Kitango 105

Juba Jakatezhe Bingi

YESU byo afuminemo mu Yelusalema pa Kimo mabanga, wabwelele ku Betani ku musela wa Mutumba wa Olebeta. Wapwishishe moba abiji ashajileko kusapwila mu Yelusalema. Kwa kubula nangwa kuzhinaukatu ne, Yesu walaajile jikwabo ku mulunda nanji aye Lazalasa. Kufumatu juba jo bafikile pa Kitanu kufuma ku Yeliko, aja jajinga juba ja buna jo aikele mu Betani.

Pano lukelo pa Kibiji Nisanyi 11, aye ne baana banji ba bwanga bajinga pa lwendo jikwabo. Jino jajinga juba jakatezhe bingi ja mwingilo wa kwa Yesu, kabiji jo juba jo apayankene bingi. Jo jajinga juba japeleleko kumweka mu nzubo ya Lesa. Kabiji jo jajinga juba japeleleko ja kwingila mwingilo wanji saka bakyangye kumutotolwesha ne kumwipaya.

Yesu ne baana banji ba bwanga bapichile jishinda jintutu jimo japichijile ku Mutumba wa Olebeta kutala ku Yelusalema. Mu yewa mukwakwa pa kufuma ku Betani, Petelo wamwene kichi Yesu kyo afingile juba jafumineko lukelo. Waambile amba: “Mufunjishi, monai! kichi kya mukuyu kyo mwafingile kyauma.”

Pano mambo ka Yesu o aipayijile akya kichi? Walumbulwile ene mambo byo aambile amba: “Kine nemwambila namba: Umvwe muji na lwitabilo ne kubula luzhinauko, kechi mukobatu byonka byo nauba na uno mukuyu ne, bino mukambila ne mutumba [Mutumba wa Olebeta ko baimene] amba, ‘Fuma papo uye mu kalunga ka mema,’ kabiji kikobiwa byonkabyo. Kabiji bintu byonse byo mukakebanga mu lulombelo, umvwe mwaikala na lwitabilo, mukebitambula.”

Onkao mambo, Yesu byo alengejile kichi kuma, wafunjishenga baana banji ba bwanga buneme bwa kwikala na lwitabilo mwi Lesa. Waambile’mba: “Byonse byo mukalomba ne kukeba, mwikale na lwitabilo lwa kuba amba mwibitambula kala, kabiji mukebitambula.” Luno kine lwajinga lufunjisho lwanema bingi lo bafwainwe kufunda, mambo a meseko akatampe aishilenga. Pano bino, paji lukwatankano lukwabo pa mambo a kichi kyaumine ne lwitabilo byo lwafwainwa kwikala.

Kisaka kya bena Isalela kibepekezhenga kuwama kyajinga nobe akya kichi kya mukuyu. Kisaka kyonse kechi kyajinga na lwitabilo ne kupanga bipangwa byawama ne, nangwa kya kuba kyajinga mu lulayañano lwa kwikala balunda na Lesa ne bavula byo bamwesheshenga amba babena kulama malamuna anji. Na mambo a kubula lwitabilo, akya kisaka kyakaine Mwana Lesa. Onkao mambo, Yesu byo alengejile kichi kyabujile kupanga kuma, wamwesheshe patoka bintu bikafumamo mu akya kisaka kyabujile kupanga bipangwa kabiji kyabujile lwitabilo.

Kechi papichile ne kimye ne, Yesu ne baana banji ba bwanga bafikile mu Yelusalema kabiji monka mwayijile muteeto wabo batwelele mu nzubo ya Lesa ne Yesu watatwile kufunjisha. Bañanga bakatampe ne bakulumpe, kampe balangulukilenga pa byaubile Yesu aba bapimpwilenga mali pa juba jafumineko. Onkao mambo, bamushikishe amba: “Nanchi wafumya pi lūsa lo ubena kubilamo bino bintu? Kabiji ñanyi wakupalo?”

