Byambo Bikwabo bya mu Mutanchi wa Kupwila kwa Bwikalo ne Mwingilo
MAY 3-9
BYA BUNEME BIJI MU MAMBO A LESA | KUBALA 27-29
“Ikalai Babula Misalululo Byonka Biji Yehoba”
Musanchilainga Yehoba pa Byubilo Byanji
14 Bano baana babakazhi batanu bayile kwi Mosesa ne kumwipuzha’mba: “Nanchi mambo ka jizhina ja batata o bakejangachilamo mu kisaka kyabo mambo a kubula mwana wa mulume?” Bamusashijile amba: “Tupai buswanyi bwetu mukachi ka balongo ba batata.” Nanchi Mosesa wibakumbwile kupichila mu kwibambila’mba, ‘Uno ke muzhilo, kafwako kyo nakonsha kuba pa kuba’mba nemukwashe nenyi’? Ine, aye “waletele mambo abo kwi Yehoba.” (Bala. 27:2-5) Nga Yehoba waambile’mba ka? Waambijile Mosesa amba: ‘Baana ba kwa Zelofehada baamba bulongo, kine ukebape pa kwikala ke buswanyi bwabo mukachi ka balongo ba bashabo, pa kwibapa abwa buswanyi bwa bashabo ke bwabo.’ Yehoba kechi wapelejiletu pa kwamba bino ne. Byo akambizhe Mosesa wibyalwile ke muzhilo wa kuba’mba: “Umvwe muntu wafwa kwa kubula kwikala na mwananji wa mulume, apa bino mwananji wa mukazhi akebuswane abwa buswanyi bwanji bwa bashanji.” (Bala. 27:6-8; Yosh. 17:1-6) Kufumatu kyokya kimye, banabakazhi bena Isalela bajinga na lukatazho lwa uno mutundu batendekele kutambula buswanyi bwabo.
Musanchilainga Yehoba pa Byubilo Byanji
15 Kine, kino kintu kyamwesheshe lusa ne kubula misalululo. Yehoba wanemekele bano banabakazhi bayanjile byonkatu byo anemekele bena Isalela baikelenga bulongo. (Sala. 68:5) Jino ke jishimikilatu jimo pa mashimikila avula a mu Baibolo amwesha kuba’mba: Yehoba kechi uji na misalululo ne.—1 Sam. 16:1-13; Byu. 10:30-35, 44-48.
Musanchilainga Yehoba pa Byubilo Byanji
16 Twakonsha kubula byepi misalululo byonka biji Yehoba? Vulukainga kuba’mba mu kubula misalululo mwavwangwa bintu bibiji. Inge twabula misalululo kechi tukatalanga ku bilungi bya bantu ne. Kya kine, atweba bonse twatemwa kulanguluka’mba twakasuluka kabiji kechi tuji na misalululo ne. Pano bino, mwakonsha kuswa kuba’mba kechi kyapela kwiyuka bulongo obewa mwine ne. Onkao mambo, twakonsha kuba byepi pa kuba’mba tuyuke inge kya kine kechi tuji na misalululo ne? Yesu byo akebelenga kuyuka byaambilenga bantu pe aye, waipwizhe mulunda nanji amba: “Bantu bamutela Mwana muntu amba ñanyi?” (Mat. 16:13, 14) Ne atweba twakonsha kuba byonka byaubile Yesu. Mwakonsha kwipuzha mulunda nenu ye mwaketekela kuba’mba wakonsha kwimubula kwa kubula kwimupita mu mbaji inge muji na misalululo nangwa ne. Inge wimubula’mba mwanemekako bantu baji na bikoba bimo ne baji pa bifulo nangwa banonshi, mwakonsha kuba byepi? Lombai kwi Yehoba ne kumusashijila kuba’mba emukwashe mupimpule milanguluko yenu pa kuba’mba mumweshenga kyubilo kyanji kya kubula misalululo.—Mat. 7:7; Kolo. 3:10, 11.
Kukeba Bishinka Bikwabo Byanema
it-2 528 jifu. 5
Milambo
Milambo ya Binyu. Milambo ya binyu beipananga pamo na milambo ikwabo, kikatakata kimye bena Isalela kyo batendekele kwikala mu Ntanda ya Mulaye. (Ba 15:2, 5, 8-10) Bino byajinga binyu bya miñanzañanza (“binyu bipendañana”) byo baichilanga pa kya kusokelapo bitapisho. (Ba 28:7, 14; esakanyaiko Lup 30:9; Ba 15:10.) Mutumwa Paulo wanembejile bena Kilishitu ba mu muzhi wa Filipai amba: “Nangwa kya kuba babena kungichila nobe mulambo wa binyu pa kitapisho ne mwingilo wazhila ye mwingila na mambo a lwitabilo lwenu, natemwa.” Apano mutumwa Paulo waesakenye muchima wanji wa kwipaana kukwasha bena Kilishitu bakwabo ku mulambo wa binyu. (Fp 2:17) Kabiji byo ajinga pepi kufwa, Paulo wanembejile Timoti amba: “Mbena kwitululwa nobe mulambo wa binyu ne kimye kya kukasululwa kwami kyafika kala.”—2Ti 4:6.
TAIKO MUCHIMA KU MWINGILO WA KUSAPWILA
Ñanyi Kintu Kilengela Yehoba Kutambwila Milambo?
Kupaana Milambo Itokesha Lesa ku Muchima
Buku wa The Mighty Aztecs waamba’mba: “Bumi bufuma ku lufu. Bino byo byaitabijile ba mu bupopweshi bwa Aztecs. Ku mpunzha ya Mesoamerica baipaile bantu bavula bingi na kwibalambula.” Kabiji uno buku watwajijila’mba: “Bufumu bwabo byo bwakomene, batapishishe bantu bavula bingi na mambo a luno lwitabilo lwabo.” Buku mukwabo waamba’mba mu bupopweshi bwa Aztecs batapishanga bantu kukila pa 20,000 mu mwaka umo.
Bantu bavula mwaya ntanda balambula milambo ku balesa babo na mambo a moyo, kwakamwa pa byakonsha kumweka nangwa kwizhachisha pa byatama byo baubile. Nangwa byonkabyo, Baibolo waamba’mba Yehoba Lesa, mwine wa Bulume Bonse wakambizhe bantu kupaana milambo. Onkao mambo kyayilamo kwipuzha’mba: Ñanyi milambo itokesha Lesa ku muchima? Nanchi ne mu ano moba twafwainwa kupaananga milambo nyi?
