Nkalata Kufuma Ku Jibumba Jitangijila

Ku Basapwishi ba Bufumu:

FWANYIKIZHAI kuba’mba muji mu kisemi kya pa Betele wa ku Brooklyn pa Kitanu lukelo pa 2 October, 1914. Mwaikala pa tebulu ponka po mwikala jonse pa kuja kajo ka lukelo na kupembelela Mulongo C. T. Russell kufika. Ponkapotu, Mulongo Russell watwela mu kibamba kya kujiilamo. Byonka byo oba jonse, watulumanako pacheche ne kwimuna kisemi kya Betele na lusekelo amba “Mwabuka byepi bonse.” Mu kifulo kya kwikala ponka po ekala, wapopwela ne kubijika amba: “Bimye bya Bangetila byapwa; myaka ya kulama kwa bamfumu babo yapita!” Mwafwainwa kumvwa bingi bulongo mambo mwapembela kino kimye pa myaka yavula. Mwapopwela pamo na kisemi kyonse kya Betele na lusekelo pa kumvwa kuno kubijika.

Papita myaka yavula kufuma paambijile Mulongo Russell bino byambo. Ñanyi bintu byauba Bufumu kufumatu kyokya kimye? Bwauba byavula bingi! Kupichila mu Bufumu, Yehoba watwajijila kuwamisha ne kufunjisha bantu banji bajingatu bacheche mu 1914 kabiji lelo jino bakila pa mamilyonyi 7 ne kichika. Ñanyi bintu byo mwamwenamo mu luno lufunjisho?

Lelo jino, tumvwa balongo saka babena kwamba’mba “Kalaki wa Yehoba wa mwiulu ubena kwenda!” kabiji bino byambo bya kine. Nangwa byonkabyo, kufumatu mu 1914, kalaki wa mwiulu wimenako lubaji lwa jibumba ja Yehoba jibula kumweka ubena kwenda kimye kyonse byonka byo musa kumona pa kutanga uno buku. Pa kuba’mba basapwile mambo awama mwaya ntanda yonse, basapwishi baingijisha mashinda apusana pusana nabiji mapepala a byambo, kwenda mu mabumba na bipabi, kwingijisha bipikichala, bikachi panembwa mambo awama, bijimba bya malekodi, waileshi ne Intaneti.

Na mambo a kuba’mba Yehoba wapesha mwingilo, tubena kunemba mabuku alumbulula Baibolo awama bulongo kukila pa milaka 670 ne kwiapana ku bonse kwakubula kulipilisha. Bamwingilo bepana bakwasha kushimika Mazubo a Bufumu, Mazubo a Kubuñenamo ne misampi mu byalo biyanji ne byanonka. Kabiji umvwe kwamweka bya malwa, balongo ne banyenga baya na kukwasha boba baji mu mapunzha mwamwekela bino kumwesha kuba’mba ‘twakonsha kwibaketekela mu kimye kya bya malwa.’—Maana 17:17.

Kimye kimo, bantangi ba bupopweshi ne betumanyika ‘baleta makatazho na kubepekezha kulondela mizhilo,’ bino kikosesha bingi lwitabilo lwetu pa kumona kuba’mba byo bakeba kuba javula “byalengela mambo awama kukoma.”—Sala. 94:20; Fili. 1:12.

Ke kintu kyawama bingi atweba kwingijila pamo ne anweba batemwe “ba mu nzubo yanji.” Yukai kuba’mba twimutemwa bingi. Twaketekela kuba’mba byambo biji mu uno buku bikemulengela kusanta bingi pa buswanyi bwenu bwa ku mupashi.—Mat. 24:45.

Mapesho a Lesa ekale ne anweba,

Atweba balongo benu,

Jibumba Jitangijila ja Bakamonyi ba kwa Yehoba