Byo papichile myaka, bena Isalela balekele kupopwela Yehoba ne kutendeka kupopwela balesa ba bubela. Bena Mijanyi baibanga banyama ba bena Isalela ne kwibonawina bijimwa byabo. Bena Isalela bafyamanga mu mitumba ne mu mayengo na mambo a kuchina bena Mijanyi. Bena Isalela bamujijiile Yehoba amba ebapokolole. Kepo, Yehoba atumine malaika kwi Gidiona. Malaika wamwambijile’mba: ‘Yehoba wa kusala kupokolola bantu banji.’ Gidiona wamwipwizhe’mba: ‘Nakonsha kupokolola byepi bena Isalela? Amiwa kafwako byo nji ne.’

Pano Gidiona wakonsheshe kuyuka byepi kuba’mba Yehoba wamusala kuba bino? Wabikile butonge panshi ne kwamba kwi Yehoba amba: ‘Kesha lukelo, buno butonge inge bukazobe na kime bino mushiji saka auma, popo nkayuka’mba kya kine mwakeba’mba nkapokolole bena Isalela.’ Byo abukile lukelo, butonge bwazobele na kime bino pa mushiji paumine. Kepo Gidiona alombele kwi Yehoba kuba’mba kesha lukelo butonge bukabule kuzoba bino mushiji akazobe. Abino byo byamwekele, Gidiona popo ashiinwe’mba kya kine Yehoba wamusala. Wakonkenye bashilikale banji pamo kuba’mba baye na kulwa na bena Mijanyi.

Yehoba waambijile Gidiona amba: ‘Nkalengela bena Isalela kushinda balwanyi babo. Bino na mambo a kuba’mba uji na bashilikale bavula, kwendapo kemulanguluke’mba mwashinda balwanyi benu na bulume bwenu. Ambila yense waumvwa moyo abwele ku nzubo.’ Bashilikale 22,000 babwelele ku mazubo abo. Washajiletu na bashilikale 10,000. Kepo Yehoba ambile’mba: ‘Bashilikale bakivula. Batwale ku mukola na kutoma mema. Usale yense usakukabaulanga mema aku na kukenkenta.’ Bashilikale 300 bo bonkatu bakenkentelenga pa kutoma mema. Yehoba walayile’mba bano banabalume 300 bo bakashinda bashilikale 135,000 ba bena Mijanyi.

Bonkabwa bufuku, Yehoba waambijile Gidiona amba: ‘Pano kimye kyafika kya kulukuka bena Mijanyi!’ Gidiona wapele banabalume bo ajinga nabo nsengo ne milondo ikatampe mo bafile nsoko ya mujilo. Wibambijile’mba: ‘Muntalenga, ne kuba byonkatu byo nsakubanga.’ Gidiona wavuminye lusengo ne kulala mulondo wanji, kabiji watambikile nsoko ya mujilo mwiulu ne kubijika’mba: ‘Mpoko ya kwa Yehoba ne ya kwa Gidiona!’ Banabalume bonse 300 nabo baubile byonka bino. Bena Mijanyi baumvwine bingi moyo ne kunyema, au janji au janji. Bavulañene ne kwialukilamo bene mulwabo. Yehoba wakwashishe bena Isalela kushinda balwanyi babo.

Kwajinga mwina Isalela wa jizhina ja Elekana, wasongwele mpaji, Hana ne Penina. Hana yeye atemenwe bingi. Penina waendangatu na kumuba mukeyu Hana mambo kechi wasemanga ne. Penina wajinga na baana bavula bingi. Pa mwaka pa mwaka, Elekana wayanga na kisemi kyanji ku Shilo ku tente wa lusambakeno. Juba jimo saka baji ku Shilo, wamwene kuba’mba Hana wajinga bingi na bulanda. Wamwambijile’mba: ‘Kileke kujila Hana. Nangwa mwana ufwaye, uji ne amiwa, nakutemwa bingi.’

Byo papichile kimye, Hana wayile na kulomba. Wajijilenga byo alombelenga kwi Yehoba. Wamulayile’mba: ‘Anweba Yehoba inge mukampe mwana wamulume, nkamupana kwi anweba, kabiji ukemwingijilanga mu bwikalo bwanji bonse.’

Ñanga Mukatampe aye Eli, byo amwene byatunwa bya kwa Hana na kuvwevweta, walangulukile’mba Hana wapendwa. Hana wamwambijile’mba: ‘Ine, Nkambo yami, kechi napendwa ne. Nji na lukatazho lukatampe bingi, lombena kubula Yehoba.’ Eli popo ayukile’mba waji kulubankanya kabiji wamwambijile’mba: ‘Lesa akupe kyonka kyo wamulomba.’ Hana waumvwine ne muchima waikila ne kuya wayile. Mwaka kechi wapwile ne kupwa ne, wasemene mwana wamulume ne kumutumba’mba Samwela. Hana waumvwine bingi bulongo.

Hana kechi walubileko byo alayile Yehoba ne. Hana byo amusumwine Samwela, wamutwajile ku tente wa lusambakeno kuba’mba akengijilenga konka. Hana waambijile Eli amba: ‘Uno ye mwana ye nalombelenga Yehoba nkumpa. Namupana kwi Yehoba kuba’mba amwingijilenga mu bwikalo bwanji bonse.’ Elikana ne Hana bayanga pa mwaka pa mwaka na kumona Samwela kabiji bamutwajilanga ne bya kuvwala. Yehoba wapele Hana ne baana babalume bakwabo basatu ne babakazhi babiji.