Milambo ne Bitapisho bya mu Bpopweshi bwa Kine
Kisaka kya Isalela byo kyalengelwe, Yehoba wibabujile byo bafwainwe kumupopwelanga, ne byo bafwainwe kupaananga milambo. (Kubala, kitango 28 ne 29) Milambo imo yo bapaananga yajinga bijimwa, kabiji ikwabo yainga bitapisho bya bañombe, mikooko, bambunzhi, bankunda ne tuteela. (Bena Levi 1:3, 5, 10, 14; 23:10-18; Kubala 15:1-7; 28:7) Bino byonse byajinga bitapisho bya kusoka mu mujilo. (Kulupuka 29:38-42) Kabiji kwajinga ne bitapisho bya mutende. Abino bitapisho bebipaananga bajangako byo bapaananga kwi Lesa.—Bena Levi 19:5-8.
Bino byonse bitapisho ne milambo yo bapaananga kwesakana na mizhilo Lesa kyo apeele Mosesa byajinga bya kupopwela Lesa ne kumwesha’mba Yehoba ye Lesa walengele bintu byonse. Kupichila mu kupaana bino bitapisho, bena Isalela bamweshanga lusanchilo lwabo kwi Yehoba pa byo ebapeshanga, kwibazhikijila ne kwibalekelako mambo. Yehoba wibapeshanga bingi inge batwajijila kulondela byo akebanga pa kumupopwela.—Byambo bya Maana 3:9, 10.
Kwi Yehoba, kintu kyanema bingi pa kupaana milambo ke muchima wa ubena kupaana mulambo. Yehoba waambile kupichila mwina ngauzhi Hoseya amba: “Amiwa nsekela mu butemwe bubula kwaluka kechi mu bitapisho ne, ne mu kungyuka amiwa Lesa kechi mu milambo ya kusoka ne.” (Hoseya 6:6) Onkao mambo, bantu byo basatukile mu bupopweshi bwa kine ne kutendeka kuba byubilo byatama ne kwipaya bantu babula mambo, milambo yabo yo batapishanga pa bitapisho kwi Yehoba kechi yamutokeshanga ku muchima ne. O ene mambo, Yehoba o aambijile kisaka kya bena Isalela kupichila mwi ngauzhi Isaya amba: “Nanchi ñanyi kintu kyo nkamwenamo mu bitapisho byenu byavula? Mwampelenga milambo yenu ya kusoka yavula ya mikooko, ne mafuta a banyama banuna, kabiji kechi nsekela mu mashi a baana ba bañombe, baana ba mikooko ne bambuzhi ne.”—Isaya 1:11.
MAY 10-16
BYA BUNEME BIJI MU MAMBO A LESA | KUBALA 30-31
“Fikizhainga byo Mulaya”
it-2 1162
Luchipo
Lwajinga lwa kwifuukwilapo muntu aye mwine, bino inge wachipa wafwainwe kwilufikizha. Muntu mwine ye wafuukulangapo kuchipa luchipo. Bino umvwe muntu wachipa luchipo, mizhilo ya Lesa yaambile’mba wafwainwe kwilufikizha. O ene mambo o baambilanga’mba lwajinga lwa “kukanya mweo wanji.” Kulumbulula kuba’mba muntu bakonsheshe kumwipayilapo inge wabula kufikizha luchipo lo achipile. (Ba 30:2; monai ne Lo 1:31, 32.) Na mambo a kuba’mba bumi bwaikalanga mu kizumba, o ene mambo Binembelo o byajimwineko bantu kuba’mba bafwainwe kulangulukapo bulongo pa byonse byavwangwa mu lolo luchipo saka bakyangye kuchipa. Mizhilo ya Lesa yaambile’mba: “Umvwe mwachipa luchipo kwi Yehoba . . . Lesa wenu ukakeba anweba kwilufikizha; inge ne, mukekala na mambo. Bino umvwe mukabule kuchipa, kechi mukekala na mambo ne.”—Mpi 23:21, 22.
it-2 1162
Luchipo
Luchipo ke kulaya Yehoba kubapo kintu kimo, nabiji kupana mulambo nangwa bupe, kumulaya kumwingijila nangwa kwikala bwikalo bwapusanako, nangwa kukaana bintu bimo byabula kukanya mizhilo. Muntu mwine ye wifuukwilanga kuchipa luchipo. Na mambo a kuba’mba luchipo lwanema bingi, muntu ubena kuchipa waambanga byambo bya kumwesha patoka amba ukooba byo alaya. (Ba 30:2; Mat 5:33) “Luchipo’ ke byambo byaamba muntu bya kumwesha’mba ukooba byo alaya ku uji na bulume nangwa kikakatazhepotu byepi. Luchipo javula belwingijishanga ne pa kwikajika lulayañano.—Nt 26:28; 31:44, 53.
Bishinka Bikatampe Kufuma mu Buku wa Kubala
30:6-8—Nanchi mwanamulume mwina Kilishitu wakonsha kukanya byafuukula mukazhanji kuba nyi? Pa mambo a kufuukula bya kuba, Yehoba pano wingila na bapopweshi banji umo umo. Kya kumwenako, kwipana kwi Yehoba ke kintu kifuukwila muntu aye mwine. (Ngalatiya 6:5) Mwanamulume kechi uji na lūsa lwa kukanya kufuukula kwa uno mutundu ne. Nangwa byonkabyo, mwanamukazhi wafwainwa kuchinuzhuka kufuukula bintu byabula mu Byambo bya Lesa nangwa byapusana na byo afwainwa kwingijila mwatawanji.
Kukeba Bishinka Bikwabo Byanema
it-2 28 jifu. 1
Yefita
Kwajinga lunengezho lwa muntu mwine kwipana kwingijila Yehoba ku nzubo ya Lesa. Bansemi nabo bajinga na luusa lwa kupana baana babo ku uno mwingilo. Samwela ye umo bainanji ye bapaine. Bainanji ba Hana bachipile saka akyangyetu ne kusemwa kuba’mba bakamupana akengijilenga Lesa ku nzubo ya Lesa. Luno luchipo beluswishishe kwi bashanji ba Elekana. Samwela byo bamusumwinetu, Hana wamutwajile ku nzubo ya Lesa. Byo bamutwajilenga, Hana wasendele ne nyama wa mulambo. (1Sa 1:11, 22-28; 2:11) Samusonyi naye bamupaine kwikala Munazili wa kwingijila Lesa kufumatu ku bwanyike bwanji.—Mit 13:2-5, 11-14; monai ne luusa lwajinga na nsemi wa mulume pa baana banji babakazhi mu Kubala 30:3-5, 16.
MAY 17-23
BYA BUNEME BIJI MU MAMBO A LESA | KUBALA 32-33
“Mukapangemo Bangikazhi Bonse ba mu Kyalo
w10 8/1 23
Nanchi Mwayuka Nyi?
