Kuwamishako Busendwe Bwetu bwa Kusapwila—Kusapwila ku Mvula Bantu mu Nyaunda ya Kipwilo

Ene Mambo o Kwanemena: Bantu bapayankana bingi mu bwikalo kabiji bavula kechi batanwa pa mazubo kimye kya mute ne. Bipwilo byonse bebitundaika kunengezha busapwishi bwa ku mvula bantu kwingijisha matebulu nangwa bya kubikapo mabuku bya kwendesha pa kuba’mba bizakule babena kupita. Mwakonsha kunembesha bya kubikapo mabuku ku ofweshi wa musampi. Bipwilo byakonsha kukopolola bipabi byo baswisha mu milaka yapusana pusana pa keyala wa JW.ORG. Nanchi mwakingilapo busapwishi bwa uno mutundu nyi?

Byo Twafwainwa Kuba:

Londelai lutangijilo lwa kavoto ka mwingilo mu kipwilo, matebulu ne bya kubikapo mabuku bya kwendesha mwakonsha kwibingijisha mu mapunzha mupita bantu bavula mukachi ka nyaunda ya kipwilo.
Kyawama kubikanga bya kubikapo mabuku pa mpunzha imotu, pa moba antutu amo ne pa bimye bintutu bimo mulungu ne mulungu. Kino kilengela bantu kulabijila po mubika mabuku kabiji bakakasuluka kwimusolomoka ne kwipuzha mepuzho nangwa kutambula mabuku.
Ikalai bakasuluka, balunda bawama ne kulengela bantu kwiya. Mwemweselainga. Umvwe muntu waiya po mwabika mabuku, musapwishi umo wakonsha kutendeka kwisamba nanji, kampe wakonsha kwamba’mba, “Nanchi mwakilangulukapo Baibolo byo aamba pa uno mutwe nyi?” Musapwishi mukwabo nangwa babiji bakonsha kwikala kipikipi na po babika mabuku saka basapwila busapwishi bwa kushukilwa..
Aba bamwesha lusekelo mwakonsha kwibambila’mba bemubuule ko bekala. Ingijishai pepala wa S-43 pa kuba’mba bonse bamwesha lusekelo bakebafwakeshe.

Kuba bino kwalengela bantu bavula kwikala na lusekelo lwa kufunda. Pa shitolo mukatampe ku Lusaka, bamulume ne mukazhi bafumine ku kyalo kya Croatia bamwene kya kubikapo mabuku kyamwekelenga bulongo kabiji balombele’mba bakopelwepo kipikichala. Haggai wajinga na kya kubikapo mabuku aja juba waambile’mba: “Bakebelenga kuyuka biji mu mabuku etu. Bino na mambo a kuba’mba kechi bayukile kwamba Kizungu ne, twaingijishe kabuku ka kuba’mba Good News for All Nations. Baambile’mba besambilepo na Bakamonyi ba kwa Yehoba mu Croatia. Twibamwesheshe keyala wetu wa pa intaneti ne kwibapa buku wa kuba’mba Nanchi Baibolo Kine Ufunjisha’mba Ka? Batemenwe bingi. Nebapele nambala yami ya foni, ne abo bampele kabiji nebatundaikile kwisamba na Bakamonyi ba kwa Yehoba kimye kyo bakabwelamo ku Europe.”

Esekai Kuba Bino Uno Ñondo:

Pa kupopwela kwa kisemi, isambai mpunzha ko mwakonsha kwingijila busapwishi bwa ku mvula bantu. Esekai kuba byo mukobanga ne kusala mitwe yakonsha kuzakula bavula mu nyaunda yenu.