Yosefwa wajinga mwana wa kwa Yakoba. Ye waichile mukala, kabiji wajinga na bakolojanji bavula. Bakolojanji bamwene kuba’mba bashanji bamutemenwe bingi kukila baana babo bonse. Walanguluka’mba baumvwanga byepi pe Yosefwa? Bamumvwinanga kichima kabiji bamupachile bingi. Yosefwa byo alotele biloto bya kukumya, wabuujile bakolojanji byo alotele. Kino kibalengejile kulanguluka’mba bino biloto bibena kulumbulula’mba juba jimo bakamufukaminanga. Kino kibalengejile kumushikwa bingi.

Juba jimo, bakolojanji Yosefwa bafungilenga mikooko mu mpunzha yajinga kwipi na muzhi wa Shekema. Yakoba watumine Yosefwa kuya na kumona byajinga bakolojanji. Bakolojanji byo bamwene Yosefwa na kwiya palepa byobya, baambile mulwabo amba: ‘Awa ulota biloto waiya. Twayai tumwipaye.’ Bamukwachile ne kumutaya mu mushima wazhika. Bino kolojanji umo, aye Yuda waambile’mba: ‘Kumwipaya ne. Twayai tumupoteshe mu buzha.’ Yosefwa bamupoteshe na mali a siliva 20 ku bena Mijanyi bayilenga ku Ijipita.

Bakolojanji Yosefwa batumpile munkukumba wanji mu mashi a mbuzhi ne kutwala uno munkukumba ku bashabo ne kwibepuzha’mba: ‘Nanchi uno kechi ye munkukumba wa mwanenu nenyi?’ Yakoba walangulukile’mba Yosefwa bamuja ku nyama mukaji wa mungye. Waumvwine bingi bulanda. Kya kuba kafwako wakonsheshe kumutekenesha ne.

Mu Ijipita, Yosefwa bamupoteshe kwi Potifwalo, wajinga kilolo mukatampe. Bino Yehoba wajinga ne Yosefwa. Potifwalo wamwene’mba Yosefwa wawamine muchima kabiji waingilanga bingi. Yosefwa bamukete kejile bingi. Onkao mambo, Potifwalo wapele Yosefwa mwingilo wa kutala pa bintu byanji byonse.

Muka Potifwalo wakumbwanga Yosefwa mambo wazamine kabiji walambile bingi. Waambilanga Yosefwa pa juba pa juba amba alaale nanji. Yosefwa waubile byepi? Wakananga, ne kwamba’mba: ‘Nakana. Kuba byobyo kwatama. Bankambo banketekela bingi, kabiji anweba mwi bakazhi babo. Inge nalaala ne anweba, nsakulenga mambo kwi Lesa.’

Juba jimo, muka Potifwalo wakanjikizhenga Yosefwa amba alaale nanji. Wamukwachile mu kivwalo, bino Yosefwa wanyemene. Potifwalo byo abwelele ku nzubo, mukazhanji wabepele’mba Yosefwa waji kukebanga kumuba kyatama. Potifwalo wazhingijile bingi ne kutaya Yosefwa mu kaleya. Bino Yehoba kechi wamulubileko Yosefwa ne.

Yosefwa byo ajinga mu kaleya, Felo mfumu wa Ijipita walotele biloto. Bonse bakankelwe kulumbulula mwatajile bino biloto. Kalume wanji umo wabuujile Felo amba Yosefwa wakonsha kulumbulula mwatala bino biloto. Ponkapo, Felo watumine bantu amba baye na kwita Yosefwa.

Felo wamwipwizhe’mba: ‘Nanchi wakonsha kulumbulula mwatala bino biloto nyi? Yosefwa wabuujile Felo amba: ‘Kyalo kya Ijipita kikekala na kajo kavula pa myaka itanu na ibiji, kabiji myaka ikwabo itanu na ibiji mukekala kipowe kya nzala. Salai muntu uji na maana anengezhenga kajo pa kuba’mba bantu bakabule kufwa ku nzala.’ Felo wamwambijile’mba: ‘Nasala yenka obewa! Nakupa bulume kabiji ukekala wa kibiji mu kyalo kya Ijipita!’ Yosefwa wayukile byepi mwatajile biloto byalotele Felo? Yehoba ye wakwashishe Yosefwa.

Pa myaka itanu na ibiji, Yosefwa wanengezhezhenga kajo. Pano pa ntanda ponse paikele kipowe kya nzala pa myaka itanu na ibiji, byonkatu byaambile Yosefwa. Bantu bafuminenga mu byalo byapusana pusana kuya na kupota kajo kwi Yosefwa. Shanji aye Yakoba byo aumvwine’mba mu Ijipita muji kajo, watumine baana banji jikumi kuya ku Ijipita na kupota kajo.

Baana ba kwa Yakoba byo bayile kwi Yosefwa, aye wafikenejiletu wibayuka. Bino bakolojanji kechi bamuyukile ne. Bamufukamijile, byonkatu byo alotele saka akiji mwanyike. Yosefwa wakebelenga kuyuka inge bakolojanji bakimushikwa. Onkao mambo wibambijile’mba: ‘Anweba bantu mwi bamwendela ntanda. Mwaiya na kumona byo mwakonsha kulukuka kyalo kyetu.’ Abo bamukumbwile’mba: ‘Ine mwane! Twafuma ku kyalo kya Kenana. Bonse pamo twajinga baana 12, bino nkasetu umo wafwa. Mukala washala ne batata.’ Kepo Yosefwa ebambijile’mba: ‘Yainga mukaleta yewo mukala, popo nsakuswa’mba mwaamba kine.’ Onkao mambo babwelele kwi bashabo.

Kajo byo kapwile mu kisemi kya kwa Yakoba, watumine baana banji jikwabo ku Ijipita. Byo bayilenga, basendele Benjamina nkasabo. Pa kweseka bakolojanji, Yosefwa wabikile katomeno mu jisaka ja kwa Benjamina ne kwibambila’mba baiba katomeno. Bakalume ba kwa Yosefwa byo bataaine katomeno mu jisaka ja kwa Benjamina, bakolojanji baumvwine bingi bulanda. Onkao mambo, basashijile Yosefwa amba aleke Benjamina ayenga, akambwilemo abo.

Yosefwa popo ayukile’mba bakolojanji baikala na michima yawama. Yosefwa wakankelwe kuchinchika. Watendekele kujila, kabiji wibabuujile’mba: ‘Yami Yosefwa nkasenu. Nanchi batata bakiji bomi nyi?’ Bakolojanji bakuminye bingi. Wibambijile’mba: ‘Kange mumvwe kutama pa byo mwangubile ne. Lesa ye wantumine kuno kuba’mba nkapulushe bumi bwenu. Pano yainga mukaleta batata.’

Bayile ku nzubo ne kubuula bashabo sawakya wawama ne kutwala bashabo ku Ijipita. Yosefwa ne bashanji ba Yakoba, bamonañene jikwabo saka papita myaka yavula bingi.