Bamfumu bavula ba mikoka jikumi batamine bingi, bino Ahaba ye wakijilemo. Mukazhanji wakanamine bingi kabiji wapopwelanga Baela. Jizhina janji wajinga Yezebeli. Ahaba ne Yezebeli bakumbenye bupopweshi bwa Baela mu ntanda monse ne kwipaya bangauzhi ba Yehoba. Pano Yehoba waubilepo byepi? Watumine ngauzhi Elaija kwi Ahaba.

Elaija wabuujile Mfumu Ahaba amba na mambo a bintu byatama byo aubilenga, mvula kechi ikanoka mu Isalela ne. Pa myaka isatu, kajo kechi kamenenepo ne kabiji kwajinga bingi nzala. Yehoba watumine Elaija kuya jikwabo kwi Ahaba. Mfumu wamwambijile’mba: ‘Obewa ubena kunkatazha bingi. Yobe walengela bino byonse.’ Elaija wamukumbwile’mba: ‘Kechi yami nalengela’mba mvula ibule kunoka ne. Yenu mwalengela na mambo a kupopwela Baela. Tusakuba bino. Ambilai bantu bonse ne bangauzhi ba kwa Baela baye peulu ya Mutumba wa Kamela.’

Bantu bonse bayile ku mutumba. Elaija waambile’mba: ‘Ambai ye mukeba kulondela. Inge kya kuba Yehoba ye Lesa wa kine, mulondelai. Bino inge Baela, mulondelai. Tube bino. Bangauzhi 450 ba kwa Baela banengezhe mulambo ne kulomba kwi lesa wabo, ne amiwa nsakunengezha mulambo ne kulomba kwi Yehoba. Lesa usakutuma mujilo, ye Lesa wa kine.’ Ne bantu baswile kuba bino.

Bangauzhi ba kwa Baela banengezhe mulambo wabo. Juba jonse jazhikiletu na kulomba kwi lesa wabo amba: ‘Anweba Baela, tukumbulai!’ Baela byo abujile kwibakumbula, Elaija watendekele kwiboba mukeyu. Wibambijile’mba: ‘Bijikai na jiwi ja peulu. Kampe walaala, tumaiko muntu wa kuya na kumubusha.’ Bangauzhi ba kwa Baela baubiletu lombee, kufika mabanga. Bino kafwako wibakumbwile ne.

Elaija wabikile mulambo wanji pa kitapisho ne kwichilapo mema avula. Kepo alombele’mba: ‘Anweba Yehoba, lekai bantu bayuke’mba yenu Lesa wa kine.’ Ponkapotu, Yehoba watumine mujilo kufuma mwiulu ne kusoka mulambo. Bantu babijikile’mba: ‘Yehoba ye Lesa wa kine!’ Elaija waambile’mba: ‘Kechi mwafwainwa kupulushapo nangwa umo pa bangauzhi ba kwa Baela ne.’ Bangauzhi ba kwa Baela 450 bebepayile pa jonkaja juba.

Elaija byo amwene kajikumbi kacheche peulu ya kalunga, waambijile Ahaba amba: ‘Kubena kwiya mvula mukatampe. Kanjilai mu kalaki wenu muyenga bukiji ku nzubo.’ Ponkapo, jiulu jafiichiletu bwii na mambo a kufinda kwa makumbi, kabiji mwela watendekele kupuupa ne mvula mukatampe watendekele kunoka. Pano popapwijile kyashi. Kino kyalengejile Ahaba kunyemesha kalaki kya kine kine. Bino Yehoba walengejile Elaija kunyema kya kuba washamo ne kalaki wa kwa Ahaba! Nanchi pano popapwijile makatazho a kwa Elaija nyi? Twaya tumone.

Yezebeli byo aumvwine’mba bangauzhi ba kwa Baela bebepaya, wazhingijile bingi. Watumine muntu kuya na kubuula Elaija amba: ‘Kesha ukafwa byonka byafwa bangauzhi ba kwa Baela.’ Elaija waumvwine bingi moyo. Wanyemejile mu kiselebwa. Walombele’mba: ‘Anweba Yehoba, nakankalwa kuchinchika. Kyawama mfwetu.’ Elaija wakookele bingi, walaala ne munshi ya kichi.

alaika waishile, ne kumusunsunya ne kumwambila’mba: ‘Buuka uje.’ Elaija wamwene mulondo wa mema ne shinkwa wanzhingwile ye baoshele pa mabwe. Wajiile ne kutoma mema, kabiji walaajile jikwabo. Malaika wamubushishe jibiji ne kumwambila’mba: ‘Buuka uje, mambo ko ubena kuya kwalepa.’ Elaija wajile. Kepo aendele moba 40, mute ne bufuku. Wafikile ku Mutumba wa Holeba. Ku uno mutumba Elaija wayile mu jiyengo na kulaala. Bino Yehoba wamwipwizhe’mba: ‘Ubena kuba ka kuno Elaija?’ Elaija wakumbwile’mba: ‘Bena Isalela baleka kulondela mulaye ye bemulayile. Baonauna bya kusokelapo bitapisho byenu kabiji baipaya ne bangauzhi benu. Pano babena kukeba’mba ne amiwa bangipaye.’

Yehoba wamubuujile’mba: ‘Yanga ukemane pa mutumba.’ Kepo kwapichile kipupu kikatampe ku jiyengo. Kufuma popo, kwapichile kitentanshi, kabiji palondejile ne mujilo. Kyapeleleko, Elaija waumvwine jiwi jaambijilenga munshi. Wivwetele mukunkumba wanji ku meso ne kulupuka pangye ya jiyengo. Yehoba wamwipwizhe kyalengejile’mba anyeme. Elaija waambile’mba: ‘Yami nashalapotu bunke.’ Bino Yehoba wamwambijile’mba: ‘Kechi uji bunke ne. Kuji bena Isalela 7,000 batwajijila kumpopwela. Yanga ukatongole Elisha kwikala ngauzhi wa kupinga pe obewa.’ Ponkapotu, Elaija wayile ne kuba byamubuujile Yehoba. Nanchi wayuka’mba inge keube byonse bikubuula Yehoba, aye ukakukwasha nyi? Pano twaya tumone kyamwekele byo kwajinga kyashi.