Yesu wibakumbwile amba: “Ne amiwa nsakwimushikisha. Umvwe munkumbule ne amiwa nsakwimubula komfumya lūsa lo ngubilamo bino bintu: Lubatizhilo lwa kwa Yoano lwafumine pi? Mwiulu inyi, inyi ku bantu?”

Bañanga bakatampe ne bakulumpe batatwile kwambañana mulwabo pa byo bafwainwe kukumbula. Baambilenga’mba: “Umvwe tukumbule amba, ‘Mwiulu,’ aye usakwitwambila amba, ‘Mambo ka o mwabujile kumwitabila?’ Kabiji umvwe twambe amba, ‘Lwafumine ku bantu,’ twachina jibumba, mambo bonse bayuka amba Yoano ngauzhi.”

Aba bantangi kechi bayukile bya kukumbula ne. Onkao mambo, bakumbwile Yesu amba: “Kechi twayuka ne.”

Yesu naye wibambijile amba: “Ne amiwa kechi nemubule komfumya lūsa lo ngubilamo bino bintu ne.” Mateo 21:19-27; Mako 11:19-33; Luka 20:1-8.

▪ Mambo ka pa Kibiji Nisanyi 11 o panemejile?

▪ Lufunjisho ka Yesu lo afunjishe byo alengejile kichi kya mukuyu kuma?

▪ Yesu wakumbwile byepi aba bamushikishe ko afumishe lūsa lo aubijilengamo bintu?

Kitango 106

Wibasolwele mu Bishimpi bya Bujimi bwa Miñanzañanza

YESU wajinga mu nzubo ya Lesa. Po po afuminetu na kuzhindamikapo bantangi ba bupopweshi bakebelenga kuyuka ko afumishe lūsa lo aubijilengamo bintu. Saka bakyangye kupupuluka, Yesu wibashikishe amba: “Mwalangulukapo amba ka?” Kepo asolwele byo bajinga kupichila mu kishimpi.

Yesu washimikizhe amba: “Muntu umo wajinga na baana babiji. Waambijile mutanshi amba, ‘Mwanami, yanga ukengile mu bujimi bwa miñanzañanza.’ Aye wamukumbwile amba, ‘Tata nsakuya,’ bino kechi wayile ne. Wayile ku wa bubiji ne kumwambila kintutu kimo. Pakuba aye wamukumbwile amba, ‘Kechi nsakuya ne.’ Byo papichile kakimye, wapimpwile mulanguluko wanji waimana kaye ne kuya.” Kepo Yesu ebashikishe amba: “Pa bano bonse babiji, wepi waubile kyaswa muchima wa shanji?”

Balwanyi banji bamukumbwile amba: “Wa bubiji.”

Onkao mambo, Yesu walumbulwile amba: “Kine nemwambila namba, basonkeshi ne bapite bakatangilako kulutwe yenu mu Bufumu bwa Lesa.” Basonkeshi ne bapite patanshi bakaine kwingijila Lesa. Bino byonka byajinga mwana wa bubiji, balapijile ne kumwingijila. Pakuba bantangi ba bupopweshi bajinga nobe mwana mutanshi, baambanga amba babena kwingijila Lesa, pano bino Yesu waambile amba: “Yoano [Mubatizhi] waishile kwi anweba na kwimufunjisha jishinda ja bololoke bino kechi mwamwitabijile ne. Pakuba basonkeshi ne bapite bamwitabijile, bino anweba nangwa kya kuba mwamwene kino, kechi mwapimpwile milanguluko yenu ne kumwitabila ne.”

Kabiji Yesu wamwesheshe amba kukankalwa kwa boba bantangi ba bupopweshi kechi kwajingatu kwa kubula kwingijila Lesa ne. Bino bajinga bantu batama kabiji babi. Yesu washimikizhe amba: “Kwajinga mwina nzubo umo, wajimine bujimi bwa miñanzañanza ne kupishako luvimba kabiji wapoyele mwa kufiina binyu ne kushimikako kyamba ne kushila banjimi, waya ne ku kyalo kingi. Byo kyafikile kimye kipilamo bipangwa, watumine bakalume banji kuya ku banjimi na kutambula bipangwa byanji. Bino banjimi bakwachile bakalume banji, umo bamupumine, mukwabo bamwipayile ne mukwabo bamwashile mabwe. Kabiji watumine bakalume bakwabo bavula kukila batanshi, bino nabo bebobile kintutu kimo.”

