Kukekala Lusanguko na Mambo a Bukuzhi

Kivuluko kitulengela kulanguluka pa mapesho aji kulutwe akekalako na mambo a bukuzhi, nabiji, lusanguko. Yehoba kechi wakebelenga amba bantu bafwenga ne. Kyo kyo twikela na bulanda inge twafwisha. (1Ko 15:26) Yesu wajinga bingi na bulanda byo amwene baana banji ba bwanga bajijilenga Lazalasa wafwile. (Yoa 11:33-35) Byo kiji kuba’mba Yesu ye kipasha kyalumbuluka kya Shanji, twakonsha kwamba kuba’mba Yehoba naye umvwa bingi bulanda inge twafwisha. (Yoa 14:7) Yehoba utonga bingi kimye kyo akasangula bakalume banji bafwa, ne atweba twafwainwa kutengelanga kino kimye.—Yob 14:14, 15.

Byo kiji kuba’mba Yehoba kechi Lesa wa bimvulañanya ne, twaketekela kuba’mba lusanguko lukobiwa kwakubula bimvulañanya. (1Ko 14:33, 40) Kechi kukekala bijilo ne, kukekalatu kutambwila bantu bakasangulwa. Nanchi mulanguluka pa lusanguko, kikatakata kimye kyo muji na bulanda nyi? (2Ko 4:17, 18) Nanchi musanchila Yehoba pa kwimupa bukuzhi ne kusolola mu Binembelo kuba’mba bafwa bakekala na bumi jibiji nyi?—Kol 3:15.

• Bañanyi bo mukebesha kumona jikwabo pa balunda nenu ne balongo benu bafwa?

• Bañanyi bo mukebesha kumona ne kwisamba nabo pa bantu banembwa mu Baibolo?