Byambo Bikwabo bya mu Mutanchi wa Kupwila kwa Bwikalo ne Mwingilo
DECEMBER 3-9
BYA BUNEME BIJI MU MAMBO A LESA | BYUBILO 9-11
“Wamanyikañananga Bingi Watendekele Kusapwila na Mukoyo”
Kipwilo “Kyaikele mu Mutende
JIBUMBA ja bantu bazhingijile, janangijilenga ku Damasakasa kabiji jakebelenga kuba kintu kyatama bingi mu uno muzhi. Bayilenga na kwibakulumunamo baana ba bwanga mu mazubo abo, kwibakasa, kwibalengesha bumvu ne kwibatwala ku Yelusalema ku Kije Kikatampe kuba’mba bakebakabishe.
2 Ntangi wa jino jibumba, aye Saulo wajinga pa jibumba jikwabo jaipayile Setepena. Ye waitabizhe bazelote bakwabo kuba’mba uno mwana wa bwanga wa kwa Yesu wakosele, aye Setepena bamwipaye na mabwe. (Byu. 7:57–8:1) Na mambo a kuba kechi watondelwe pa kumanyika baana ba bwanga ba kwa Yesu baikalanga mu Yelusalema ne, Saulo waikele nobe nsama ya mujilo ya kutundaikilamo bantu kumanyika baana ba bwanga. Wakebelenga kuzhiisha jibumba jicheche jayilenga na kubayilako jo batelelenga’mba “Jishinda.”—Byu. 9:1, 2; monai kakitenguluzha ka kuba’mba “Mwingilo wa kwa Saulo mu Damasakasa,” pa jipa 61.
w16.06 7 jifu. 4
Kookelainga Mbumbi Wetu aye Yehoba
4 Yehoba kechi umona bantu byonka byo twibamona ne. Aye utala mu muchima ne kwituyuka bulongo byo tuji. (Tangai 1 Samwela 16:7b.) Yehoba wamwesheshe amba utala mu michima ya bantu kimye kyo atendekeshe kipwilo kya bena Kilishitu. Lesa wakokele bantu bo balengulwile kwiya kwi Aye ne ku Mwananji. (Yoano 6:44) Mufaliseo aye Saulo bamulengulwile mambo wajinga “wa mwenga, wamanyikanga bantu kabiji wa bulunji.” (1 Timoti 1:13) Bino Yehoba watajile mu muchima wa kwa Saulo, kechi wamulengulwile’mba buchimba bwatama ne. (Byambo bya Maana 17:3) Yehoba wamwene’mba wakonsha kubumba Saulo kwikala ‘muntu ye asala’ ukasapwila “ku bisaka bya bantu ne ku bamfumu ne ku bena Isalela.” (Byubilo 9:15) Kabiji Yehoba wasajile bantu bakwabo bo akonsheshe kubumba kwikala ‘bya kwingijilamo bya buneme,’ mwavwangilwe bantu bapendwapendwanga kala, ba bulalelale ne bangivi. (Loma 9:21; 1 Kolinda 6:9-11) Byo batendekele kufunda Binembelo, bakoseshe lwitabilo lwabo mwi Yehoba kabiji baswile kwibabumba kwi aye.
Kipwilo “Kyaikele mu Mutende
15 Akilangulukaitu pa mabumba byo akuminye ne kuzhingila bingi kimye Paulo kyo atendekele kusapwila pe Yesu mu mashinagoga. Bashikishe amba: “Nanchi uno muntu kechi ye wamanyikilenga boba baji mu Yelusalema beta pa jino jizhina” nenyi? (Byu. 9:21) Byo alumbulwilenga ene mambo o apimpwijile ndangulukilo yanji pe Yesu, Saulo ‘wibalumbulwijile bulongo amba uno yenka ye Kilishitu.’ (Byu. 9:22) Bino kulumbulula bulongo kechi kulengela bantu bonse kusumininwa ne. Kechi kwakonsha kupimpula milanguluko ya bantu bakoselatu pa kwikela mwayila bisho nangwa bantu babula kukeba kupimpula byubilo byabo na mambo a bwitote ne. Nangwa byonkabyo, Saulo kechi wikilekele ne.
