nekipwilo kyonse, kwimona umvwe kyakine tuji nakino kiyukilo kyabwina Kilishitu bwakine—butemwe bwa Kilishitu. Butemwe bwakwipana bwauno mutundu bwakonsha kulumbulula’mba, mwina Kilishitu wafwainwa nekubika bumi bwanji mukizumba kukila kusolola balongo banji. Mambo akuba’mba javula kwikala kwipana atwe bene kuba’mba twingijile balongo betu nekukwasha bantu. Mutumwa Paulo wajinga wakumwenako wawama bingi mukino. (2 Kolinda 12:15; Filipai 2:17) Muchima wakwipana uji na Bakamonyi bakwa Yehoba wayukanyikwa bingi kuzhokoloka ntanda yonse, byobakwasha balongo babo nebakwabo mukinkalankulo nekufunjishako bantu bakwabo bukine bwamu Baibolo.b—Ngalatiya 6:10.

Bulunda Bwafwainwa Kukinjikwa

9. Pakuba’mba tulame bulunda bwetu na Lesa ne Mwananji kika kyotwafwainwa kuba nalusekelo?

⁹ Kafwako nangwa kimo kyanema kwiatweba kyakila kwitutemwa kwi Yehoba ne Mwananji, Yesu Kilishitu ne. Pano pakuba’mba betutemwe neatweba twayuka’mba betutemwa, twafwainwa kubapo kimo. Pabonkabwa bufuku bwapeleleko kumonañana nabaana banji babwanga, Yesu waambile’mba: “Awa uji na mikambizho yami ne kwiilama, ye wantemwa: ne awa wantemwa ye bakatemwa kwi Batata, ne amiwa nkamutemwa, ne kwimwesha ami mwine kwi aye.” (Yoano 14:21) Namambo akuba twanemeka bulunda bwetu na Lesa ne Mwananji, nalusekelo tukokela mikambizho yabo. Kino kyavwangamo nemukambizho mupya wakumwesha butemwe bwakwipana nekulondela mukambizho wakambizhe Kilishitu panyuma yalusanguko lwanji’mba “mukebasapwile bantu, ne kunshimuna” nekwibikako ‘kwibalula ke baana babwanga’ aba batambwila mambo awama.—Byubilo 10:42; Mateo 28:19, 20.

10. Bulundaka buji nabashingwa ne ba ‘mikooko ikwabo’?

¹⁰ Palutwe kacheche bonkabwa bufuku, pakukumbula jipuzho jaipwizhe mutumwa wakishinka Yudasa (Tadeusa), Yesu waambile’mba: “Inge muntu wantemwa, ukalama mambo ami: ne Batata bakamutemwa, ne atweba tukeya ko aji, ne kumona mwa kwikala monka mwanji.” (Yoano 14:22, 23) Bena Kilishitu bashingwa baitwa kwikala mubukalama pamo ne Kilishitu mwiulu, nangwatu kimye kyobaji panopantanda balunda bakine kine na Yehoba nena Mwananji. (Yoano 15:15; 16:27; 17:22; Bahebelu 3:1; 1 Yoano 3:2, 24) Ba ‘mikooko ikwabo’ baji naluketekelo lwakwikala panopantanda, nabo balunda bakine na “kafunga umo” Yesu Kilishitu, ne Lesa wabo Yehoba kikulutu batwajijila kwikala balukokelo.—Yoano 10:16; Masalamo 15:1-5; 25:14.

“Kechi ba Panopantanda Ne”

11. Lujimunoka lwakosa Yesu loajimwine baana banji babwanga?

¹¹ Pakimye kyapeleleko kumonañana nabaana banji babwanga bakishinka saka akyangye kufwa, Yesu wibajimwine lujimuno lwakosa’mba: Inge muntu bamutemwa kwi Lesa, bapanopantanda bakamushikwa. Waambile’mba: “Inge kabiji ba panopantanda bemushikwa, mwayuka’mba, babangijile kunshikwa amiwa. Inge mwaji ba panopantanda inge ba panopantanda bemutemwa, mambo batemwa babo bene: pakuba anweba byo mwabula ba panopantanda, ne amiwa nemusalulula mu ba panopantanda, ba panopantanda bemushikwa. Vulukai byo nemwambile namba, muzha kechi wakila nkambo yanji ne. Inge bampachile amiwa, kabiji bakemupata anweba; inge balamine mambo ami, bakalama ne enu.”—Yoano 15:18-20.