Nanchi ‘mapunzha atuntama’ o batongola javula bingi mu Binembelo bya Kihebelu oa ka?
Bena Isalela byo bajinga pepi kutwela mu Ntanda ya Mulaye, Yehoba wibakambizhe kufumyamo mapunzha onse a bupopweshi a bena Kenana. Lesa wibakambizhe’mba: “Mukakundaule mashiki abo onse a mabwe ne bipashañano byabo byonse bya byela ne kusandañanya mapunzha abo azhila atuntama.” (Kubala 33:52) Ano mapunzha a bupopweshi bwa bubela afwainwa ajinga panshitu nangwa kampe peulu ya mitumba, nangwa kampe yajinga mituntamo yo bashimikila munshi ya bichi nangwa mu mizhi yabo. (1 Bamfumu 14:23; 2 Bamfumu 17:29; Ezikyo 6:3) Pano ano mapunzha bashimikilangapo bya kusokelapo bitapisho, mashiki azhila, bankishi, pa kusokela bya kufutumuna, bichi bya mulumbulumbu ne bikwabotu byo baingijishanga mu bupopweshi bwabo.
Fundai ku Bilubo bya Bena Isalela
Lelo jino, tupita mu makatazho avula bingi aji byonka byajinga apichilemo bena Isalela. Ano moba mu ntanda muji bintu ne bantu bavula bingi bo bapopwela ku bantu bakwabo nobe tubalesa. Bino bintu byavwangamo mali, kutamba bantu baya nkuwa, kutota bantu bapama mpila baya nkuwa, bamulwila ntanda, bantangi bamo ba bupopweshi, ne ba mu kisemi. Bino bintu byakonsha kwitulengela kutapo muchima mu bwikalo bwetu. Kwichina kala na boba babula kutemwa Yehoba kwakonsha kwitulengela konauna bulunda bwetu na Lesa.
Kwilaala kwabula kwitabizhiwa mu mizhilo ko kwakijilemo kubiwa mu mpopwelo ya kwa Baela, kabiji kino kyalengejile bena Isalela bavula kufwa mu kakose. Tuno tonka tukose tubena kongola bantu ba Lesa lelo jino. Kya kumwenako, kutamba bipikichala bya bantu bajitu mulekese pa Intaneti kupichila mu kwingijisha kompyuta muntu yo abika kwabengakana mu nzubo yanji kwakonsha kumulengela konauna jiwi janji ja mu muchima jawama. Byo kyakonsha kutama umvwe mwina Kilishitu waongolwa na kutamba bipikichala bya bantu baji mulekese pa Intaneti!
it-1 404 jifu. 2
Kenana
Yoshua “kechi washilepo kuba kintu nangwa kimo Yehoba kyo akambizhe Mosesa” pa byo bafwainwe konauna bena Kenana ne. (Yos 11:15) Bino bena Isalela kechi balondejile byo aubile ne. Kechi bafumishemo bantu bonse babulanga kwakamwa Lesa mu yoya mpunzha ne. Kutwajijila kwikala pamo na bena Kenana mwafumine bintu byatama bingi. Kabiji kwaipaishe bantu bavula. Bumbanzhi, bulalelale ne kupopwela bankishi byasampukijile ne pa katele. Bena Isalela inge baji bakookejile mukambizho wa kufumyamo bena Kenana bonse mu ntanda, inge kechi beletelejile bya malwa ne. (Ba 33:55, 56; Mit 2:1-3, 11-23; Sl 106:34-43) Yehoba wajimwineko bena Isalela amba kechi ukoba misalululo pa kwibachibila mambo ne. Onkao mambo, bena Isalela byo batwajijile kwichina kala na bena Kenana, kusongozhanya nabo, kuvwanga mpopwelo, kubako bisho bya bupopweshi ne byubilo byatama, nabo beletelejile bya malwa byonka byaishilenga pa bena Kenana. Byo baubile byalengejile ‘kyalo kwibalasa na mambo a kwikizhilulula.’—Lup 23:32, 33; 34:12-17; Le 18:26-30; Mpi 7:2-5, 25, 26.
Kukeba Bishinka Bikwabo Byanema
it-1 359 jifu. 2
Mipaka
Inge bayuka mpunzha kukekela mukoka panyuma ya kutaya bubale, kepo balangulukanga pa kishinka kya bubiji; kubaya kwa mpunzha ya kwibapa kwesakana na kubaya kwa mukoka wabo. Lesa wibakambizhe’mba, “Mwafwainwa kuta bubale pa kwabanya kyalo mu bisemi byenu. Jibumba jiji na bantu bavula mukejipe kya buswanyi kyabaya ne jibumba jiji na bantu bacheche mukejipe kya buswanyi kicheche. Muntu yense ukatambula kya buswanyi ponka pa kaponena bubale bwanji.” (Ba 33:54) Kechi bapimpulanga kukekela mpunzha yo batongwele ku bubale ne. Kyo bapimpulanga ke kubaya kwa mpunzha. O ene mambo byo bamwene kuba’mba mpunzha yo bapele mukoka wa bena Yuda ibabayijile, bachibileko mpunzha ne kupa mukoka wa bena Shimeona.—Yos 19:9.
TAIKO MUCHIMA KU MWINGILO WA KUSAPWILA
Mambo ka Yehoba o Apesheshanga Makondo Alwanga Bena Isalela Kala?
w09 10/1 30, kakitenguluzha
Nanchi bena Kilishitu Bafwainwa Kulwa Nkondo Nyi?
MAKONDO O BAPESHESHE KWI YEHOBA
Kisaka kya bena Isalela kyo kisaka Lesa kyo asajile bwina Kilishitu saka bukyangye kwikalako. Kino kisaka pa bimye bimo bebaswishanga kukonkanya mazhita abo ne kuya na kulwa nkondo. Saka bakyangye kutwela mu Kenana, ntanda Lesa yo alayile Abalahama, bena Isalela bebabujile’mba: ‘Yehoba Lesa wenu ukapaana [mikoka itanu na ibiji] kwi anweba, ne anweba mukebashinda. Mwafwainwa kwibonaunatu bonse pelu. Kabiji kechi mukalayañane nabo lulayañano nangwa kwibobila lusa ne.’ (Mputulukilo ya mu Mizhilo 7:1, 2) Onkao mambo, bena Isalela na mukulumpe wabo wa nzhita aye Yoshua bashinjile bisaka bya balwanyi babo, “byonkatu Yehoba Lesa wa Isalela byo akambizhe.”—Joshua 10:40.
