Kitango 103

Wabwelele Jibiji mu Nzubo ya Lesa

YESU ne baana banji ba bwanga po po bapwishishetu moba asatu mu Betani byo bafumine ku Yeliko. Pa Kimo Nisanyi 10, bwibakijile saka baji pa lwendo lwa kuya ku Yelusalema. Yesu wafwile nzala. Onkao mambo, wamwene kichi kya mukuyu kyajinga na mabula kabiji wayileko amba amone umvwe usakutanako makuyu.

Mabula asapukile bukiji ku kichi mambo kimye kya June kyo kipilamo makuyu kechi mu March ne. Nangwa byonkabyo, Yesu wamwene amba kichi byo kyasapuka mabula bukiji ne makuyu nao afwainwa kwikalako. Bino kechi wiataineko ne. Mabula alengejile kichi kumweka nobe kiji na makuyu. Kepo Yesu ekifingile amba: “Kafwako nangwa umo ukajako bipangwa kwi obewa myaka ne myaka ne.” Byaubile Yesu ne buneme byabyo byayukanyikilwe juba jalondejilepo.

Yesu ne baana banji ba bwanga bafikile mu Yelusalema. Watwelele mu nzubo ya Lesa mo apikichile pa Mulungu mute. Nangwa byonkabyo, pa Kimo waubile kintutu kimo kyo aubilepo myaka isatu yapichilepo byo aishile ku Kijiilo kya Lupitailo mu 30 C.E. Yesu wapangilemo bonse bapoteshenga ne bapotelenga mu nzubo ya Lesa kabiji wapinwine matebulu a bapimpwijilengapo mali ne bipona bya bapoteshenga bankunda. Kabiji kechi waswishishepo muntu nangwa umo kusenda bintu ne kukilañenya mu nzubo ya Lesa ne.

Byo akajipijile aba bapimpwilenga mali ne kupotesha banyama mu nzubo ya Lesa, waambile’mba: “Nanchi binembelo kechi byaamba amba: ‘Nzubo yami ikatelwa amba nzubo ya milombelo ya bantu bonse’ nenyi? Pakuba anweba mwiyalula ke jiyengo ja tupondo.” Bajinga batupondo mambo balipilishanga mali avula aba babujile kwakutana banyama, bino bebakambizhenga kupota kwi abo banyama bakulambula. Onkao mambo, Yesu wamwene buno busulu amba kuja bya lunkanankana ne bukapondo.

Bañanga bakatampe, banembeshi ne bakulumpe byo baumvwine kintu kyaubile Yesu, bakebele jibiji mashinda a kumwipayilamo. Kino kyamwesheshe amba kechi bakonsheshe kupimpula byubilo byabo ne. Pano bino, kechi bataine jishinda jawama ja kumwipayilamo ne, mambo bantu bonse bamutelekelenga bingi.

Kununga pa Bayudea bakisemwa, bantu ba mu bisaka bikwabo nabo baishile ku Kijiilo kya Lupitailo. Bano bantu baalukile ke Bayudea, kibena kulumbulula kuba’mba bebalwile kwikala mu bupopweshi bwa Bayudea. Bangiliki bamo baalukile ke Bayudea basolomokele Filipa ne kumulomba amba bakeba kumona Yesu. Filipa wayile kwi Andeleo na kumwipuzha umvwe kyafwainwe kuba’mba bamone Yesu. Kyamweka Yesu wakijinga pa nzubo ya Lesa, Bangiliki po bafwainwe kumumona.

Yesu wayukile amba washalatu na moba acheche a bwikalo bwanji. Onkao mambo, walumbulwile bwikalo bwanji amba: “Kimye kyafika kya kuba amba Mwana muntu atumbijikwe. Kine nemwambila namba, Umvwe lukunwa wa wichi waponena panshi ne kufwa ne, wikalatu lukunwa umo, pakuba umvwe wafwa, upanga bipangwa byavula.”

Lukunwa wa wichi wakepa bingi. Bino, ki ka kimweka umvwe bamubyala mu mushiji ne “kufwa”? Umena kabiji mu kuya kwa kimye ukoma ne kupanga nkunwa yavula ya wichi. Kyo kimotu ne Yesu wajinga walumbuluka. Bino byo afwile na bukishinka kwi Lesa waikele ke upana bumi bwa myaka ne myaka ku bantu bakishinka baji na muchima wa kwipana byonka byo ajinga. Onkao mambo, Yesu waambile’mba: “Awa watemwa mweo wanji ukamwela, pakuba awa washikwa mweo wanji pano pa ntanda ukamulama ne kwikala na bumi bwa myaka.”