Kukeba Bishinka Bikwabo Byanema
Kipwilo “Kyaikele mu Mutende
5 Kimye Yesu kyo aimikile Saulo mu mukwakwa wa kuya ku Damasakasa, kechi wamwipwizhe amba: “Mambo ka o ubena kumanyikila baana bami ba bwanga?” ne. Byonka byo kyaambiwa kala, wamushikishe amba: “Mambo ka o ubena kummanyikila?” (Byu. 9:4) Kine, Yesu umvwa bingi ku muchima kutama pa meseko apitamo baana banji ba bwanga.—Mat. 25:34-40, 45.
6 Umvwe mubena kupita mu meseko na mambo a lwitabilo lwenu mwi Kilishitu, ketekelai’mba Yehoba ne Yesu bayuka byo mubena kupitamo. (Mat. 10:22, 28-31) Pa kino kimye, Yehoba kechi wakonsha kupwisha oo meseko ne. Vulukai amba Yesu wamwene Saulo byo aitabizhe amba bepaye Setepena kabiji wamwene Saulo byo akulumwinenga baana ba bwanga mu mazubo abo mu Yelusalema. (Byu. 8:3) Yesu kechi waubilepo kintu pa kyokya kimye ne. Pano bino, Yehoba kupichila mwi Kilishitu wakoseshe Setepena ne baana ba bwanga bakwabo kuba’mba batwajijile kwikala bakishinka.
nwtsty kulumbulula byambo biji pa By 10:6
Shimona sendwe wa biseba: Sendwe wa biseba wajinga na mwingilo wa kunyuka myai ya banyama. Wiyabikanga mu laimo pa kufumyako boya nangwa mafuta ne nyama ishala mu mwai. Kabiji wiyabikanga mu maalwa ashinta pa kuba’mba ikale biseba byanekena ne kupeela bulongo. Myai pa kwiiwamisha yanukanga bingi kabiji yakebewanga kwiyovwa na mema avula. Kyamweka Shimona kyokyo aikelanga kwipi na kalunga ka mema kwapelele muzhi wa Yopa. Kwesakana na Mizhilo ya Mosesa, muntu wakwata nyama wafwa wizhilululanga nangwa’mba waikalanga wa muzhilo. (Le 5:2; 11:39) Onkao mambo, Bayudea balengulwile bingi basendwe ba biseba kabiji kechi bakebanga kwikala nabo ne. Buku wa Talmud waambile pa uno mwingilo amba watamine bingi, ne mwingilo wa kupipa tuvwi wawamako. Nangwa byonkabyo, Petelo kechi wajinga na misalululo ne. Kyokyo aikejilenga pamo ne Shimona. Kubula misalululo kwamulengejile Petelo kwingila bingi bulongo mwingilo ye bamupele palutwe kacheche, wa kuya ku nzubo ya Mungetila nangwa’ma muntu wabula Muyudea. Bashayuka bamo bamba’mba kyambo kya Kingiliki kya “biseba” (byr·seusʹ) kyamweka jo jajinga jizhina ja bashanji uno Shimona.
