: “Nanchi kechi naji kukubula namba umvwe waitabila usakumona lukumo lwa Lesa nenyi?”

Onkao mambo, baalumwineko jibwe. Kepo Yesu atajile mwiulu ne kulomba amba: “Tata, nemusanchila bingi pa kuñumvwa. Nayuka namba, kimye kyonse muñumvwa; pakuba naamba bino na mambo a jino jibumba jaimana pano, namba betabile amba mwantumine.” Yesu walombele pa mvula bantu kuba’mba bayuke amba kintu kyo akeba kuba usakwikyuba na mambo a bulume bwa Lesa. Kepo abijikile’mba: “Lazalasa, lupukamo!”

Ponkapo Lazalasa walupukilemo saka aji na bisapi byo bamupombakenye ku maulu ne ku maboko ne pa meso bakashilepo bisapi. Yesu wibambijile’mba: “Mupombololai ayenga.”

Bayudea bavula baishile na kutekenesha Maliya ne Mata byo bamwene kino kya kukumya, bamwitabijile Yesu. Nangwa byonkabyo, bamo bayile na kubula Bafaliseo kintu kyamwekele. Ponkapo Bafaliseo ne bañanga bakatampe bakonkenejile pamo mu kije kikatampe kya Bayudea, kyatelwanga’mba Saniedilini.

Mu kino kije mwajinga ñanga mwine mukatampe aye Kaifasa, Bafaliseo, Basadusea, bañanga bakatampe ne bajinga kala bañanga bene bakatampe. Bano baambile’mba: “Tusakuba byepi, mambo uno muntu ubena kuba bya kukumya byavula? Umvwe tumuleke, bantu bonse basakumwitabila kabiji bena Loma bakeya ne kwitwangata mpunzha ne kisaka kyetu.”

Nangwa kya kuba bantangi ba bupopweshi baswile amba ‘waubile bya kukumya byavula,’ kintu kyo baakaminweko kyajinga bifulo byabo ne lūsa lo bajinga nalo. Basadusea kibashinkishe bingi bulaka Lazalasa byo asangwilwe mambo kechi baitabijile mu lusanguko ne.

Kaifasa, kampe wajinga Musadusea waambile’mba: “Anweba kafwako nangwa kimo kyo mwayuka ne, kabiji kechi mwayuka amba kyawama muntu umo kufwila bantu kukila kisaka kyonse konaika ne.”

Lesa ye walengejile Kaifasa kwamba bino, mambo mutumwa Yoano wanembele’mba: “Kino [Kaifasa] kechi wikyambile na milanguluko yanji mwine ne.” Kaifasa walumbulwilenga amba Yesu bakamwipaya kuba’mba akabule kulubankanya bifulo byabo ne lūsa lo bajinga nalo. Pano bino, kwesakana na byaambile Yoano, ‘Kaifasa waawile kuba’mba Yesu kechi ukafwilatu kisaka kyonka ne, bino ne kuba’mba ukakonkenya pamo baana ba Lesa.’ Kabiji kyajinga kyaswa muchima wa Lesa amba Mwananji afwe kuba’mba akuule bantu bonse.

Kaifasa walengejile ba mu Kije Kikatampe kukebapo mashinda mwa kwipayila Yesu. Bino Yesu byo bamubujile kwi Nikodema wa mu Kije Kikatampe wamutemenwe kintu kyo bakebelenga kumuba, wafumineko. Yoano 11:38-54.

▪ Mambo ka Yesu o alombejile pa mvula bantu saka akyangye kusangula Lazalasa?

▪ Bantu bamweneko byasangukile Lazalasa baubilepo byepi?

▪ Ñanyi kintu kyasolwele bubi bwa ba mu Kije Kikatampe?

▪ Ñanyi kintu kyakebelenga Kaifasa, bino Lesa wamulengejile kwaula ka?

Kitango 92

Yesu Wabukile Bambumba 10 pa Kubwela Japeleleko ku Yelusalema

YESU wavulañenye byakebelenga kumuba Kije Kikatampe kuba’mba bamwipaye kupichila mu kufumako ku Yelusalema ne kuya ku muzhi wa Efelaimu, kampe palepele makilomita 24 nangwa kukilapo ku kabeta ka buyeke musela bwa Yelusalema. Akwa ko ko aikele na baana banji ba bwanga, kwalepele na balwanyi banji.