Nanchi ino nkondo yalwilenga bena Isalela yajinga ya kwangata byalo bya bakwabo kyalunkanankana nyi? Ine, mu bino byalo mwavujile bingi kupopwela bankishi, bumbanzhi ne bulalelale bwa kwizozola. Kabiji baipayanga ne baana babo na kwibalambula mu mujilo. (Kubala 33:52; Yelemiya 7:31) Buzhile bwa Lesa, bunchibamambo bwanji bwa bololoke ne butemwe bo atemwa bantu banji bwamulengejile kufumya buno bubipisho mu ino ntanda. Bino Yehoba wapalangwizhe mu michima ya bantu bonse. Kabiji wapulwishe boba bakebeshenga kuleka byubilo byabo bincha ne kutendeka kumwingijila. Kafwako mukulumpe wa nzhita muntu wakonsha kuba bino ne.
MAY 24-30
BYA BUNEME BIJI MU MAMBO A LESA | KUBALA 34-36
“Fyamai mwi Yehoba”
Nanchi Mufyama mwi Yehoba Nyi?
4 Pano bena Isalela baubanga byepi na mambo a muntu waipayañana kya mapuso? Nangwa kya kuba waipayañana kya mapuso, bino waikalanga na mambo a mashi a muntu wabula mambo ye aipaya. (Nte. 9:5) Pano bino muntu waipayañana kya mapuso bamuswishishe kunyemena mu muzhi umo pa mizhi itanu na umo ya kufyamamo, kuchiina kumwipaya ku yewa ushinkanya na mambo a mashi. Wazhikijilwanga inge wanyemena mu ino mizhi. Muntu waipayañana kya mapuso wafwainwe kwikala mu muzhi wa kufyamamo posotu ñanga mwine mukatampe wafwa.—Bala. 35:15, 28.
Nanchi Mufyama mwi Yehoba Nyi?
6 Inge muntu waipayañana kya mapuso, patanshi wafwainwe “kulondolola mambo anji [ku] bakulumpe” ku kibelo kya muzhi wa kufyamamo ye anyemenamo. Bafwainwe kumutambwila bulongo. (Yosh. 20:4) Pa kupitapo kimye, bamubwezhanga ku bakulumpe ba muzhi mo aipayijile mukwabo kuba’mba bakamuchibile mambo. (Tangai Kubala 35:24, 25.) Posotu kyataanwa kuba’mba uno muntu waipayile mukwabo kya mapuso, bino bamubwezha mu muzhi wa kufyamamo mo anyemejile.
Nanchi Mufyama mwi Yehoba Nyi?
13 Inge muntu waipayañene wanyemena mu muzhi wa kufyamamo, wazhikijilwanga. Yehoba waambile pa ino mizhi amba: “Ikekala ya kufyamamo anweba.” (Yosh. 20:2, 3) Yehoba kechi waambile’mba muntu waipaya mukwabo bafwainwa kumuchibila mambo amo bimye bibiji ne, kabiji awa ushinkanya na mambo a mashi kechi bamuswishishe kutwela mu muzhi mwanyemena muntu waipayañana ne kumwipaya ne. Onkao mambo, muntu wanyemena mu muzhi wa kufyamamo kechi waakamwanga’mba bakamwipaya ne. Yehoba wazhikijilanga muntu wanyemena mu muzhi wa kufyamamo. Ino mizhi ya kufyamamo kechi yajinga nobe kaleya ne. Muntu inge wanyemena mu muzhi wa kufyamamo, wakasulukile kwingila mingilo, kukwasha bakwabo, ne kwingijila Yehoba mu mutende. Uno muntu waikalanga bwikalo bwa lusekelo.
Kukeba Bishinka Bikwabo Byanema
w91 2/15 13 jifu. 13
Bukuzhi Bwaesakana bwa Kukuula Bantu Bonse
13 Ba Adama ne Evwa kechi bakamwenamo mu bukuzhi ne. Mizhilo ya Lesa yo apele Mosesa yaambile’mba: “Mbanzhi ye bazhachisha amba afwe, kechi mwafwainwa kukuula bumi bwanji ne.” (Kubala 35:31) Adama walengele mambo kya nshiji mambo kechi bamujimbaikile ne. (1 Timoti 2:14) Mambo o alengele ajinga a bumbanzhi bwa kwipaya baana banji. Kiji bino mambo wibalengejile kuswana bundengamambo ne lufu. Adama ye wibaletelejile lufu. Onkao mambo, Adama wafwainwe kufwa mambo wajinga muntu walumbuluka wafuukwilepo kusatukila Lesa kya nshiji. Mwayila mizhilo ya Lesa yaamba pa bololoke, kechi kyayijilemo Adama kumwenamo mu lunengezho lwa bukuzhi ne. Bukuzhi bwapana mfuto ya mambo alengele Adama. Kabiji bwalengela baana ba kwa Adama kufuma mu jifingo ja lufu lwibaletelejile Adama. (Loma 5:16) Bukuzhi bwazhiya bulume bwa lufu. Mukuzhi wetu ‘watompejile lufu bantu bonse’ ne baana ba kwa Adama bonse ku bundengamambo.—Bahebelu 2:9; 2 Kolinda 5:21; 1 Petelo 2:24.
MAY 31–JUNE 6
BYA BUNEME BIJI MU MAMBO A LESA | MPITULUKILO YA MU MIZHILO 1-2
“Mubena Kwimenako Lesa pa Kuchiba Mambo”
w96 3/15 23 jifu. 1
Yehoba Watemwa Bololoke ne Bunchibamambo Bwaoloka
Bakulumpe mu kipwilo bebapa mwingilo wa kuchiba mambo mu kipwilo. (1 Kolinda 5:12, 13) Pa kuchiba mambo, bavuluka kuba’mba Lesa uba lusa pafwainwa kwesakana na mwayila bololoke bwanji. Inge kafwapo bishinka byafwainwa kulengela kumubila lusa ndengamambo, nabiji inge wabula kulapila, ko kuba’mba kechi wafwainwa kumubila lusa ne. Bino bakulumpe mu kipwilo kechi bashikwa bantu bo bapanga mu kipwilo ne. Baketekela kuba’mba kumupanga mu kipwilo kukamulengela kulangulukapo ne kuleka bwikalo bwanji bwatama. (Esakanyaiko Ezikyo 18:23.) Bakulumpe mu kipwilo bakookela Kilishitu byo balamawizha bololoke. Mu kuba bino mwavwangwa ne kwikala “kya kufyamamo pa kwiya kipupu.” (Isaya 32:1, 2) Bakulumpe mu kipwilo bachiba mambo monka mo aolokela na lusa.—Mpitulukilo ya mu Mizhilo 1:16, 17.
w02 8/1 ma. 22-23 jifu. 4
Kookelainga na Bukishinka Bantangi Batongolwa na Lesa
4 Pano bino, kwikala mutonyi kechi kyapelele kya kuba’mba kikulu wayuka Mizhilo ne. Byo bajinga bantu bambulwakoloka, bano banabalume bakulumpe bajimukile ne kolola byubilo byabo bene nabiji kwikala babula kwitemwa, babula misalululo, ne lwiso, mambo bino bintu bilengela kubula kuchiba mambo mo aolokela. Mosesa wibambijile’mba: ‘Kechi mukatale ku bilungi bya bantu pa kuchiba mambo ne; mukebomvwe ne bantutu ne babineme pamotu; kechi mukachine kilungi kya muntu ne; mambo kuchiba mambo ko kwa Lesa.’ Ee, mitonyi ya bena Isalela yachibijilengako mambo Lesa. Byo ajingapo mwingilo mukatampe ulenga ne moyo!—Mpitulukilo ya mu mizhilo 1:16, 17.