DECEMBER 10-16
BYA BUNEME BIJI MU MAMBO A LESA | BYUBILO 12-14
“Banabasa ne Saulo Bayile na Kusapwila ku Mapunzha a Kwalepa”
‘Baikele na Lusekelo ne Kuyula na Mupashi Wazhila’
4 Pano mambo ka mupashi wazhila o akambizhe amba ba Banabasa ne Saulo bebapatule kwingila “mwingilo”? (Byu. 13:2) Baibolo kechi waambapo ne. Twayukatu amba mupashi wazhila watangijile mu kusala bano banabalume. Kechi kyaambiwapo amba bangauzhi ne bafunjishi ba mu Antioka bakaine luno lutangijilo ne. Bino, baswile kutongolwa kwa bano banabalume. Akifwanyikizhai ba Banabasa ne Saulo byo beumvwine kimye balongo babo bena Kilishitu kyo “bazhikijilwe na nzala, kulomba ne kutenteka maboko pe Saulo ne Banabasa ne kwibambila amba, yainga.” (Byu. 13:3) Ne atweba twafwainwa kutundaika aba batambula mingilo mu kipwilo kya bena Kilishitu, kubikakotu ne banabalume batongolwa kwikala bakalama mu kipwilo. Mu kifulo kya kumvwina kichima boba bo bapa mingilo ya uno mutundu, twafwainwa ‘kwibanemekesha na butemwe na mambo a mwingilo wabo.’—1 Tesa. 5:13.
“Yehoba Wibapele Bulume Kuba Amba Bambe na Kuchinchika”
5 Patanshitu, ba Paulo ne Banabasa baimene mu Ikonyuma, muzhi mwajinga bisho bya Bangiliki kabiji wajinga muzhi wanemene bingi wa kibunji kya Loma kya Ngalatiya. Uno muzhi mwaikalanga Bayudea ne bantu bavula baalukile ke Bayudea. Kwesakana na mwayijile kisho kyabo, ba Paulo ne Banabasa batwelele mu nshinagoga ne kutatula kusapwila. (Byu. 13:5, 14) Kabiji baambile “mu jishinda jalengejile jibumba jikatampe ja Bayudea ne Bangiliki kwitabila.”—Byu. 14:1.
Ingijilainga Lesa mu Bukishinka Nangwa kya Kuba Mubena Kupita mu “bya Malwa Byavula”
4 Panyuma ya kufwakasha mu Delebe, Paulo ne Banabasa “babwelele ku Lisitila, Ikonyuma ne ku Antioka. Akwa bakoseshenga baana ba bwanga ne kwibatundaika kukosela mu lwitabilo ne kwamba amba: ‘Pa kutwela mu bufumu bwa Lesa, twafwainwa kupita mu bya malwa byavula.’” (Byu. 14:21, 22) Kimye kitanshi, bino byambo byakonsha kulengela muntu kukumya. Mambo kupita “mu bya malwa” kwatama bingi. Pano kiji byepi kuba’mba Paulo ne Banabasa “bakoseshenga baana ba bwanga” byo baambilenga pa bya malwa?
5 Twakonsha kutana mukumbu wa buno bwipuzho inge twalanguluka pa byambo byaambile Paulo. Kechi waambile’mba: “Twafwainwa kuchinchika bya malwa byavula ne.” Bino waambile’mba: “Pa kutwela mu bufumu bwa Lesa, twafwainwa kupita mu bya malwa byavula.” Onkao mambo, Paulo wakoseshenga baana ba bwanga mambo waambilenga pa byawama bikafuma mu bukishinka bwabo. Ino mfweto kechi mañambilatu ne. Yesu waambile’mba: “Yense ukachinchika kufika ne ku mpelo ye ukapuluka.”—Mat. 10:22.
Kukeba Bishinka Bikwabo Byanema
Mambo a Yehoba o Omi Bishinka Bikatampe Kufuma mu Buku wa Byubilo bya Batumwa
12:21-23; 14:14-18. Heloda watambwijile lukumo lwafwainwe kupanwatu kwi Lesa. Kino byo kyapusenepo na byakaine ponkapotu ba Paulo ne Banabasa kutambula kutotwa ne munema! Kechi twafwainwa kukeba kutambula lukumo pa kiji kyonse kyawama kyo twakonsha kuba mu mwingilo wa Yehoba ne.