Yesu kechi walangulukilengatu pe aye mwine ne, mambo walumbulwile amba: “Umvwe muntu ukeba kuñingijila amiwa, andondelenga kabiji akwa konji ne wamwingilo wami ko ko akekala. Kabiji umvwe muntu ukeba kuñingijila, Batata bakamunemeka.” Mu kulondela Yesu ne kumwingijila muji mfweto ikatampe bingi! Ino mfweto ke ya kunemekwa kwi Shanji ya kukekala pamo ne Kilishitu mu Bufumu.

Yesu byo alangulukilenga pa lumanamo ne lufu lwatama lwamupembelejilenga, waambile’mba: “Muchima wami wankatazha bingi, nanchi nsakwamba amba ka? Tata, mpulushai ku kino kimye.” Akya kyo apembelejilenga, nanchi inge wikichinuzhukile! Pano ne. Waambile’mba: “O ene mambo o naishila ku kino kimye.” Yesu waswile lunengezho lwa Lesa lonse kuvwangakotu ne lufu lwa bukitapisho. Mateo 21:12, 13, 18, 19; Mako 11:12-18; Luka 19:45-48; Yoano 12:20-27.

▪ Mambo ka Yesu o aketekejile kutana makuyu nangwa kya kuba kechi kyajinga kimye kyo apilamo ne?

▪ Mambo ka Yesu o atelejile aba bapoteshenga mu nzubo ya Lesa amba “tupondo”?

▪ Mu ñanyi jishinda Yesu mo aikela nobe lukunwa wa wichi ufwa?

▪ Yesu waumvwine byepi ku muchima pa lumanamo ne lufu lwamupembelejilenga?

Kitango 104

Jiwi ja Lesa Jaumvwanyikile Kimye kya Busatu

YESU byo akijinga mu nzubo ya Lesa, muchima wamukatezhenga bingi na mambo a lufu lo ajinga pepi kufwa. Watele bingi muchima pa bikekala jizhina ja Shanji. Onkao mambo, walombele amba: “Tata tumbijikai jizhina jenu.”

Ponkapo, jiwi ja bulume jafumine mwiulu amba: “Amiwa ne jitumbijika kabiji nkejitumbijika jibiji.”

Jibumba jaimene nanji jakankamenetu. Bamo baambilenga amba: “Malaika ye waamba nanji.” Bakwabo nabo amba mvula waluluma. Bino Yehoba Lesa ye waambile. Nangwa byonkabyo, kino kechi kyo kyajinga kimye kitanshi jiwi ja Lesa kumvwanyika pa mambo a kwa Yesu ne.

Kimye Yesu kyo abatizhiwe, Yoano Mubatizhi waumvwine Lesa saka amba pe Yesu amba: “Uno ye Mwanami ye natemwa, mo namwena lusekelo.” Kabiji panyuma ya Kijiilo kya Lupitailo, kimye Yesu kyo aalukile, ba Yakoba, Yoano ne Petelo baumvwine Lesa saka amba’mba: “Uno ye Mwanami ye natemwa, mo namwena lusekelo, mumvwinai.” Pano pa kikye kimye pa Nisanyi 10, saka kwakishala moba ana kuba’mba Yesu afwe, bantu baumvwine jikwabo jiwi ja Lesa, kino kyo kyajinga kimye kya busatu. Yehoba waubile bino kuba’mba bantu bonse bomvwe.

Yesu walumbulwile amba: “Jino jiwi jaumvwanyika kechi na mambo a amiwa ne, bino na mambo a anweba.” Jino jiwi jamwesheshe amba Yesu kine Mwana Lesa kabiji ye Mesiasa walayilwe. Yesu watwajijile kwamba’mba: “Lesa ubena kwipazhachisha pano pa ntanda kabiji ukamupangapo mfumu wa pano pa ntanda.” Bwikalo bwa kwa Yesu bwa bukishinka bwamwesheshe amba Satana Diabola mfumu wa pano pa ntanda bafwainwa ‘kumupangapo,’ ko kuba’mba kumwipaya.

