Kimye kyajingako kyashi, Yehoba waambijile Elaija amba: ‘Yanga ku Zalefwata. Mwanamukazhi wafwila ukakupanga kajo.’ Byo afikile ku bibelo bya muzhi, Elaija wamwene mwanamukazhi wafwilwa muyanji ubena kutolaula nsala. Wamulombele mema a kutoma. Byo ayilenga na kumuletela mema, Elaija wamwambijile’mba: ‘Mundetelepo ne ka shinkwa.’ Bino mwanamukazhi wafwilwa waambile’mba: ‘Kechi nji nashikwa wa kwimupa ne. Njitu na tubukula tucheche ne tumanyi tucheche twamitu ne mwanami.’ Elaija wamwambijile’mba: ‘Yehoba walaya’mba, inge ungoshelepo kashikwa, bukula ne manyi kechi bikapwa ne.’

Onkao mambo, uno mwanamukazhi wafwilwa wayile ne koshela shinkwa ngauzhi wa Yehoba. Byonkatu Yehoba byo alayile, uno mwanamukazhi wafwilwa ne mwananji bajinga na kajo kufikatu ne kyashi byo kyapwile. Manyi ne bukula kechi byapwilengamo mu milondo ne.

Bino, kwamwekele kintu kyatama bingi. Uno mwanamukazhi wafwilwa, mwananji wa mulume wakolelwe bingi ne kufwa wafwile. Uno mwanamukazhi wasashijile Elaija amba amukwashe. Elaija watambwile uno mwana ne kuya mu kibamba kya peulu mu nzubo. Wamulajikile pa mwanya ne kulomba’mba: ‘Anweba Yehoba, bwezhai bumi bwa uno mwana.’ Nanchi wayuka ene mambo kino kyaubile Yehoba o kyaikela kya kukumya nyi? Byonka byo kiji mu ano moba, muntu inge wafwa kechi wikala na bumi jikwabo ne. Kabiji uno mwanamukazhi wafwilwa ne mwananji wamulume kechi bajinga bena Isalela ne.

Bino uno mwana bamusangwile. Elaija waambijile mwanamukazhi wafwilwa’mba: ‘Monai! Mwanenu wasanguka.’ Uno mwanamukazhi waumvwine bingi bulongo ne kwambila Elaija amba: ‘Kya kine mwi muntu wa Lesa. Nayuka bino, mambo mwamba byonka bimubula Yehoba kwamba.’

Mfumu Ahaba wamwene bujimi bwa miñanzañanza bwa kwa Nabota, pa kipenze kya kipango mu Yezelela. Ahaba wakebelenga buno bujimi bwa miñanzañanza, kabiji wakebelenga’mba Nabota amupoteshe buno bujimi. Bino Nabota wakaine kumupotesha, mambo Mizhilo ya Yehoba kechi yaswishishe kupotesha mpunzha ya buswanyi ne. Nanchi Ahaba wanemekele byafuukwile Nabota nyi? Ine. Ahaba wazhingijile bingi. Wazhingijile kya kuba wakainenga ne kulupuka ku kibamba ko alaalanga ne kukana kuja.

Mukazhanji, aye Yezebeli wamwambijile’mba: ‘Mwi bamfumu mu Isalela. Mwakonsha kwikala na kyonse kyo mubena kukeba. Nsakwimutambwilayo ino mpunzha. Watumine makalata ku bakulumpe ba muzhi, ne kwibabuula’mba bafwainwa kupamo mambo Nabota a kufinga Lesa kabiji bafwainwa kumwasa mabwe afwe. Bakulumpe baubile bibabujile Yezebeli. Kabiji Yezebeli waambijile Ahaba amba: ‘Nabota wafwa! Bujimi bwa miñanzañanza pano ke bwenu.’

Nabota kechi ye yenkatu ye baipaile kwi Yezebeli pa kubuula mambo ne. Waipayile bantu bavula bingi batemenwe Yehoba. Wapopwelanga bankishi kabiji waubanga ne bintutu bikwabo byatama. Yehoba wamwene bintu byonse byatama byaubilenga Yezebeli. Pano waubilepo byepi?

Ahaba byo afwile, mwananji aye Yeholama ye waikele mfumu. Yehoba watumine mwanamulume wa jizhina ja Yehu kuya na kukambula Yezebeli ne kisemi kyanji.

Yehu wakanjijile mu kalaki wanji ne kuya ku Yezelela. Yeholama naye wakanjijile mu kalaki ne kuya na kusambakana Yehu na kumwipuzha’mba: ‘Nanchi paji mutende pakachi ketu nyi?’ Yehu waambile’mba: ‘Kafwapo mutende mambo inobe Yezebeli ubena kuba bintu byatama.’ Yeholama waalulwile kalaki kuba’mba ayenga. Bino Yehu waashile muketo Yeholama, ne kufwa wafwile.

Kepo Yehu ayile ku kipango kya kwa Yezebeli. Byo aumvwine’mba ubena kwiya, wishingile bya kwishinga ku meso, kuwamisha nsuki ne kutendeka kupembelela mu kibamba kya peulu saka atala pa kipenze. Yehu byo afikile, Yezebeli wamwimwine na bulunji. Yehu waambijile bamwingilo ba kwa Yezebeli amba: “Mutayai panshi!” Bamushinjikile Yezebeli pa kipenze, kabiji waponejile panshi ne kufwa wafwile.

Yezebeli byo afwile, Yehu waipaile baana babalume ba kwa Ahaba 70 ne kuzhiisha bupopweshi bwa Baela. Nanchi wamona kino byo kibena kumwesha’mba Yehoba umona bintu byonse nyi? Abya wamona byo akambula bantu boba byatama nyi?