nwtsty kulumbulula byambo biji pa By 13:9
Saulo utelwa jikwabo amba Paulo: Pa kikye kimye, Paulo popo balekele kumutela’mba Saulo. Uno mutumwa wajinga Muhebelu wasemenwe ku Bahebelu waikele ngikazhi mwina Loma. (By 22:27, 28; Fp 3:5) Kyamweka ku bwanyike bamwitanga ano mazhina onse abiji, ja Saulo ja Kihebelu, ne ja Paulo ja bena Loma. Mu oa moba, Bayudea bavula bajinga na mazhina abiji, kikatakata babulanga kwikala mu Isalela. (By 12:12; 13:1) Balongo ba kwa Paulo bavula nabo bajinga na mazhina a bena Loma ne a Kingiliki. (Lo 16:7, 21) Byo ajinga “mutumwa wa ku bisaka bya bantu,” Paulo bamupele mwingilo wa kusapwila mambo awama ku babujile Bayudea. (Lo 11:13) Kyamweka wafuukwilepo kwingijishanga jizhina ja bena Loma pa kuba’mba engilenga bulongo mu bano bantu. (By 9:15; Nga 2:7, 8) Bamo bamba’mba Paulo witumbile jino jizhina na mambo a kukeba kunemeka Seligiusa Paulosi, pano bino kechi byo ibyo ne, mambo Paulo watwajijile kwingijisha jino jizhina nangwatu byo afumine mu Kipilusa. Bakwabo bamba’mba Paulo walekele kwingijisha jino jizhina janji ja Kihebelu mambo mu Kingiliki jaumvwanyikanga nobe kyambo kyo baingijishanga pa kwamba pa muntu (nangwa nyama) wenda na bulunji.—Monai byo balumbulula kyambo kiji pa By 7:58.
Paulo: Mu Binembelo bya Kingiliki bya Bwina Kilishitu, jizhina ja Pauʹlos, mu Kilatini Paulus, jilumbulula “kacheche; kukepa,” jitanwamo bimye 157 po bejingijisha pa kwamba pa mutumwa Paulo kabiji bejingijisha jimotu pa kutela mukulumpe wa kyalo kya Kipilusa aye Seligiusa Paulosi.—By 13:7.
DECEMBER 17-23
BYA BUNEME BIJI MU MAMBO A LESA | BYUBILO 15-16
“Baitabunzhenye Kwingijisha Mambo a Lesa”
‘Kubula Kumvwañana’
8 Luka watwajijila kwamba’mba: “Ba Paulo ne Banabasa byo babujile kumvwañana na boba bantu [“banabalume bamo”] ne kwipachika nabo, ponkapo balongo [bakulumpe mu kipwilo] batongwele ba Paulo, Banabasa ne bakwabo kutwala ano mambo ku batumwa ne ku bakulumpe mu kipwilo bajinga mu Yelusalema.” (Byu. 15:2) ‘Kubula kumvwañana ne kwipachika’ kwamwesheshe lupata ne kusumininwa kwajinga na mabumba onse abiji kabiji kipwilo kya mu Antioka kechi kyakonsheshe kupwisha ano mambo ne. Pa kuba’mba pekale mutende ne kukwatankana, kipwilo kyatumine ano mambo ku “batumwa ne ku bakulumpe mu kipwilo bajinga mu Yelusalema,” ko kuba’mba jibumba jitangijila. Twakonsha kufunjilako ka ku bakulumpe ba mu Antioka?
Bena Kilishitu Bakine Banemeka Mambo A Lesa
6 Kinembelo kibakwashishe kupwisha luno lukatazho ke Amosi 9:11, 12. Bino byambo byanembwa ne mu Byubilo 15:16, 17, mo tutanga’mba: “Nkabwela ne kushimika jibiji nzubo ya kwa Davida yakunduka; kabiji nkawamisha paonaika ne kwiishimika jibiji, kuba amba bantu bashalapo bakamukebeshe Yehoba pamo na bantu ba mu bisaka bikwabo, bantu batelwa na jizhina jami, byo byaamba Yehoba.”