“Bakalume” bajinga bangauzhi “mwina nzubo” aye Yehoba Lesa bo atumine ku “banjimi” ba mu ‘bujimi bwanji bwa miñanzañanza.’ Aba banjimi bajinga bantu baimenejilengako kisaka kya bena Isalela, Baibolo kyo ayukanyikishe amba “bujimi bwa miñanzañanza” bwa Lesa.

Byo kyajinga kuba’mba “banjimi” bakatezhenga ne kwipaya “bakalume,” Yesu walumbulwile amba: “Kyapeleleko [mwina bujimi bwa miñanzañanza] wibatumijile mwananji amba: ‘Mwanami bakamunemeka.’ Ponkapo bano banjimi byo bamwene mwana, baambañene bene na bene amba, ‘Uno ye nswanyi, twayai tumwipaye ne kumwangata bya buswanyi byanji bikale ke byetu!’ Byonkabyo, bamukwachile ne kumutwala kunsa ya bujimi bwa miñanzañanza ne kumwipaya.”

Yesu byo aambijilenga bantangi ba bupopweshi wibashikishe amba: “Mwina bujimi bwa miñanzañanza pa kukeya, ukeboba byepi bano banjimi?”

Bantangi ba bupopweshi bamukumbwile amba: “Na mambo a kuba babi, ukebonauna kyatama kabiji ukapana bujimi bwanji bwa miñanzañanza ku banjimi bakwabo, bakamuletelanga bipangwa umvwe byapya.”

Abo bene kwa kubula kuyuka bezhachishe mambo bavwangilwemo mu bena Isalela “banjimi” ba mu “bujimi bwa miñanzañanza” bwa Yehoba bwa bena Isalela. Bipangwa Yehoba byo aketekejile kutambula ku boba banjimi ke kwitabila mu Mwananji, Mesiasa wakine. Na mambo a kubula kupanga bipangwa bya uno mutundu, Yesu wibajimwine amba: “Binembelo [pa Salamo 118:22, 23] byaamba amba: ‘Jibwe jo balengulwile bashimika jo jaikala ke ja pa jikonka jikatampe. Jino jafuma kwi Yehoba kabiji kyo kya kukumya ku meso etu.’ Nanchi kechi mwatangapo bino Binembelo nenyi? O ene mambo, o nemwambila namba: Bakemwangata Bufumu bwa Lesa ne kwibupana ku kisaka kipanga bipangwa. Kabiji muntu uponena pa jino jibwe ukachimauka. Ne yense ye jikaponena jikamuvingakanya.”

Banembeshi ne bañanga bakatampe bayukile amba Yesu waambilenga pe abo kabiji bakebelenga kwipaya “nswanyi” wafwainwa. Onkao mambo, mwingilo wa kwikala bamfumu mu Bufumu bwa Lesa bamufumishepo pe abo byo bajinga kisaka kabiji kisaka kipya kya ‘banjimi ba mu bujimi bwa miñanzañanza’ kyalengelwe kipanga bipangwa byawama.

Bantangi ba bupopweshi byo bachiinenga jibumba mambo jayukile Yesu amba ngauzhi, kechi bakebele kumwipaya pa kikye kimye ne. Mateo 21:28-46; Mako 12:1-12; Luka 20:9-19; Isaya 5:1-7.

▪ Baana babiji ba mu kishimpi kya kwa Yesu bemenako bañanyi?

▪ Mu kishimpi kya bubiji, bañanyi bemenwako na “mwina nzubo,” “bujimi bwa miñanzañanza,” “banjimi,” “bakalume,” ne “nswanyi”?

▪ Ñanyi kintu kyamwekejile ‘banjimi ba mu bujimi bwa miñanzañanza,’ kabiji bañanyi bapingakenepo?