12. (a) Mamboka Yesu kyoajimwijileko baana banji babwanga kuba’mba bapanopantanda bakebashikwa? (b) Kintuka kyawama bonse kyobafwainwa kuvulukanga Kivuluko byokibena kufwenya pepi?

¹² Yesu wibajimwine luno lujimuno kuba’mba aba batumwa 11 nebena Kilishitu bakine bonse bakeya panyuma yabo bakabule kulefulwa nekuleka mwingilo wabo namambo akwibashikwa kuba panopantanda. Kabiji waambile’mba: “Bino bintu nemwambila namba, mwakeya kwituntula. Bakemupanga mu mashinagoga: kine, ne juba jibenakwiya jo bakalanguluka bonse bemwipaya amba tubenakwingijila Lesa. Ne bino bintu bakebyuba, mambo kechi bayuka Batata ne, nangwa amiwa ne.” (Yoano 16:1-3) Dikishonale wa Baibolo umo walumbulula’mba kino kyambo kyatuntululwa’mba “kwituntula” kilumbulula “kulengela muntu kuleka kuketekela muntu yeafwainwa kukinkamo manungo nekumukokela; walefulwa nekuleka mwingilo wanji.” Kimye kya Kivuluko byokibena kufwenya pepi, kyawama bingi atweba bonse kuvuluka mingilo yawama yabantu bakishinka bajingako kala nebajipo lelo jino, kabiji nekukosa byonka byobakosa mubimye byamalwa. Kange muleke bantu bemulengulula nangwa lumanamo kwimufumya kwi Yehoba ne Yesu ne, mukifulo kyakino pwishai namuchima wenu yense kwibaketekela nekwibakokela.

13. Kintuka Yesu kyoalombejileko baana banji babwanga kwi Shanji?

¹³ Mululombelo lwanji lwakupezhako saka bakyangye kufuma muyoya nzubo yapeulu mu Yelusalema, Yesu waambile kwi Shanji amba: “Amiwa nebapele mambo enu; ne ba panopantanda bebashikwa, mambo abo kechi bo ba panopantanda ne, byonka byo nji amiwa kechi ne wa panopantanda ne. Kechi nalomba namba mwibafumye panopantanda ne, poso namba mwibalame kwi yewa mubi. Abo kechi ba panopantanda ne, byonka byo nji amiwa kechi ne wa panopantanda ne.” (Yoano 17:14-16) Twafwainwa kuketekela kuba’mba Yehoba usopa boba boatemwa, nekwibakosesha byobefumya kubya panopantanda.—Isaya 40:29-31.

Ikalai mu Butemwe bwa Mwana Nebwa Shanji

14, 15. (a) Yesu wipashañenye kukika, mukwipusanyako na ‘muñanzañanza muncha’? (b) “Misampi” ya “muñanzañanza wa kine” bobañanyi?

¹⁴ Mumwisambo yeesambile nabaana banji babwanga bakishinka bufuku bwa Nisani 14, Yesu wipashañenye ku “muñanzañanza wa kine,” kupusanako na ‘muñanzañanza muncha’ wa bena Isalela babujile bukishinka. Waambile’mba: “Amiwa ne muñanzañanza wa kine, Batata bo banjimi.” (Yoano 15:1) Kala kunyuma, ngauzhi Yelemiya wanembele bino byambo Yehoba byoaambile kubantu banji baalukile ke banchatu: “Amiwa byo nakujimbile wajinga muñanzañanza wawama, . . . nanchi pano wialula byepi ke munchatu, wa mungye?” (Yelemiya 2:21) Ngauzhi Hoseya naye wanembele’mba: “Bena Isalela bauba nobe muñanzañanza watenkuma bulongo, upanga bipangwa byavula; . . . Baji na michima ibiji.”—Hoseya 10:1, 2.

¹⁵ Mukifulo kyakupanga bipangwa bya bupopweshi bwakine, bena Isalela basendukile mulwitabilo nekupanga bipangwa byamingilo yabo. Byokwashajile moba asatu saka akyangye kupwila pamo nabaana banji bakishinka, Yesu wabujile bantangi bakamfutumfutu ba Bayudea amba: “Nemwambila namba, Bufumu bwa Lesa bakemwangatabo, bakebupana ku mukoka ukapanga bipangwa byabo.” (Mateo 21:43) Auno mukoka mupya ke “bena Isalela ba Lesa,” bena Kilishitu bashingwa ba 144,000 bapashañanyiwa ku “misampi” ya “muñanzañanza wa kine,” aye Yesu Kilishitu.—Ngalatiya 6:16; Yoano 15:5; Lumwekesho 14:1, 3.