7 Bino, bantu bamo bakonsha kukana’mba, kino kinembelo kechi kyaamba’mba Bangetila baitabijile kechi bafwainwe kutwela mu mukanda ne.’ Ee ibyo, pano bino, bena Kilishitu Bayudea bayukile mo kyatajile. Kechi bamonanga Bangetila batwelele mu mukanda amba ‘bantu ba mu mikoka ikwabo’ ne, bino’mba balongo babo. (Lupu. 12:48, 49) Kyakumwenako, kwesakana na byanembele Bagster mu Septuagint, buku wa Eshita 8:17 waamba’mba: “Bavula ba mu mitundu ya bantu bajinga mu byalo bealwile ke Bayudea.” Onkao mambo, Binembelo byaambile bya kine byo byaambijile jimo amba aba bashalapo ba mu bisaka bya Isalela (Bayudea ne boba baalukile ke Bayudea bayile ku mukanda) pamo na “bantu ba mu bisaka bikwabo” (Bangetila babujile kuya ku mukanda) bakekala ke mukoka umo na mambo a jizhina ja Lesa. Kutwela mu mukanda kechi kyo kyakebewenga pa kuba’mba Bangetila bekale bena Kilishitu ne.
‘Kukosesha Bipwilo’
18 Paulo ne Timoti baingijile pamo myaka yavula. Byo bajinga bamingilo benda baingijilenga mingilo yapusana pusana mu kwimenako jibumba jitangijila. Baibolo washimuna’mba: “Byo bapichilenga mu mizhi, bapainenga mizhilo yafumine ku batumwa ne bakulumpe mu kipwilo bajinga mu Yelusalema kuba amba beilamenga.” (Byu. 16:4) Kabiji bipwilo byalondejile lutangijilo lwafumine ku batumwa ne bakulumpe mu kipwilo bajinga mu Yelusalema. Na mambo a kukokela luno lutangijilo, “bipwilo byakoselenga mu lwitabilo ne bantu baitabijile bavujilengako mu bipwilo pa juba pa juba.”—Byu. 16:5.
Kukeba Bishinka Bikwabo Byanema
Funjilai Kulaba ne Kukenkenta ku Batumwa ba kwa Yesu
8 Ki ka kyo twakonsha kufunjilako ku jino jishimikila? Panyuma ya kuba Paulo waimana kuya ku Asha, mupashi wa Lesa popo amutangijile. Kabiji panyuma ya kufika kwipi na muzhi wa Bitinya, Yesu popo amubujile Paulo kwa kuya. Kabiji kyapeleleko, panyuma ya kufika ku Toloasa, Yesu popo amubujile Paulo kwabukila ku Makedonya. Byo aji Mutwe wa kipwilo, Yesu wakonsha kwitutangijila mu jishinda jimotu. (Kolo. 1:18) Kyakumwenako, kampe mulanguluka kwikala painiya nangwa kuya ku mpunzha kubena kukebewa basapwishi ba Bufumu. Yesu wakonsha kwimutangijila na mupashi wa Lesa panyuma ya kumwesha’mba mubena kukanamina kufikizha kikonkwanyi kyenu. Kyakumwenako: Dalaivwa wakonsha kuchimpukila ku kilujo nangwa ku kipiko kanatu motoka ubena kwenda. Kyo kimotu ne atweba, Yesu wakonsha kwitutangijila kwingilako pakatampe mu mwingilo wetu kanatu tubena kwisunsunya—ko kuba’mba kukanamina kufikizha kikonkwanyi kyetu.
