Kutemwa Kilishitu ko Kwitulengela Kwikala na Butemwe
1 Yesu witushijile kyakumwenako kyawama kya butemwe. Kyakumwenako kyanji kya kumwesha butemwe kyalengela baana banji ba bwanga nabo kutwajijila kubanga byonkabyo.—Loma 8:35.
2 Bakamonyi ba kwa Yehoba bayukanyikilwa ku kumwesha butemwe bwa Kilishitu. Akimonai balongo byo bepaine kukwasha bakwabo kimye kyo kwajinga mvula mukatampe mu kyalo kya United States mu 2005. Bantu kukila pa 20,000 bepaine kukwasha balongo babo.
3 Mu mpunzha imo, mwela mukatampe wasendele mema aimene mulumbulumbu mamita 10 kukafika pa mpunzha palepa makilomita 80. Panyuma ya kuma mema mazubo avula ne bishimikwa bikwabo byakundaukile. Bakamonyi bavula bayuka mingilo kufuma mu byalo byapusana pusana bepaine kuya na kushimika, kutuma byela ne bintu bya kwingijisha pa kushimika kabiji bepainenga kwingila mingilo iji yonse. Byo kyaikalapo kyakumwenako kyawama kya kumwesha muchima wa Kilishitu!
4 Atweba bamo twakipitapo kala mu bya malwa. Nangwa byonkabyo, atweba bonse twikala na lukatazho lwa butuntulu bwa mubiji, kubela atweba bene nangwa wa mu kisemi. Na mambo a kutemwa bantu, Yesu waumvwine lusa kimye mabumba a bantu kyo baletelenga bantu bakolwa kabiji “wabukile bonse bajinga na bikola.”—Mat. 8:16; 14:14.
5 Ne atweba tumvwina bantu lusa byonka byajinga Yesu. Akilangulukai pe Charlene wa myaka ya kusemwa 44 wajinga na kikola kya kabe kabiji bamwambijile amba kwashalatu moba jikumi kufwa. Banyenga babiji ba Sharon ne Nicolette bengila mwingilo wa kimye kyonse, bepaine kuya na kumutundaika mu oa moba anji akupelako. Kino kyalengejile uno mulwazhi kwikala milungu 6. Ba Sharon baambile amba “Kyakatazha bingi kukwasha muntu ye wayuka kuba’mba kechi ukakosa ne.” “Nangwa byonkabyo, Yehoba witukwashishe kuchinchika. Kino kyamwekele kitulengejile kufwenya kwipi ne aye ne kukwatankana.” Bena kwabo ba Charlene baambile amba: “kimye kyonse mvuluka butemwe bwamwesheshe bano banyenga babiji. Byubilo byabo byawama byandengejile kuchinchika luno lukatazho. Nkatwajijila na kwibasanchila myaka ne myaka. Kwipana kwabo kwakoseshe lwitabilo lwami mwi Yehoba ne kwikala na butemwe bwa kutemwa balongo ba ntanda yonse.”
6 Nanchi mwakonsha kumwesha butemwe bwa kine ku balongo benu mu kipwilo nyi? Twayai tumweshenga butemwe bwa Kilishitu bwa kutemwa balongo betu byonka byaubile Yesu “kufika ne ku mpelo.” Butemwe bwa uno mutundu bwituyukanyikisha kuba’mba twi baana bwanga ba kwa Yesu.—Yoa. 13:1, 34, 35.
1. Kyakumwenako kya kwa Yesu kitulengela kuba ka?
2, 3. Byubilo bya mutundu ka bimwesha Bakamonyi ba kwa Yehoba mu nyaunda mobekala?
4, 5. Ki ka kiketulengela kwipana kukwasha bakwetu?
6. Ba ñanyi bo twafwainwa kuta maana?