16. Yesu wakambizhe batumwa bakishinka 11 kubaka, kabiji twafwainwa kwambapo’mbaka pa bashingwa bakishinka mukino kimye kyakumpelo?

¹⁶ Yesu wabujile batumwa banji 11 boajinga nabo munzubo yapeulu’mba: “Misampi yonse iji mwi amiwa ibula kupanga bipangwa, beyifumyako: ne yonse misampi ipanga bipangwa, nayo beyitokesha, amba ipange byavula. Ikalainga mwi amiwa, ne amiwa mwi anweba. Musampi byonka byo abula kukonsha kwipangila, poso waikala mu muñanzañanza; ne anweba pamo, poso mwikale mwi amiwa.” (Yoano 15:2, 4) Mpito yamumoba etu alelo ya bantu ba Yehoba yamweshatu patoka kuba’mba bena Kilishitu bakishinka bashingwa bakwatankana na Mutwe wabo aye Yesu Kilishitu. (Efisesa 5:23) Bebatokesha nekwibawamisha. (Malakai 3:2,3) Kutatulatu mu 1919, bapanga bipangwa bya Bufumu byavula bingi, kutendeka nabena Kilishitu bakwabo bashingwa, kepo ne “jibumba jikatampe” jibena kuya nakuvujilakotu kikupu kutatula mu 1935.—Lumwekesho 7:9; Isaya 60:4, 8-11.

17, 18. (a) Ñanyi byambo byakwa Yesu bikwasha bashingwa neba mikooko ikwabo kwikajijila mubutemwe bwa Yehoba? (b) Kutanwa ku Kivuluko kuketukwasha byepi kukosesha mfuukwilo yetu yakwikajijila mubutemwe bwa Lesa?

¹⁷ Byambo byakwa Yesu bikwabo byoaambile byalamatatu bonse, bena Kilishitu bashingwa nebalunda nabo byakuba’mba: ‘Monka mu kino mo batumbijikilwa Batata, pa kupanga bipangwa byavula anweba; byonkabyo mukekala ke baana bami babwanga. Monka mwantemenwa Batata, ne amiwa nemutemwa pamo: ikalainga mu butemwa bwami. Umvwe mwalama mikambizho yami, mukekala mu butemwe bwami; byonka byo nalama mikambizho ya Batata, ne kwikala naikala mu butemwe bwabo.’—Yoano 15:8-10.

¹⁸ Atweba bonse tukeba kwikala mubutemwe bwa Lesa, kabiji kino kitutundaika kwikala bena Kilishitu bapanga bipangwa. Tuba kino byotwingijisha tubimye twetu tonse totushukilwa mukusapwila “mambo awama a bufumu.” (Mateo 24:14) Kabiji twibikako kumwesha “bipangwa bya mupashi” mubwikalo bwetu atweba bene. (Ngalatiya 5:22, 23) Kutanwa ku Kivuluko kya lufu lwa Kilishitu kuketukosesha bingi mukino, mambo kiketuvululako butemwe bwabaya bwitutemwa Lesa ne Kilishitu.—2 Kolinda 5:14, 15.

19. Bukwashoka bukwabo botukafunda mumutwe walondelapo?

¹⁹ Panyuma yakuja Kijiilo, Yesu walaile’mba Shanji ukebatumina baana banji babwanga bakishinka “Nkwasho, ye Mupashi Wazhila.” (Yoano 14:26) Mu mutwe walondelapo momotukafunda uno mupashi byoakwasha bashingwa neba mikooko ikwabo kwikajijila mubutemwe bwa Yehoba.

Nanchi Mwatambwila “Mupashi wa Bukine” Nyi?

“Batata . . . bakemupa Nkwasho mukwabo, ye ukekala nenu myaka, ye Mupashi wa bukine.”—YOANO 14:16, 17.

1. Ñanyi byambo byanema Yesu byoabujile baana banji babwanga munzubo yapeulu kimye kyanji kyapeleleko?