nwtsty kulumbulula byambo biji pa By 16:37
twi bena Loma: Ko kubamba bajinga bangikazhi bena Loma. Kyamweka Paulo ne Silasa bajinga bena Loma. Mizhilo ya bena Loma yaambile’mba bangikazhi babo bafwainwe kwibachibila mambo bulongo. Kabiji kechi bafwainwe kwibamanyikila pa meso a bantu ne. Mizhilo ya bena Loma yapele bangikazhi babo luusa lumo konse ko baikalanga mu buno bufumu. Bangikazhi bena Loma bakookelangatu mizhilo ya bena Loma konse ko baikalanga, kechi mizhilo ya bibunji ne. Inge bamupamo mambo, waswanga kumutotolwesha ku kochi wakonkako, pano bino ngikazhi mwina Loma waikalanga na lusa lwa kutwala mambo anji ku kochi mukatampe wa bena Loma. Mutumwa Paulo waingijile bingi mwingilo wa kusapwila bufumu bonse bwa bena Loma. Waingijishanga lusa lo ajinga nalo lwa bangikazhi bena Loma kwizhikijila pa bimye bisatu. Kimye kitanshi mu Filipai. Wabujile mutonyi kuba’mba balala muzhilo wa bena Loma byo bamupuma.—bimye bikwabo bibiji monai byo balumbulula byambo biji pa By 22:25; 25:11.
DECEMBER 24-30
BYA BUNEME BIJI MU MAMBO A LESA | BYUBILO 17-18
“Sapwilainga ne Kufunjisha Byonka Byaubanga Mutumwa Paulo”
nwtsty kulumbulula kyambo kiji pa By 17:2, 3
wisambilenga: Paulo kechi wasapwilangatu bantu mambo awama ne. Walumbululanga ne kutanga Binembelo paimena byobyo bishinka. Kechi watangangatu binembelo ne, wisambanga na bantu pa mwatala bino binembelo ne kukwasha bantu kumvwisha. Kyambo kya Kingiliki kya di·a·leʹgo·mai kilumbulula “kwisamba pa kintu.” Mwavwangwa ne kupa bantu kimye kya kwambapo. Kino kyo kyambo kyo baingijisha ne pa By 17:17; 18:4, 19; 19:8, 9; 20:7, 9.
kwibashiina na binembelo: Kyambo kya Kingiliki kilumbulula “kutula kwipi.” Bino byambo bibena kulumbulula’mba Paulo waesakenyenga bungauzhi bwaamba pe Mesiasa buji mu Binembelo bya Kihebelu na bintu byamwekele mu bwikalo bwa kwa Yesu, ne kwibalumbulwila Yesu byo afikizhe buno bungauzhi.
nwtsty kulumbulula kyambo kiji pa By 17:17
pa kisankanyi: Kino kisankanyi kyajinga ku muzhika buyeke bwa muzhi wa Akolopolisa mu Atene (Kingiliki, a·go·raʹ). Ino mpunzha yabayile maekita 5. Pa kino kisankanyi baubilangapo bintu byavula, kechi kubilapotu busulu ne. Popo baubilanga busulu, kusambakenapo na bya bumulwila ntanda ne bya kisemwa. Kabiji bena Atene popo batemenwe bingi kuya na kwisambila.
nwtsty kulumbulula byambo biji pa By 17:22, 23
Kwi Lesa Wabula Kuyukanyikwa: Kyambo kya Kingiliki kya A·gnoʹstoi the·oiʹ kyajinga pa byambo byo banembele pa kya kusokelapo bitapisho kya mu Atene. Bena Atene bashimikile mazubo a balesa ne bya kusokelapo bitapisho byavula mambo baakamwanga bingi balesa babo ne balesa bo babujile kuyuka. Pa balesa bo babujile kuyuka bo bashimikijile bya kusokelapo bitapisho pajinga lesa wa Kwipelula, lesa wa Ngovu, lesa wa Bujimuku , ne lesa wa Lusa. Na mambo a kuchiina’mba Lesa ye basakushapo wakonsha kwiboba kyatama, balengele ne kya kusokelapo bitapisho kyo banembelepo’mba “Kwi Lesa Wabula Kuyukanyikwa.” Bino byambo byo banembele byamwesheshenga’mba bayuka’mba kuji Lesa ye babula kuyuka. Paulo waingijisha bino byambo byajinga pa kya kusokelapo bitapisho pa kutendeka kwibasapwila pe Lesa wa kine ye babujile kuyuka pa kyo kya kimye.
