Solomone byo aikele mfumu wa bena Isalela, Yehoba wamwipwizhe’mba: ‘Ki ka kyo ukeba’mba nkupe?’ Solomone waambile’mba: ‘Nkiji mwanyike, kabiji kechi nayuka bintu byavula ne. Mwane mpai maana pa kuba’mba ngyuke bya kulama bantu benu.’ Yehoba waambile’mba: ‘Na mambo a kuba walomba maana, nsakukupa maana kukila bantu bonse baji pa ntanda. Kabiji nkakupa ne bunonshi bwavula bingi. Inge ukankookelenga, ukekala myaka yavula.’

Solomone watendekele kushimika nzubo ya Lesa. Waingijishe ngolode yawama bingi, ne siliva, ne bichi ne mabwe awama. Banabalume ne banabakazhi bavula bayukile kushimika baishile na kushimika nzubo ya Lesa. Byo papichile myaka itanu na ibiji, nzubo yapwile kabiji banengezhezhe kwiipana kwi Yehoba. Bashimikile ne kya kusokelapo bitapisho po basokejilenga bitapisho. Solomone wafukamine kulutwe ya kya kusokelapo bitapisho ne kulomba’mba: ‘Anweba Yehoba, ino nzubo kechi yabaya nangwa kuwama kya kuba’mba anweba mwaikalamo ne, pano bino tupeshai ne kumvwa milombelo yetu.’ Yehoba waubilepo ka pa ino nzubo ne pa byalombele Solomone? Aku Solomone upwishatu kulomba, mujilo wafumine mwiulu ne kusoka milambo yajinga pa kitapisho. Yehoba waswile kumupopwela mu ino nzubo. Bena Isalela byo bamwene kino, basangalele bingi.

Bantu bonse mu Isalela ne mu mapunzha a kwalepa bayukile’mba Mfumu Solomone wajinga bingi na maana. Bantu baiyanga kwi Solomone kuba’mba ebabuule bya kuba na makatazho abo. Ne mfumu wamukazhi wa ku Sheba wayishile na kumweseka na mepuzho akatazha. Pa kumvwa byakumbwile Solomone, uno mfumu waambile’mba: ‘Kechi naswile byambuujile bantu pe anweba ne, pano nemwena kuba’mba muji bingi na maana kukilatu ne byo bambuujile. Kya kine Yehoba Lesa wenu, wimupesha.’ Bena Isalela baikelenga bingi bulongo na lusekelo. Pano bino bintu byaalukile.

Kimye Solomone kyo apopwelanga Yehoba, mu Isalela mwajinga mutende. Bino Solomone wasongwele banabakazhi bavula ba mu byalo bingi. Bano banabakazhi bapopwelanga bankishi. Pachepache, Solomone naye watendekele kupopwela bankishi. Yehoba wazhingijile bingi. Waambijile Solomone amba: ‘Nkangata bufumu bwa Isalela kufuma ku kisemi kyobe ne kwibwabanya pakachi. Nkapana bufumu bukatampe ku wa mwingilo wobe, bino kisemi kyobe kikashalatu na kulama bufumu bucheche.’

Yehoba waubile kyamwesheshe’mba byo abuujile Solomone bikafika. Wa mwingilo umo wa kwa Solomone, aye Yeloboma wajinga pa lwendo. Byo ayilenga, wasambakene ngauzhi Ahiya. Ahiya watabawile kivwalo kyanji mu tubisapi jikumi na tubiji ne kwambila Yeloboma amba: ‘Yehoba ukangata bufumu bwa bena Isalela ku kisemi kya kwa Solomone ne kwibwabanya pabiji. Tolapo tubisapi jikumi, mambo yobe ukekala mfumu wa mikoka jikumi.’ Mfumu Solomone byo aumvwine kino, wakebelenga kwipaya Yeloboma. Yeloboma wanyemejile ku Ijipita. Byo papichile kimye, Solomone wafwile, kabiji mwananji aye Lehoboma waikele mfumu. Yeloboma byo aumvwine’mba Solomone wafwa, wabwelele ku Isalela.

Bakulumpe mu Isalela baambijile Lehoboma amba: ‘Inge mukalamenga bantu bulongo, bakemukookelanga.’ Bino bansongwalume bajinga balunda nanji Lehoboma bamubuujile’mba: ‘Kange umvwinenga bantu lusa ne. Obewa wibanungilengapo ne mingilo ikwabo yakosa.’ Lehoboma walondejile byamubuujile bansongwalume balunda nanji. Wakanamine bingi. Onkao mambo, bantu bamusatukijile. Bantu batongwele Yeloboma kwikala mfumu wa mikoka jikumi, kabiji ino mikoka batendekele kwiitela’mba, bufumu bwa bena Isalela. Mikoka ibiji yashajilepo batendekele kwitela’mba, bufumu bwa bena Yuda, kabiji ino mikoka yatwajijile kukookela Lehoboma amba ye mfumu. Mikoka ya Isalela jikumi na ibiji yaabenepo.

Yeloboma kechi wakebelenga bantu banji kuya ku Yelusalema na kupopwela Lesa ne, mambo Yelusalema wajinga mu bufumu bwa kwa Lehoboma. Wayuka kyalengejile nyi? Yeloboma wachiine’mba bantu bakonsha kumufutukamo ne kutendeka kukookela Lehoboma. Onkao mambo, walengele baana bañombe babiji bangolode ne kwambila bantu amba: ‘Ku Yelusalema kwalepa bingi. Mupopwelengatu konka kuno.’ Bantu batendekele kupopwela baana bañombe bangolode ne kuvulama Yehoba jikwabo.