“NKAMBO, muya kwepi?” Jino jipuzho najo jajinga paoa mepuzho obamwipwizhe Yesu batumwa banji kimye kyapeleleko kyoajinga nabo munzubo yapeulu mu Yelusalema. (Yoano 13:36) Byobakisambilenga, Yesu wibabujile’mba pano kimye kyafika kyakwibasha nekubwela kwi Shanji. (Yoano 14:28; 16:28) Pano kechi usakwikalanga nabo sabamumona nakwibafunjisha nekukumbula mepuzho abone. Bino wibalaile’mba: “Ne amiwa nkalomba Batata, ne abo bakemupa Nkwasho [nangwa’mba wakwimutekenesha] mukwabo, ye ukekala nenu myaka.”—Yoano 14:16.

2. Kika Yesu kyoalaile kutumina baana banji babwanga umvwe waya?

² Yesu wibabujile yewo nkwasho nekulumbulula byoakakwashanga baana banji babwanga. Wibabujile’mba: ‘Bino bintu, kechi nemwambijile ku ntendekelo ne, mambo najinga nenu. Pakuba pano ka ngye kuji aye wantumine; . . . kimufwainwa amiwa kufumapo; mambo inge amiwa ne kufumapo ne, Nkwasho kechi akeye kwi anweba ne; kabiji inge naya, amiwa nkamutuma kwi anweba. . . . aye Mupashi wa bukine byoakeya ukemutangijila ku byonse byakine.’—Yoano 16:4, 5, 7, 13.

3. (a) Kyajinga kimyeka “Mupashi wa bukine” kyoatuminwe kubena Kilishitu batanshi? (b) Ñanyi jishinda jimo janema mupashi wazhila moaikejile “Nkwasho” kwiabo?

³ Uno mulaye wafikizhiwe pa Pentekosta mu 33 C.E., mambo mutumwa Petelo walumbulwile’mba: “Uno Yesu bamusangwile kwi Lesa, ne atweba bonse twi batumonyi banji. Byonkabyo byo atumbijikilwe ku kilujo kya Lesa, ne kutambula kwi Shanji kyo alayile kya Mupashi Wazhila, aye waitulula kino, kyo mwamona nekumvwa anweba.” (Byubilo 2:32, 33) Byonka byotusakumona mukakimye kacheche, mupashi wazhila waitulwilwe pa Pentekosta waingijile bintu byavula bingi kubena Kilishitu batanshi. Kabiji Yesu wibalaile’mba ‘Mupashi Wazhila ukebavulula byonse byoaambile nabo.’ (Yoano 14:26) Wibakwashishe kuvuluka mwingilo wakwa Yesu nemafunjisho anji, kabiji nekunemba bine byambo byoaambile. Kino kyakwashishe bingi kikatakata mutumwa Yoano waubile wakota kala kunangijila kumpelo yakitota-myaka kitanshi C.E. kimye atatwile kunemba Mambo anji awama. Muano mambo awama muji nelufunjisho lwanema lwafunjishe Yesu kimye atatwile kuja kijiilo Kyakuvuluka lufu lwanji.—Yoano kyapitala 13-17.

4. “Mupashi wabukine” wakwashishe byepi bena Kilishitu batanshi bashingwa?

⁴ Kabiji Yesu walaile boba baana banji babwanga batanshi kuba’mba mupashi wazhila ‘ukebafunjisha bintu byonsetu nekwibatangijila mubyonse bya bukine.’ Mupashi wibakwashishe kumvwisha bintu byazhika byamu Binembelo nekwibinemba byonka byobiji nankebelo yabyo kwakubula kupampuka. (1 Kolinda 2:10; Efisesa 4:3) Onkao mambo, mupashi wazhila wapele bulume boba bena Kilishitu batanshi bonse kwikala ‘kalume wa kishinka ne wa maana’ wakupana “kajo pa kimye pafwainwa” kubena Kilishitu bakwabo bashingwa.—Mateo 24:45.

Aye Mupashi Mwine Ushimuna

5. (a) Jishukoka jikwabo joashimwine ku baana banji babwanga bufuku bwa Nisani 14, 33 C.E.? (b) Ñanyi mwingilo mupashi wazhila yeaingijile mukufikizha mulaye wakwa Yesu?

