Bamwendela ntanda ba bena Isalela byo batwelele mu muzhi wa Yeliko, bafikijile mu nzubo ya mwanamukazhi wa jizhina ja Lehaba. Mfumu wa Yeliko bamubuujile pa kino, kabiji watumine bashilikale kuya ku nzubo ya kwa Lehaba. Lehaba wafile bano bamwendela ntanda pa musemi ne kubuula bashilikale amba bano banabalume baya. Waambijile bamwendela ntanda amba: ‘Nsakwimukwasha mambo nayuka’mba Yehoba uji ne anweba, ne kuba’mba mukashinda kino kyalo. Ndayai kuba’mba mukampulusha pamo na ba mu kisemi kyami.’

Bamwendela ntanda babuujile Lehaba amba: ‘Twalaya kuba’mba kafwako nangwa umo ukafwa pa bonse bakekala mu nzubo yobe ne. Ukakase uno lutambo uchila pa kipenze, kabiji kisemi kyobe kikapuluka.’

Lehaba waikizhe bamwendela ntanda na lutambo ye akashile pa kipenze. Bayile ku mitumba ne kufyama konka pa moba basatu, apa bino babwela kwi Yoshua. Kepo bena Isalela baabukile Mukola wa Yodano ne kwinengezha kutambula yoya ntanda. Muzhi wa Yeliko ye muzhi mutanshi ye bashinjile. Yehoba wibabuujile’mba bazhokolokenga uno muzhi jimo pa juba pa juba, pa moba atanu na jimo. Bino pa juba ja butanu na bubiji, bazhokolokele uno muzhi bimye bitanu na bibiji. Kepo bañanga bavuminye matolompita, ne bashilikale babijikile na mawi a peulu. Nsakwa ya Yeliko yakundukile. Bino nzubo ya kwa Lehaba nangwa yajiinga pa nsakwa yo yonkatu yashajilepo. Lehaba ne ba mu kisemi kyanji bapulukile mambo waketekejile mwi Yehoba.

Nkuwa ya kyamwekejile muzhi wa Yeliko yaumvwanyikile monse mu kyalo kya Kenana. Bamfumu bakonkene pamo ne kumvwañana kuba’mba balukuke bena Isalela. Bino bena Gibeona bafuukwilepo kuba kintu kyapusanako. Bayile kwi Yoshua saka bavwala bivwalo byatabauka ne kwamba’mba: ‘Twafuma ku kyalo kiji kwalepa bingi. Twaumvwa nkuwa ya Yehoba, ne bintu byonse byo emubijile mu Ijipita ne mu Moabu. Mwane tulayai kuba’mba kechi muketulukuka ne, kabiji atweba tukekala bazha benu.’

Yoshua waswile byo baambile kabiji wibalayile’mba kechi bakebalukuka ne. Byo papichile moba asatu, waumvwine kuba’mba kechi bafumine ku kyalo kya kwalepa ne. Nabo baikalanga monka mu ntanda ya Kenana. Yoshua waipwizhe bena Gibeona amba: ‘Mambo ka o mwitubepejile?’ Bamukumbwile’mba: ‘Twaumvwine moyo. Twayuka kuba’mba Yehoba Lesa wenu ubena kwimulwilako makondo. Mwane kange mwitwipaye ne.’ Yoshua walamine mulaye wanji, kabiji kechi wibepayile ne.

Kechi papichile ne moba avula ne, bamfumu batanu ba mu ntanda ya Kenana bakonkene amba balukuke bena Gibeona. Yoshua ne nzhita yanji baendele bufuku bonse kuya na kupulusha bena Gibeona. Batendekele kulwa lukelo. Bena Kenana bapalañenejilemo na kunyema. Konse ko banyemejilenga, Yehoba wibepailenga na mvula wa mabwe. Kepo Yoshua alombele kwi Yehoba amba emike juba. Mambo ka Yoshua o alombejile kintu kya uno mutundu kyabujile kumwekapo kala? Mambo Yoshua waketekejile mwi Yehoba. Ne kya kine juba jaimene kabiji kechi jazhikile ne, kufikatu ne bena Isalela byo bashinjile bamfumu ba bena Kenana ne mazhita abo.