Kukeba Bishinka Bikwabo Byanema
Bya Kuvululako bya Yehoba byo Byakishinka
9 Bena Isalela byo bayilenga pa lwendo lwa myaka 40 lo bapichile mu “kiselebwa kyabayisha kilengesha moyo,” Yehoba kechi wibabuujile jimo byo akebatangijilanga, kwibazhikijila ne kwibalama ne. Nangwa byonkabyo, pa bimye byavula wamwesheshetu patoka kuba’mba bafwainwa kuketekela mwi aye ne mikambizho yanji. Mute wibatangijilanga na jikumbi jaimananga mulumbulumbu kabiji bufuku wibatangijilanga na jikumbi jamwekelenga nobe mujilo. Kupichila mu kuba bino, Yehoba wavulwilemo bena Isalela kuba’mba wajinga nabo pa lwendo lwabo lwakatazha. (Mpitu. 1:19; Lupu. 40:36-38) Kabiji wibamwenanga ne bya mu bwikalo. “Bivwalo byabo kechi byafwile ne, ne maulu abo kechi avimbile ne.” “Kechi bakajilwe kintu” nangwa kimo ne.—Ne. 9:19-21.
TAIKO MUCHIMA KU MWINGILO WA KUSAPWILA
Chinuzhukainga Kwamba Nangwa Kuteleka ku Ñambilo Yatama
Kange ‘Mumunyinyitenga Yehoba’ Ne
7 Ñambilo yatama ya bakwetu yakonsha kwitutwala mungi. (Tangai Mpitulukilo ya mu mizhilo 1:26-28.) Bena Isalela popo bebapokolweletu mu buzha mu Ijipita. Yehoba mu jishinda ja kukumya waletele myalo jikumi pa bena Ijipita, kabiji waonawine Felo ne nzhita yanji pa Kalunga Kachila. (Lupu. 12:29-32, 51; 14:29-31; Sala. 136:15) Bantu ba Lesa bajingatu pepi kutwela mu Ntanda ya Mulaye. Pano bino, bena Isalela batendekele kumunyinyita Yehoba. Ki ka kibalengejile kubula lwitabilo? Michima yabo yakakijilwe na mambo a sawakya watama waletele banabalume bamo bayile na kwendela ntanda. (Bala. 14:1-4) Ki ka kyafuminemo? Kafwako muntu nangwa umo wa mu kino kisemi watwelele mu “ntanda yawama” ne. (Mpitu. 1:34, 35) Twakonsha kufunjilako ka ku kino? Ñambilo yatama ya bakwetu yakonsha kukookesha lwitabilo lwetu ne kwitulengela kutendeka kunyinyita Yehoba.
JUNE 7-13
BYA BUNEME BIJI MU MAMBO A LESA | MPITULUKILO YA MU MIZHILO 3-4
“Mizhilo ya Yehoba ya Maana Kabiji Yaoloka”
it-2 1140 jifu. 5
Milangwe
Kuta muchima pa kufunda Mambo a Lesa ne kwialondela mu bwikalo kulengela muntu kwikala na maana kukila bafunjishi banji ne kuba bintu na milangwe kukila bakulumpe. (Sl 119:99, 100, 130; Esakanyaiko Lu 2:46, 47.) Kiji bino mambo maana ne milangwe biji mu mikambizho ne malamuna a Lesa. O ene mambo kukookela mizhilo ya Lesa o kwakonsheshe kulengela bena Isalela kwibamonanga ku bisaka bya bantu bibazhokolokele amba “bantu ba maana kabiji ba milangwe.” (Mpi 4:5-8; Sl 111:7, 8, 10; esakanyaiko 1Ki 2:3.) Muntu wa milangwe uyuka kuba’mba kechi wafwainwa kwisulwa kubula kukookela mizhilo ya Lesa ne. Onkao mambo, utapo muchima kwiikookela kabiji ulomba Lesa kumukwasha kuba bino. (Sl 119:169) Uswisha Mambo a Lesa kwikizha mizhazhi mu muchima wanji. (Mat 13:19-23), wianemba pa muchima wanji (Sl 3:3-6; 7:1-4), kabiji ushikwa “mashinda a bubela” (Sl 119:104). Mwana Lesa byo ajinga pano pa ntanda, wamwesheshe kuba’mba uji na milangwe byo abujile kuchiina lufu lwa pa kichi kuba’mba afikizhe byaamba Binembelo, nangwa kya kuba kuba bino mwavwangilwe kufwa lufu lwatama lwa uno mutundu.—Mat 26:51-54.
w99 11/1 20 mafu. 6-7
Muchima wa Bumpanyi Wawama Bingi
Mfumu wamukazhi byo emwenejile byo aumvwangatu, waambile’mba: “Bakalume benu bemana kimye kyonse kwi anweba na kuteleka ku maana enu, bo ba lusekelo!” (1 Bamfumu 10:4-8) Kechi waambile’mba bakalume ba kwa Solomone batookwa mambo bengijila mfumu wanonka ne. Bino bakalume ba kwa Solomone batookelwe mambo batelekanga kimye kyonse ku maana Lesa o apeele Solomone. Uno mfumu wamukazhi wa ku Sheba ke wakumwenako wawama bingi ku bantu ba Yehoba lelo jino. Bantu ba Yehoba bateleka ku maana a Mulenga ne Mwananji, aye Yesu Kilishitu!