⁵ Bufuku bwajuba ja Nisani 14, 33 C.E., Yesu washimwine kubaana banji babwanga amba palutwe kacheche ukebatambula nekwikala neaye ne Bashanji mwiulu. Wibabujile’mba: “Mu nzubo ya Batata muji mwakwikala mwavula; inge ka mwaji byobyo ne, inge nemubula; pakuba mbenakuya mu kwimumwena kuntu. Kabiji inge naya na kwimumwena kuntu, nkeya jibiji, ne kwimutambula kwami ami mwine; namba akwa ko nji amiwa ne anweba mukekale konka.” (Yoano 13:36; 14:2, 3) Bakalamanga nanji pamo mu Bufumu bwanji. (Luka 22:28-30) Pano pakuba’mba baye mwiulu bakebewenga ‘kusemwa ku Mupashi’ kwikala ke baana ba Lesa bakumupashi bashingwa kwikala bamfumu nebañanga pamo ne Kilishitu mwiulu.—Yoano 3:5-8; 2 Kolinda 1:21, 22; Titusa 3:5-7; 1 Petelo 1:3, 4; Lumwekesho 20:6.

6. (a) Lwito lwamwiulu lwatendekele kimyeka, kabiji banga baitwa? (b) Aba baichilwe babatizwe muka?

⁶ Luno “lwito lwa mwiulu” lwatendekejile pa Pentekosta mu 33 C.E. kabiji lumweka nobe lwapwijile mukachi kamyaka yamuma 1930. (Bahebelu 3:1) Aba bonse babikwa tuyukilo namupashi wazhila kwikala bena Isalela bakumupashi baji 144,000, ‘bafuma mu mikoka ya bantu.’ (Lumwekesho 7:4; 14:1-4) Bano babatizwe mumubiji wakumupashi wa Kilishitu, mukipwilo kyanji, nemulufu lwanji. (Loma 6:3; 1 Kolinda 12:12, 13, 27; Efisesa 1:22, 23) Byobabatizwe mumema nekushingwa namupashi wazhila, batwelele mubwikalo bwakwipana, ko kuba’mba kusunga bulumbuluke mubwikalo bwabo bonse kufikatu nekulufu.—Loma 6:4, 5.

7. Mamboka bashingwatu bonka bobajako bimpashañano pa Kivuluko?

⁷ Byobaji bena Isalela bakumupashi, bano bena Kilishitu bashingwa baji mululayañano lupya lwa Yehoba ne “bena Isalela ba Lesa.” (Ngalatiya 6:16; Yelemiya 31:31-34) Bukine bwaluno lulayañano lupya bwamwekejile mumashi a Kilishitu aichikile. Yesu wikitongwele kino kimye atatwile kuja kijiilo kya Kuvuluka lufu lwanji. Luka wanembele’mba: “Washikwile shinkwa, ne pa kusanta, wamutebwile ne kwibapa’mba, Uno ye mubiji wami wimupainwa anweba: kasa muba bibye mu kundanguluka amiwa. Byonkabi ne katomeno pa kupwisha kuja’mba, Kano katomeno lo lulayañano lupya mu mashi ami, emwichikila anweba.” (Luka 22:19, 20) Bashingwa bakiji panopantanda bamu ba 144,000, bobonka bajako shinkwa ne waini wakimpashañano pa Kivuluko kya lufu lwa Kilishitu.

8. Bashingwa bayuka byepi’mba baitwa kuya mwiulu?

⁸ Nanchi bashingwa bayuka byepi amba baitwa kuya mwiulu? Batambwila lushimuno lwamupashi wazhila kwakubula kuzhinaukane. Mutumwa Paulo wibanembejile bano bantu’mba: ‘Bonse mo bavujila bo batangijila ku Mupashi wa Lesa, bo baana ba Lesa. . . . Mupashi mwine ushimuna pamo ne mipashi yetu, amba twi baana ba Lesa: kabiji umvwe twi baana, twi banswanyi pamo; banswanyi ba Lesa, ba kuswana pamo ne Kilishitu, umvwe twamanama nanji pamo, amba tukatumbijikilwe nanji pamo.’ (Loma 8:14-17) Luno lushimuno lwamupashi luji nabulume bukatampe kyakuba aba bajiko nakaluzhinauko kakuba’mba kana baitwa kuya mwiulunyi nangwane, bafikenatu bayuka’mba kechi baitwane, baleka nekujako bimpashañano pa Kivuluko.

Mupashi Byoengila mu Mikooko Ikwabo

9. Ñanyi mabumba abiji atongolwa mu Mambo awama nemubuku wa Lumwekesho?

⁹ Byoayukile kibelengelo kicheche kya bena Kilishitu baitwa kwikala bena Isalela bakumupashi, Yesu wibatelele amba “kajitanga kacheche.” Bakonkanyiwa mu “kipaka” kyalulayañano