Yoshua watangijile bantu ba Lesa pa myaka yavula bingi, kabiji wafwile byo afikizhe myaka 110. Byo akijinga mumi, bena Isalela bapopwelangatu bulongo Yehoba. Bino Yoshua byo afwile, batendekele kupopwela bankishi, byonka byaubanga bena Kenana. Na mambo a kuba’mba bena Isalela balekele kupopwela Yehoba, Yehoba waswishishe mfumu wa bena Kenana aye Yabina kwibamanyika. Bantu batendekele kusashijila Yehoba amba ebakwashe. Yehoba wibapele ntangi mukwabo, aye Balaka. Uno ntangi wakwashishe bantu kubwela kwi Yehoba.

Kwajinga ngauzhi wamukazhi, jizhina janji wajinga Debola. Debola watumine muluwe wa kwita Balaka. Wakebelenga kumubuula byaambile Yehoba amba: ‘Senda banabalume 10,000, uye na kulwa na nzhita ya kwa Yabina ku kakola ka Kishonyi. Akuno koko ukashinjila Sisela, mukulumpe wa bashilikale ba kwa Yabina.’ Balaka waambijile Debola amba: ‘Nsakuyatu inge muswe kuya ne amiwa.’ Debola wamwambijile’mba: ‘Nsakuya nobe. Bino kechi yobe usakwipaya Sisela ne. Yehoba waamba’mba mwanamukazhi ye usakumwipaya.’

Debola wayile ne Balaka ne nzhita yanji ku Mutumba wa Tabola na kwinengezha kuya ku nkondo. Sisela byo aumvwinetu bino, wakonkenye makalaki anji a nkondo ne bashilikale banji mu kimpachiko. Debola waambijile Balaka amba: ‘Lelo jo juba Yehoba jo asakukukwasha kushinda.’ Balaka ne banabalume 10,000 bakunkulukile pa mutumba ne kuya na kulwa na bashilikale ba kwa Sisela.

Kepo Yehoba alengejile kakola ka Kishonyi kuyula. Makalaki a kwa Sisela atapamine mu mateshi. Sisela washile kalaki wanji ne kutendeka kunyema. Balaka ne nzhita yanji bashinjile bashilikale ba kwa Sisela, bino Sisela aye wanyemene! Wanyemene ne kuya na kufyama mu tente wa mwanamukazhi wa jizhina ja Yaela. Yaela wapele Sisela mukaka. Byo atome walajile, wamuvweta ne mwemba. Ponkapotu Sisela waponejile mu tulo. Yaela wasendele lupopo ne kuya pacheche kwalaajile Sisela ne kumupopa lupopo mu mutwe ne kumwipaya.

Balaka waishile na kukeba Sisela. Yaela walupukile mu tente wanji ne kwamba’mba: ‘Twelai mukachi. Mumone mwanamulume ye mubena kukeba.’ Balaka byo atwelele mukachi wataine Sisela wafwa. Balaka ne Debola baimbile lwimbo wa kutota Yehoba pa byo akwashishe bena Isalela kushinda balwanyi babo. Kabiji bena Isalela baikele mu mutende pa myaka 40.

Kimye kimo, mu Isalela mwajinga kipowe kya nzala. Mwina Isalela wa jizhina ja Naomi wayile ku Moabu na mwatawanji ne baana babo babalume babiji. Byo papichile myaka, bamwatawanji bafwile. Baana banji basongolwe banabakazhi bena Moabu, umo wajinga Luta, mukwabo wajinga Olipa. Kyataminekotu ke kya kuba’mba, baana ba kwa Naomi babalume nabo bafwile.

Naomi byo aumvwine’mba kipowe kya nzala kyapwa mu Isalela, wafuukwilepo kubwela ku Isalela. Luta ne Olipa nabo bafuukwilepo kuya pamo ne Naomi, bino byo baendeleko pacheche, Naomi wibambijile’mba: ‘Balokazhi bami mwaikalanga bingi bulongo na baana bami, kabiji ne amiwa mwandamine bulongo. Mbena kukeba’mba mukasongolwe jikwabo. Bwelaimo kwenu ku Moabu.’ Luta ne Olipa baambile’mba: ‘Twimutemwa bingi! Kechi tukeba kwimusha ne.’ Bino Naomi watwajijile kwibambila’mba bwelaimo. Kyapeleleko Olipa wabwelelemo, bino Luta aye wakaine kubwelamo. Naomi wamwambijile’mba: ‘Mona, Olipa wabwela ku balongo banji ne ku balesa benu. Ne obewa bwelamo.’ Bino Luta wamwambijile’mba: ‘Kechi nsakwimusha ne. Balongo benu bakekala balongo bami, ne Lesa wenu ukekala Lesa wami.’ Naomi waumvwine byepi Luta byo amwambijile bino byambo?

Luta ne Naomi bafikile mu Isalela mu kimye kya kunowa mbaale. Juba jimo, Luta wayile na kupupula kajo mu bujimi bwa kwa Boaza. Boaza wajinga mwana wa kwa Lehaba. Uno mwanamulume waumvwine kuba’mba Luta wajinga mwina Moabu, ne kuba’mba wakwashishe bingi Naomi. Waambijile ba mwingilo banji amba bashemo mbaale imo mu bujimi pa kuba’mba Luta apupule.

Aja juba mabanga, Naomi waipwizhe Luta amba: ‘Wajinga mu bujimi bwa kwa ñanyi lelo?’ Luta wakumbwile’mba: ‘Mu bujimi bwa kwa Boaza.’ Naomi wamwambijile’mba: ‘Bamwatawami bajinga balongo ba kwa Boaza. Utwajijile kwingila mu buji bwanji pamo na banabakazhi bakwenu. Mambo kafwako kyatama kikakumwekela mu buno bujimi ne.’

Luta watwajijile kwingila mu bujimi bwa kwa Boaza, kufikatu ne kimye kya kunowa byo kyapwile. Boaza wamwene Luta byo aingilanga na ngovu kabiji wajinga mwanamukazhi wawama bingi. Mo oa moba, inge mwanamulume wafwa kwa kubula kusemapo baana babalume, mulongo wanji wamulume wasongolanga mukazhanji ye asha. Onkao mambo, Boaza wasongwele Luta. Basemene mwana wamulume ne kumutumba’mba Obeda, kabiji uno Obeda ye wajinga nkambo yanji Mfumu Davida. Balunda ba kwa Naomi basangalele bingi. Bamwambijile’mba: ‘Patanshi Yehoba wakupele Luta, kabiji Luta wakukwasha bingi, pano luno uji ne na munkana. Yehoba atotwe.’