Kabiji kishinka kikwabo kyanema kiji mu byambo byalondelapo byaambile uno mfumu wa mukazhi bya kuba’mba: “Atotwe Yehoba Lesa wenu.” (1 Mfumu 10:9) Kyamweka, uno mfumu wa mukazhi wayukile kuba’mba Yehoba ye wapeele Solomone maana ne bunonshi bo ajinga nabo. Kino kishinka kyakwatankana bingi na byambo Yehoba byo abuujile bena Isalela. Wibabuujile’mba: “Mwafwainwa kuteshako muchima kwialondela, mambo bantu bakomvwa ano malamuna bakamona’mba mwi ba maana kabiji mwi ba milangwe, ne abo bakamba’mba, ‘Kino kisaka kikatampe kiji na bantu ba maana kabiji ba milangwe.’”—Mpitulukilo ya mu Mizhilo 4:5-7.
w07 8/1 29 jifu. 13
Nanchi Muji “Na Bya Bunonshi Mwi Aye Lesa Nyi”?
13 Umvwe Yehoba wauba’mba apane mfweto ku bantu banji, kimye kyonse upana byalumbuluka. (Yakoba 1:17) Kya kumwenako, kimye Yehoba kyo apele bena Isalela mpunzha ya kwikalamo, yajinga “ntanda yavula mukaka ne buki.” Nangwa kya kuba ntanda ya Ijipita nayo yajinga byonka bino, pano bino ntanda yo apaine Yehoba ku bena Isalela yapuseneko mu jishinda jimo janema. Mosesa waambijile bena Isalela amba: “Yo ntanda yo alama bulongo Yehoba Lesa wenu.” Mu ñambilo ikwabo, bakonsheshe kwikala bulongo mambo Yehoba ye wafwainwe kwibalamanga. Bena Isalela byo baikele bakishinka kwi Yehoba, wibapesheshenga kabiji baikelenga bwikalo bwawama bingi kukila mikoka ikwabo yonse ibazhokolokele. Ee, mapesho a Yehoba “o alengela muntu kunonka”!—Kubala 16:13; Mpitulukilo ya mu mizhilo 4:5-8; 11:8-15.
Kukeba Bishinka Bikwabo Byanema
w04 9/15 25 jifu. 3
Mambo a Yehoba o Omi Bishinka Bikatampe Kufuma mu Buku wa Mpitulukilo ya mu Mizhilo
4:15-20, 23, 24—Nanchi kukanya kusonga bankishi kulumbulula’mba kyatama kusonga nangwa kulenga bipikichala bya kukobaika’mba bimwekenga kipale nyi? Ine. Kukanya kwatongolwa pano kwajinga kwa kusonga bankishi ba kupopwela—‘kupopwela bankishi ne kwibengijila.’ Binembelo kechi bikanya kusonga bya kusonga songa nangwa kulenga bipikichala bya kukobaika’mba bimwekenga kipale ne.—1 Bamfumu 7:18, 25.
JUNE 14-20
BYA BUNEME BIJI MU MAMBO A LESA |MPITULUKILO YA MU MIZHILO 5-6
“Funjishainga Baana Benu Kutemwa Yehoba”
w05 7/1 ma.14-15 jifu. 11
Anweba Bansemi, Mwenai ba mu Kisemi Kyenu Bibafwainwa
11 Pa uno mutwe, kinembelo kya Mpitulukilo ya mu mizhilo 6:5-7 kyaingijishiwa javula kukila binembelo bikwabo mu Baibolo. Mwane zhikulai Baibolo wenu ne kutanga bino byepelo. Apano, bansemi bakambizhiwa patanshi abo bene kukosesha bumupashi bwabo, kumutemwa Yehoba ne kulama byambo byanji. Ee, mwafwainwa kwikala na mukoyo wa kufunda Byambo bya Lesa, kutanga Baibolo kimye kyonse ne kulangulukanga pa byo mwatanga kuba’mba muyukishe bijimo ne kutemwa mashinda, mafunde, ne mizhilo ya Yehoba. Kikafumamo, michima yenu ikayula na bukine bwa mu Baibolo bukemulengela kwikala ba lusekelo, ne kwikala na moyo ne butemwe bwa kutemwa Yehoba. Mukekala na bintu byavula byawama bingi bya kufunjisha baana benu.—Luka 6:45.
w07 5/15 15-16
Nakonsha Kufunjisha Byepi Baana Bami Bulongo?
Bintu byo mwanemeka bingi, bintu byo mulangulukapo, bintu byo mukebesha kuba ne bintu byo mwatemwa bimwekela kechi mu byo mwambapotu ne, bino kikatakata mu byo muba. (Loma 2:21, 22) Kufumatu ku bulukeke, baana bafunda bintu byavula kupichila mu kumona byuba bansemi babo. Baana bayuka bintu byanemeka bansemi babo, kabiji nabo bino bintu bebinemeka bingi. Baana benu bayuka inge mwatemwa Yehoba kya kine. Mambo bamona inge mwanemeka bintu nabiji kutanga Baibolo ne lufunjisho lwa pa bunke. Baana benu bayuka inge mutangizhako Bufumu patanshi mu bwikalo bwenu. (Mateo 6:33) Kabiji kubula kushala ku kupwila kwa bwina Kilishitu, kukumbulapo ne kupayankana mu mwingilo wa kusapwila pa Bufumu kukalengela baana benu kuyuka’mba kwingijila Yehoba kyo kintu kyo mwanemeka mu bwikalo bwenu.—Mateo 28:19, 20; Bahebelu 10:24, 25.
w05 7/1 12 jifu. 14
Anweba Bansemi, Mwenai Ba Mu Kisemi Kyenu Bibafwainwa
14 Byonka byo kyamweshiwa mu Mpitulukilo ya mu mizhilo 6:7, kuji bimye byavula bingi anweba bansemi byo mwakonsha kwisambilamo na baana benu bintu bya ku mupashi. Kikale muji pa lwendo, mubena kwingijila pamo, nangwa kukokolokela pamo, mwakonsha kumonapo bimye byawama kufunjishishamo baana benu bintu bya ku mupashi. Pano bino kechi mwafwainwa kukulakanya na “kufunjisha” baana benu kimye kyonse bukine bwa mu Baibolo kya kuba bakankalwa ne pa kupemena ne. Mwafwainwa kumona’mba misambo ya kisemi kyenu ibena kwamba pa bintu bya ku mupashi. Kya kumwenako, magazini wa Loleni! wikala na mitwe yavula yamba pa bintu byapusana pusana. Mitwe ya uno mutundu yakonsha kupana jishinda ja kwisambilamo pa banyama bo alengele Yehoba, mapunzha a buya mwaya ntanda, kabiji ne bisho ne ngikelo ya bantu yapusana pusana. Ino misambo yakonsha kulengela bakyanyike kutanga mabuku avula anengezha jibumba ja kalume wa kishinka ne wa maana.—Mateo 24:45-47.