Nangwa byonkabyo, Kijiilo kya Lupitailo mu 33 C.E. kyajinga pepi kabiji Yesu waimene lwendo. Wapichile mu Samaliya kukafika ne ku Ngalilea. Kino kyajinga kimye kyapeleleko kufwakesha yoya nyaunda lufu lwanji saka lukyangye kufika. Byo akijinga mu Ngalilea, aye ne baana banji ba bwanga bayijilenga pamo na bakwabo bayilenga ku Kijiilo kya Lupitailo. Bapichile mu jishinda japichijile mu kibunji kya Pelia ku musela wa Mukola wa Yodano.

Byo bakiyilenga, Yesu watwelele mu muzhi wa mu Samaliya nangwa wa mu Ngalilea mo bamusambakene ku banabalume jikumi bajinga na mbumba. Kino kikola kyatama bingi mambo kija pachepache binungwa bya mubiji wa muntu, ko kuba’mba minwe, mana, matwi, mona ne mivumbo. Pa kuba’mba bantu bakwabo babule kusambula kino kikola, Mizhilo ya Lesa yakambizhe muntu wa mbumba amba: “Akavwetepo pa muvumbo wanji wa kwiulu ne kubijika’mba: Ne wa muzhilo, ne wa muzhilo! Moba onse o akekala na mwalo ukekala ke wa muzhilo; . . . akekalenga bunke bwanji.”

Bambumba jikumi balaminenga yoya Mizhilo kabiji baimene kwalepa na kwajinga Yesu. Pano bino babijikile’mba: “Anweba Yesu, Mufunjishi, tubilai lusa!”

Yesu byo ebamwene palepa byobya, wibakambizhe’mba: “Yainga mukemweshe anwe bene ku bañanga.” Yesu waambile bino mambo Mizhilo ya Lesa yaswishishe bañanga kwambila bantu bambumba bapwile bikola byabo amba babukwa. Mu jino jishinda bebaswishanga kwikala jibiji pamo na bantu babujile mbumba.

Aba bambumba jikumi baketekejile mu bulume bwa kwa Yesu bwa kuba bya kukumya. Onkao mambo, bayile na kumona bañanga nangwa kya kuba kechi bakibukilwe ne. Byo bayilenga, bafwetelwe na mambo a kwitabila Yesu. Batatwile kumona ne kumvwa amba bakosa.

Bambumba batanu na bana batwajijile kuya, bino umo wajinga na mbumba aye mwina Samaliya wabwelele na kukeba Yesu. Mambo ka? Mambo watemenwe bingi pa kintu kyamumwekejile. Watumbijikilenga Lesa na jiwi jasansuka kabiji byo ataine Yesu wafukamine ku maulu anji ne kumusanchila.

Yesu washikishe’mba: “Nanchi kechi bantu jikumi baji kubukwa nenyi? Pano nga bakwabo batanu na bana baji pi? Kafwako muntu nangwa umo wabwela kuno na kutumbijika Lesa ne, kana uno muntu wa mu kisaka kingi.”

Kepo aambijile mwina Samaliya amba: “Imana uyenga; lwitabilo lobe lwa kulengela kubukwa.”

Byo tutanga pa bambumba jikumi Yesu bo abukile, twafwainwa kuyuka lufunjisho luji mu bwipuzho bo aipwizhe amba: “Pano nga bakwabo batanu na bana baji pi?” Muchima wa kubula kusanta wamwesheshe aba batanu na bana, kyajinga kilubo kikatampe bingi. Nanchi ne atweba byonka byajinga mwina Samaliya, tumwesha lusanchilo pa bintu bitubila Lesa kuvwangakotu ne mulaye wa kukekala na bumi bwa myaka ne myaka mu ntanda ipya ya Lesa ya bololoke nyi? Yoano 11:54, 55; Luka 17:11-19; Bena Levi 13:16, 17, 45, 46; Lumwekesho 21:3, 4.

▪ Yesu wavulañenye byepi byo bakebelenga kumuba amba bamwipaye?

▪ Yesu wapichile jepi, kabiji wayilenga pi?

▪ Mambo ka bambumba o baimenejile palepa, kabiji mambo ka Yesu o ebambijile kuya ku bañanga?

▪ Ñanyi lufunjisho lo twakonsha kufunjilako ku kyokya kyamwekele?