Kukeba Bishinka Bikwabo Byanema
Mambo a Yehoba o Omi Bishinka Bikatampe Kufuma mu Buku wa Byubilo bya Batumwa
18:18—Luchipo ka Paulo lo achipile? Bashayuka bamo bamba’mba Paulo wachipile luchipo lwa kwikala Munazili. (Bala. 6:1-21) Nangwa byonkabyo, Baibolo kechi waambapo pa luchipo lwa kwa Paulo ne. Kabiji Binembelo kechi byaambapo ne, kana Paulo wachipile saka akyangye kwaluluka nangwa ne, nangwa kampe po po achipilenga nangwa kupwisha luno luchipo. Monse mo kyafwanyijile kwikela, kuchipa ko aubile kechi kwajinga bundengamambo ne.
nwtsty kulumbulula byambo biji pa By 18:21
Umvwe Yehoba waswa: Bino byambo bimwesha buneme bwa kubula kuvulama kyaswa muchima wa Lesa mu byonse byo tukeba kuba. Mutumwa Paulo kechi wavulamanga jino jifunde ne. (1Ko 4:19; 16:7; Hebe 6:3) Mutumwa Yakoba naye watundaikile bantu kwamba’mba: “Umvwe Yehoba waswa, tukekale bomi, tukoba kikye nangwa kyokya.” (Ya 4:15) Bino byambo kechi byafwainwa kwikala bya pa kanwatu ne, bonse bamba’mba “Umvwe Yehoba waswa” bafwainwa kwibikako kuba bintu bikeba Yehoba. Kechi kimye kyonse kyo twafwainwa kwamba bino byambo pa kanwa ne. Twakonsha kwibyambatu nangwa mu muchima.—Monai byo balumbulula byambo biji pa By 21:14; 1Ko 4:19; Ya 4:15 ne Bya Kulumbulula C.
DECEMBER 31–JANUARY 6
BYA BUNEME BIJI MU MAMBO A LESA | BYUBILO 19-20
“Saka Mwita Muchima Anwe Bene ne Jitanga Jonse”
w11 6/15 20-21 jifu. 5
“Lamai Jitanga ja Lesa Jiji Mwenu”
5 Mutumwa wanembele’mba bakulumpe mu kipwilo bafwainwa ‘kulama bulongo jitanga ja Lesa jiji mwabo.’ Bafwainwe kuyuka’mba jitanga, ja kwa Yehoba ne Yesu Kilishitu. Bakulumpe mu kipwilo betotolwelanga bene pa byo balamanga mikooko ya Lesa. Fwanyikizhai kuba’mba mulunda nenu wimushila’mba mu mumwenengako baana banji kimye kyo afumapo. Nanchi kechi mukebalamanga bulongo ne kwibajisha nenyi? Inge umo wakolwa, nanchi kechi mukamutwala ku kipatela nenyi? Ne bakulumpe mu kipwilo nabo bafwainwa ‘kujisha kipwilo kya Lesa, kyo apotele na mashi a mwananji.’ (Byu. 20:28) Bayuka kuba’mba mukooko yense wapotelwe na mashi anema a kwa Yesu Kilishitu. Byo baketotolwela bene, bakulumpe mu kipwilo bajisha, kuzhikijila ne kulama bulongo mikooko.
Bakulumpe mu Kipwilo ke ‘Bamwingilo Umo ne Atweba Kuba’mba Twikale Balusekelo’
15 Mwingilo wa bukafunga ukebewa kwingila na ngovu. Bimye bimo bakulumpe mu kipwilo bakiisha na kulanguluka pa jitanga ja Lesa ne kwijilombelako nangwa kulanguluka pa bya kukwasha bakwabo ba mu lwitabilo. (2 Ko. 11:27, 28) Nangwa byonkabyo, bakulumpe bengila mwingilo na muchima yense ne na lusekelo, byonka byaingilanga Paulo. Wanembele’mba: “Amiwa nkapana na lusekelo bintu byami byonse ne kwipana ami mwine na mambo a myeo yenu.” (2 Ko. 12:15) Kine, na mambo a kutemwa balongo banji, Paulo waingilanga na ngovu mu kwibakosesha. (Tangai 2 Kolinda 2:4; Fili. 2:17; 1 Tesa. 2:8) Kyo kyalengejile balongo kutemwa Paulo.—Byu. 20:31-38.