Kukeba Bishinka Bikwabo Byanema
Butemwe ne Bunchibamambo Bwaoloka mu Kimye kya Bena Isalela
11 Byo tufunjilako: Yehoba kechi umonatu mwekelo ya muntu ne. Aye umona byo tuji mukachi, mu muchima wetu. (1 Sam. 16:7) Kafwako mulanguluko nangwa kyubilo kyakonsha kufyama kwi aye ne. Ukeba byawama mwi atweba ne kwitutundaika. Ukeba’mba tuyukenga milanguluko yatama ne kwiichinuzhuka saka tukyangye kuba byatama.—2 Moba 16:9; Mat. 5:27-30.
JUNE 21-27
BYA BUNEME BIJI MU MAMBO A LESA | MPITULUKILO YA MU MIZHILO 7-8
‘Kange Mukasongozhanyenga Nabo Ne’
Mambo ka Lesa o Akambizhizhe Bapopweshi Banji Kusongola Nangwa Kusongolwatu Kana ku Bakwabo ba mu Lwitabilo?
Yehoba wayukile kuba’mba Satana ukeba kongola bantu ba Lesa kuba’mba bapopwelenga bankishi. Onkao mambo Lesa wajimwineko bantu banji amba bantu babula kwitabila “bakongola baana benu kufuma kwi Lesa ne kuya na kwingijila balesa bangi.” Kino kyajinga kizumba kikatampe. Inge kisaka kya bena Isalela batendeka kupopwela bankishi, Lesa walekanga kwibapesha ne kwibazhikijila. Inge kyaikala bino ko kuba’mba bumi bwabo buji mu kizumba ku balwanyi babo. Kino kisaka inge bekizhiile, inge kechi mwakonsheshe kufuma Mesiasa ne. Satana wayukile po aimene pa kukeba kongola bena Isalela kuba’mba basongolenga bantu babula kwitabila.
Mukambizho wa Kusongolwatu “Monka mwi Nkambo” Nanchi ne Luno Ukingila Nyi?
Nangwa byonkabyo, Yehoba mu Mambo anji wakambizha kuba’mba mwafwainwa kusongolwatu kanatu monka mwi Nkambo. Mambo ka? Mambo wayuka byawamina bantu banji. Kechi uzhikijilatu bakalume banji ku bintu bifuma mu kuba bintu byatama ne, bino ukeba ne kuba’mba bekalenga na lusekelo. Mu moba ajingako Nehemiya, Bayudea bavula basongwelenga banabakazhi babulanga kupopwela Yehoba. Nehemiya wibavulwilemo bintu byatama byamwekejile Solomone. Nangwa kya kuba Solomone “bamutemenwe kwi Lesa wanji, . . . bino banabakazhi ba mu byalo bingi bamulengejile kulenga mambo.” (Ne. 13:23-26) Pa kuba’mba bapopweshi banji bamwenemo byawama, Lesa wibakambizha kusongolwatu ku bakwabo bapopweshi bakine. (Sala. 19:7-10; Isa. 48:17, 18) Bena Kilishitu bakine bamusanchila bingi Lesa pa byo ebata muchima kabiji bakookela byo ebabula. Byo bamukookela byo aji Kalama, bamwesha’mba ye Nkambo Walengele Bintu Byonse.—Maana 1:5.
Jimukai na Bantu bo Mupwanañana Nabo mu ano Moba Apelako
12 Bena Kilishitu bakatanda ne bazhike bafwainwa kwibikishako kusala bulongo balunda nabo, kikatakata kimye kyo bakeba kutwela mu masongola. Mambo a Lesa etujimunako amba: “Kechi mwikase kikonkoji kimo na babula kwitabila ne. Nanchi bololoke ne bubi byendela pamo nyi? Nangwa kyeya ne mfishi byumvwañana nyi?” (2 Ko. 6:14) Baibolo wajimunako bakalume ba Lesa bakeba kutwela mu masongola amba, bafwainwa kusongola nangwa kusongolwa “kanatu monka mwi Nkambo.” Kino kibena kulumbulula amba bafwainwa kutwelatu mu masongola na mupopweshi wa Yehoba wabatizhiwa ulondela bifunjisha Baibolo. (1 Ko. 7:39) Inge mwatwela mu masongola na mwina Kilishitu mukwenu, mukekala na mulunda wa kwimukwasha kutwajijila kwikala ba kishinka kwi Yehoba.
Kukeba Bishinka Bikwabo Byanema
Yehoba Witupa Kajo Ketu ka pa Juba pa Juba
4 Milombelo yetu ya kulomba kajo ketu ka pa juba pa juba yafwainwa ne kwituvululako byo twafwainwa kukeba kajo ka ku mupashi pa juba pa juba. Nangwa kya kuba Yesu waikele na nzala pa kimye kyabaya, wakaine byamwesekelenga Satana amba ambile mabwe aluke ke bashinkwa. Waambile’mba: “Kyanembwa’mba, Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.” (Mateo 4:4) Apano Yesu waambile byambo bya kwa Mosesa, awo waambijile bena Isalela amba: “[Yehoba] wimupelwile ne kwimuleka’mba mufwe ku nzala, ne kwimujisha na manna o mwabujile kuyuka nangwa bashakulu benu ne; amba emuyukishe kino, amba muntu kechi umwena bumi mu kajo konka ne, poso mu byambo byonse bifuma mu kanwa ka Yehoba momo amwena bumi muntu.” (Mpitulukilo ya mu mizhilo 8:3) Jishinda joaingijishe Yehoba kupainamo manna jajinga jakupelamo bena Isalela kajo ka ku mubiji ne lufunjisho lwa ku mupashi. Lufunjisho lumo lwa ku mupashi lwajinga lwa kuba’mba bafwainwe “kutola kajo ka pa jonkaja juba.” Umvwe batola byavula byakilaila pa juba jimo, byashajilepo byatendekele kununka ne kuba mapila. (Kulupuka 16:4, 20) Bino, kino kechi kyaubiwe pa juba ja butanu na bumo kimye kyo batolele kajo ka moba abiji ka kuja kufika ne juba ja Sabado ne. (Kulupuka 16:5, 23, 24) Onkao mambo, ano manna ebavulwilengamo kuba’mba bafwainwe kwikala ba lukookelo ne kuba’mba bumi bwabo kechi bwaimenejile pa shinkwa yenka ne, bino bwaimenejile pa “byambo byonse bifuma mu kanwa ka Yehoba.”