Yesu byo atongwele bintu bikafumamo mu lufu lwanji, waambile’mba: “Kabiji umvwe amiwa bakañimike pa kichi, nkakokela bantu bapusana pusana konji.” Lufu lwanji kechi lwalumbulwilenga amba bamushinda ne, mambo kupichila mu luno lufu ukakokela bantu kwi aye mwine kuba’mba bakekale na bumi bwa myaka ne myaka.

Bino jibumba jaambile amba: “Twaumvwine mu Mizhilo kuba amba Kilishitu ukekala myaka; pano obewa ubena kwamba byepi kuba amba Mwana muntu bakamwimika pa kichi? Nanchi uno Mwana muntu ye ñanyi?”

Nangwa kya kuba bantu bamwene biyukilo byavula kuvwangakotu ne kumvwa jiwi ja Lesa kechi baitabijile amba Yesu Mwana muntu wakine kabiji ye Mesiasa walayilwe ne. Nangwa byonkabyo, byonka byo aubile pa Kijiilo kya Tente wa Lusambakeno bañondo batanu na umo bapichilepo, Yesu waambile jibiji pe aye mwine amba ye “kyeya” kabiji watundaikile bamutelekelenga amba: “Byo mukiji na kyeya, ikalai na lwitabilo mu kyeya kuba amba mwikale baana ba kyeya.” Panyuma ya kwamba bino byambo, Yesu wafumineko ne kufyama mambo bumi bwanji bwajinga mu kizumba.

Bayudea byo bakankelwe kwitabila Yesu bafikizhe byambo bya kwa Isaya bya kuba’mba ‘meso a bantu apofuka ne michima yabo yakosa kuba’mba babule kwaluluka amba babukwe.’ Isaya wamwene mu kimwesho kipango kya mwiulu kya Yehoba kumvwangakotu ne Yesu mu lukumo saka akyangye kwiya pano pa ntanda saaji pamo ne Yehoba. Pano bino, mu kufikizha byanembele Isaya, Bayudea bakosele michima ne kukana kiyukilo kyamwesheshenga amba Yesu ye yewa walayilwe kwikala Mupokolweshi wabo.

Nangwa byonkabyo, bantangi bavula (ba mu kije kikatampe kya Bayudea kya Saniedilini) bamwitabijile Yesu. Nikodema ne Yosefwa wa ku Alimatea bo bamo bajinga pa boba bantangi. Bino bano bantangi pa kyokya kimye, kechi bamwesheshe amba bamwitabila ne, mambo bachiinenga kwibapanga pa bifulo byabo mu nshinagoga. Bano bantu kine bashajilepo pa byavula.

Yesu watwajijile kwamba’mba: “Awa wangitabila amiwa, kechi waitabilatu amiwa yenka ne, bino waitabila ne yewa wantumine; kabiji awa wammona, wamona ne yewa wantumine. . . . Bino umvwe muntu waumvwa byambo byami ne kwibilama ne, kechi na muzhachisha ne; mambo amiwa kechi naishile na kuzhachisha ba pano pa ntanda ne, kana kwibapulusha. . . . Byambo byo ñamba byo bikamuzhachisha mu juba jikapelako.”

Butemwe bwa Yehoba pa bantu bo bwamulengejile kutuma Yesu kuba’mba aba bakamwitabila bakapuluke. Bantu bakapulukatu umvwe bakokela bintu Lesa byo akambizhe Yesu kwamba. Kuchibilwa mambo kukobiwa “mu juba jikapelako” ko kuba’mba kimye Kilishitu kyo akalama Myaka Kiumbi.

Yesu wapezhezheko amba: “Kechi ñamba milanguluko yami ne, bino Batata bantumine bo bankambizhizhe byo nafwainwa kubulañana ne kwamba. Kabiji nayuka namba mukambizho wabo bo bumi bwa myaka. Onkao mambo, bintu byo ñamba, ne byambila monka mwambujile Batata.” Yoano 12:28-50; 19:38, 39; Mateo 3:17; 17:5; Isaya 6:1, 8-10.

▪ Jiwi ja Lesa jaumvwanyikile pa ñanyi bimye bisatu pa mambo a kwa Yesu?

▪ Ngauzhi Isaya wamwene byepi lukumo lwa Yesu?

▪ Bañanyi bantangi baitabijile Yesu, pano mambo ka o babujile kumweshesha lwitabilo lwabo patoka?

▪ “Juba jikapelako” jo ji ka, kabiji bantu bakebachibila mambo kwimena pa ñanyi kintu?