Bena Isalela balekele kwingijila Yehoba jikwabo kabiji batendekele kupopwela balesa ba bubela. Byo bebalukukile ku bena Amonyi, bano balesa ba bubela kechi bebakwashishe ne. Bena Isalela bamanamine pa myaka yavula bingi. Kyapeleleko, bamubujile Yehoba amba: ‘Twalenga mambo. Balombele’mba, tupokololai ku balwanyi betu.’ Bena Isalela baonawine bankishi babo ne kutendeka kupopwela Yehoba jikwabo. Yehoba kechi wakebelenga’mba batwajijile kumanama ne.

Mwanamulume wayukile bingi kulwa nkondo aye Yefita, bamutongwele kutangijila bantu bayilenga na kulwa na bena Amonyi. Walayile Yehoba amba: ‘Inge mwitukwasha kushinda nkondo, nkemupa muntu mutanshi ukafuma mu nzubo yami kwiya na kuntundaila.’ Yehoba waumvwine lulombelo lwa kwa Yefita kabiji wamukwashishe kushinda balwanyi banji.

Yefita byo abwelelenga ku nzubo, muntu mutanshi wafumine mu nzubo kwiya na kumutundaila wajinga mwananji wa mukazhi, uno ye mwanatu ye ajinga nanji. Waishilenga saka abena kuzha ne kwimba munsakayi. Yefita waubile byepi? Wavulukile mulaye wanji ne kwamba’mba: ‘Mama, mwanami wa mukazhi! Walala muchima wami. Nalayile mulaye kwi Yehoba. Pa kuba’mba uno mulaye na mufikizhe, wafwainwa kuya ku Shilo na kwingijila pa tente wa lusambakeno.’ Bino mwananji wamukazhi wamwambijile’mba: ‘Tata, inge mwalayile Yehoba, mwafwainwa kuba byonka byo mwalayile. Bino mbena kulomba bañondo babiji kuba’mba nkaye na balunda nami babakazhi ku mpunzha ya mitumba, apa bino nkaye ku Shilo.’ Mwana wa mukazhi wa kwa Yefita waingijile mu bukishinka pa tente wa lusambakeno mu bwikalo bwanji bonse. Pa mwaka pa mwaka, balunda nanji bayanga ku Shilo na kumupempula.

Ñanga Mukatampe Eli wajinga na baana babalume babiji. Bano baana bajinga bañanga pa tente wa lusambakeno, mazhina abo bajinga Hofini ne Finease. Kechi bakookelanga mizhilo ya Yehoba ne, kabiji bayanjishanga bingi bantu. Bena Isalela inge baleta milambo ya kupana kwi Yehoba, Hofini ne Finease basalangamo nyama yawama ne kwiisenda. Eli waumvwine byatama byaubilenga baana banji, bino kechi wibakajipilanga ne. Nanchi Yehoba waswishishe bino byubilo byatama kutwajijila nyi?

Hofini ne Finease bakomene, Samwela wajingatu mwanyike, bino kechi waubanga byatama byo baubanga ne. Yehoba watemenwe bingi Samwela. Juba jimo bufuku saka alaala, Samwela waumvwine muntu wamwichilenga. Wabuukile ne kuya kwajinga Eli ne kumwambila’mba: ‘Amiwa bano!’ Bino Eli wamwambijile’mba: ‘Kechi nakwitapo ne. Yanga ukalaale.’ Samwela wabwelele na kulaala. Bino ne jikwabo waumvwine muntu na kumwita, kabiji wayile kwi Eli. Samwela byo aumvwine muntu na kumwita ja busatu, Eli popo ayukile’mba Yehoba ye ubena kwita Samwela. Waambijile Samwela amba inge bamwite jikwabo, akumbule’mba: ‘Ambai Yehoba. Kalume wenu ubena kuteleka.’

Samwela wabwelele na kulaala. Waumvwine jikwabo muntu na kumwita’mba: ‘Samwela! Samwela!’ Wakumbwile’mba: ‘Ambai mwane, kalume wenu ubena kuteleka.’ Yehoba wamwambijile’mba: ‘Buula Eli amba nkamukambula ne kisemi kyanji. Wayuka’mba baana banji babalume babena kuba bintu byatama pa tente wa lusambakeno, bino kafwako kyo abena kubapo ne.’ Juba jalondejilepo, Samwela washinkwile bibelo bya ku tente wa lusambakeno, byonka byo aubanga jonse. Waumvwine moyo kubuula ñanga mukatampe bya mubuujile Yehoba. Bino Eli wamwichile ne kumwipuzha’mba: ‘Mwanami, Yehoba wakukubula’mba ka? Mbuuletu byonse.’ Samwela wabuujile Eli byonse byamubujile Lesa.

Samwela byo akomenenga, Yehoba watwajijile kumukwasha. Bantu bonse mu Isalela bayukile’mba Yehoba wasala Samwela kwikala ngauzhi ne kwikala mutonyi.