TAIKO MUCHIMA KU MWINGILO WA KUSAPWILA
Kange Muvulame Yehoba Ne
Kukebesha Bololoke Kwituzhikijila
14 Byo kwashajile tiki kuba’mba bena Isalela batwele mu Ntanda ya Mulaye, Yehoba wibajimwine’mba kechi bafwainwa kumuvulama ne. Wibambijile’mba: “Jimukai mwakeya kuvulama Yehoba Lesa wenu pa kubula kulama mikambizho yanji, ne byatongolwa byanji ne malamuna anji byo mbenakwimukambizha ja lelo. Kuchina’mba, byo mukaja ne kwikuta, ne kushimika mazubo awama ne kwikalamo mwaikalamo, ne byo bakaya na kuvula bañombe benu ne banyama ba mu matanga enu, kabiji ne siliva yenu ne ngolode yenu nayo ikavula, ne bintu byenu byonsetu bikavula, ponkapo michima yenu yakeya kwitota, ne anweba mwakamuvulama Yehoba Lesa wenu.”—Mpitulukilo ya mu mizhilo 8:11-14.
15 Nanchi kintu kya uno mutundu kyakonsha kumweka ne lelo jino nyi? Ee, kyakonsha umvwe saka tukebesha bintu byabula kufwainwa. Pano bino, inge twasambila kukebesha bololoke bwa Lesa, kiketulengela kunemeka mpopwelo ya kine mu bwikalo bwetu. Tukoba byonka bitutundaika Paulo amba, “kasa mupulusha bimye,” ne kuta muchima ku mwingilo wetu. (Kolose 4:5; 2 Timoti 4:2) Umvwe twatemwako bya lusangajiko kukila kutemwa kupwila ne mwingilo wa mu bujimi, kyakonsha kwitulengela kumuvulama Yehoba twamubika pa kifulo kya bubiji mu bwikalo bwetu. Paulo waambile’mba, mu moba akapelako, bantu bakekala “ba kutemwa bya lusangajiko, ne kutemwa Lesa ne.” (2 Timoti 3:4) Bena Kilishitu bakine bepesapesa abo bene ne kumona kuba’mba kechi baji na ino milanguluko ne.—2 Kolinda 13:5.
JUNE 28–JULY 4
BYA BUNEME BIJI MU MAMBO A LESA | MPITULUKILO YA MU MIZHILO 9-10
“Ñanyi Kintu Yehoba Lesa Wenu kyo Abena Kwimukebela?”
Ñanyi Bintu Yehoba byo Akeba’mba Tubenga?
Ñanyi kintu kyafwainwa kwitulengelanga kukookela Yehoba kufuma panshi ya muchima? Mosesa watongolapo kimo. Waambile’mba: “Kwakamwa Yehoba Lesa wenu.” (Kyepelo 12) Uno kechi moyo wa kuchiina kwitukambula ne. Bino ke moyo wawama wa kunemeka Lesa ne mizhilo yanji. Inge twaikala na uno moyo, tukachinuzhukanga kufichisha Lesa ku muchima.
Pano ñanyi kintu kitanshi kyafwainwa kwitulengelanga kukookela Lesa? Mosesa waambile’mba: “Kumutemwa, kumwingijila Yehoba Lesa wenu na muchima wenu yense ne na mweo wenu yense.” (Kyepelo 12) Kutemwa Lesa mwavwangwa byavula kechi byo tumvwatu ku muchima ne. Buku umo waamba’mba: “Byambo bya Kihebelu bilumbulula byo tumvwa, bilumbulula ne byo tuba inge twaumvwa byobyo.” Uno yenka buku waamba ne kuba’mba kutemwa Lesa kulumbulula “kuba bintu na mambo a kutemwa” Lesa. Ko kuba’mba inge twatemwa Lesa, tukobanga bintu byo twayuka’mba bimutokesha ku muchima.—Byambo bya Maana 27:11.
Ñanyi Bintu Yehoba byo Akeba’mba Tubenga?
Kukookela Lesa na muchima yense mufuma byawama bingi. Mosesa wanembele’mba: ‘Lamainga mikambizho yo mbena kwimukambizha lelo, pa kuba’mba mukamwenemo byawama.’ (Kyepelo 13) Kye kine, kukookela byonse bitukambizha Yehoba mufuma byawama bingi. Kechi mwakonsha kufuma byatama nangwa pachechetu ne. Mambo Baibolo waamba’mba “Lesa butemwe.” (1 Yoano 4:8) Witupa mikambizho yanji mambo ukeba’mba twikalenga bulongo luno ne myaka ne myaka. (Isaya 48:17) Kuba byonse bitukambizha Yehoba kuketulengela kubula kwiletelela luno kabiji kulutwe tukekala bulongo myaka ne myaka na kwiyowa bintu byawama bikaleta Bufumu bwanji byo bukatendeka kulama.
Nanchi Kine Mwakonsha ‘Kufwenya Kwipi ne Lesa’ Nyi?
2 Abalahama wajingako kala ke umo wa bantu bepwilulukile na Lesa. Yehoba wamutelele uno mushakulu amba “mulunda nami.” (Isaya. 41:8) Ee, Yehoba wamumwene Abalahama amba mulunda nanji. Abalahama wajinga mulunda nanji wa pa muchima mambo “wamwitabile Lesa.” (Yakoba 2:23) Ne lelo jino, Yehoba ‘wata muchima’ aba bamwingijila mu butemwe. (Mpitulukilo ya mu mizhilo 10:15) Mambo anji akambizha’mba: “Fwenyai kwipi ne Lesa, kabiji ne aye ukafwenya kwipi ne anweba.” (Yakoba 4:8) Mu bino byambo tutanamo lwito ne mulaye.
Kukeba Bishinka Bikwabo Byanema
it-1 103
Anaki
Kino ke kisaka kya bantu bazamine bingi baikalanga ku mpunzha ya mitumba mu Kenana ne ku musezho wa kalunga ka mema na ku bulenge. Pa kimye kimo, banabalume basatu bena Anaki bayile bingi nkuwa abo ba Ahimanyi, Sheshai ne Talamai baikalanga ku Hebulona. (Ba 13:22) Ku ino mpunzha, bamwendela ntanda 12 Bahebelu koko bamwene bena Anaki pa kimye kitanshi. Bamwendela ntanda 10 babwezhezhe sawakya waumvwishishe bantu moyo. Baambilenga’mba bano banabalume bajinga baana ba Banefili bajingako Muyulo wa Nowa saka akyangye kwiya. Kabiji amba pa kwiesakanya kwi abo bamwekelengatu nobe “batete.” (Ba 13:28-33; Mpi 1:28) Jizhina ja Anaki jojo batendekele kutela ne bantu bonse bazamine nabiji bena Emi ne bena Lefwaimu. Kabiji bulume bwa bena Anaki bwalengejile kwaikala ne ñambilo ya kwitakaika ya kuba’mba: “Ñanyi wakonsha kwimena bena Anaki?”—Mpi 2:10, 11, 20, 21; 9:1-3.