“Amiwa Nabinga ku Mashi a Bantu Bonse”
20 Jishinda Paulo jo alamijilengamo mikooko japusene bingi na ja bantangi bakebelenga kubijila mu mikooko yabo. Aye wiingijilanga mwine pa kuba’mba amonenga mwa kwikwashisha kukila kukatazha kipwilo. Kechi waingijilanga bakwabo ba mu lwitabilo na mambo a kukeba kunonka ne. Paulo wasashijile bakulumpe mu kipwilo mu Efisesa kwikala na muchima wa kwipana. Wibambijile’mba: “Mwafwainwa kukwasha boba babula kukosa kabiji mwafwainwa kuvulukanga byambo bya Nkambo Yesu byo aambile amba, ‘Mu kupana mufuma lusekelo lukatampe kukila mu kutambula.’”—Byu. 20:35.
Kukeba Bishinka Bikwabo Byanema
“Ayilenga na Kukoma . . . ne Kushinda”
11 Kyamweka Paulo wafunjishenga pa juba pa juba mu uno sukulu kutatula na kimye kya 11 koloko wa mute kufika ku 4 koloko wa mabanga. (Byu. 19:9) Kimye kyo afunjishenga, bantu bazhindaminetu nzoo kabiji mute wazongele bingi mambo bantu bavula kyo kimye kyo balekele mingilo yabo kuba’mba baje ne kukokoloka. Umvwe Paulo waingijile pa myaka ibiji kwa kubula kuleka, ko kuba’mba waingijile maola kukila pa 3,000 nangwa amba maola 125 pa ñondo. Kino ke kintu kikwabo kyalengejile mambo a Yehoba kukoma ne kushinda. Paulo waingijile bingi na mukoyo kabiji wasapwijilenga kwesakana na bantu bo aambilengako. Wanengezhanga bintu bulongo pa kuba’mba asapwile bantu bavula mu nyaunda. Ñanyi kintu kyawama kyafuminemo mu mwingilo waingijile Paulo? “Bangikazhi bonse ba mu kibunji kya Asha baumvwine mambo a Nkambo, Bayudea ne Bangiliki pamo.” (Byu. 19:10) Kine Paulo washimwinenga bulongo bukine!
“Ayilenga na Kukoma . . . ne Kushinda”
15 Kintu kya bumvu kyamwekejile baana babalume ba kwa Sekeba kyalengejile bantu bavula kwikala na moyo wa kwakamwa Lesa, bamo baitabijile ne kuleka kupopwela mipashi. Kisho kya bena Efisesa kyajinga kya kuba bingelekezha. Kuponga ne kwingijisha manyaku kwaubile ne woo, kabiji pakuba bino balondelanga bintu byo banembele. Bena Efisesa bavula baletele mabuku abo o baingijishanga ku bya buñanga ne kwiasoka bantu saka bamonako nangwa kya kuba ano mabuku batayijilepo mali avula. Luka waamba’mba: “Mambo a Yehoba ayilenga na kukoma na bulume ne kushinda ashinjilenga.” (Byu. 19:17-20) Kine, bukine bwa mambo a Lesa bwashinjile mafunjisho a bubela ne bandemona! Twakonsha kufunjilako ku kintu kyawama kyaubile bano bantu bakishinka! Ne atweba tubena kwikala mu ntanda muji bantu bavula bapopwela mipashi. Umvwe tuji na bintu bya kunza ku kupopwela mipashi, ne atweba twafwainwa kwibyela byonka byaubile bena Efisesa! Twayai tusankilepo bino byubilo bya bunya nangwa kya kuba kechi kyapela kuba bino ne.