10 Bukishinka

BYO KILUMBULULA

Bantu ba kishinka bebaketekela ku bansemi, ku balunda nabo ne ku bakulumpe pa nkito. Balondela mizhilo, bafikizha bintu byo balaya kabiji bamba bya kine kimye kyonse.

ENE MAMBO O KYANEMENA

Bantu bakonsha kukuketekelatu ne kukupa luusa lwa kuba bintu inge bamona bukishinka bobe pa kimye kyabaya.

Sarahi waambile’mba: “Pa kuba’mba bansemi bobe bakuketekele, wafwainwa kwibamwesha’mba wakoma mu maana ne kwingila mingilo yo bakupa, umvwe po baji nangwa bafwapo.”

JIFUNDE JA MU BAIBOLO: “Ipimainga anwe bene kuba’mba mwiyuke byo muji.”—2 Kolinda 13:5.

BYO WAKONSHA KUBA

Inge ukeba’mba bantu bakuketekele, wafwainwa kulondela bishinka biji panshipo.

Wafwainwa kwikala wa kishinka. Inge kewambe bubela, bantu bakaleka kukuketekela. Bino inge ke wambe bya kine, kikatakata pa bintu byo ulubankanya, bantu bakakuketekela.

Caiman waambile’mba: “Kyapeela kwamba bya kine inge bintu byonse bijitu bulongo. Pano bino, kwamba bya kine nangwatu inge bintu bisakukutamina kwakonsha kulengela bantu kukuketekela.”

JIFUNDE JA MU BAIBOLO: “Tukebesha kwikala ba kishinka mu bintu byonse.”—Bahebelu 13:18.

Wafwainwa kuketekelwa. Bashayuka bamo mu kyalo kya America bataaine kuba’mba, bakulumpe ba nkito bavula bakeba “kutwezha nkito bantu baketekelwa.” Onkao mambo, inge bantu bakuketekela luno, ne byo ukakoma bakakuketekela.

Sarah waambile’mba: “Inge naingila mingilo kwa kubula kunkanjikizha, bansemi bamona kabiji bayuka’mba nakoma mu maana. Kuba bino kulengela bansemi kunketekela.”

JIFUNDE JA MU BAIBOLO: “Naketekela namba ukalondela bino, . . . nayuka’mba ukoba ne bikwabo byo nabula kutongola.”—Filemonyi 21.

Tekanya. Kyapeela bingi bantu kumona’mba wakoma mu kimino, bino papita kimye pa kuba’mba bamone’mba wakoma mu maana ne mu milanguluko.

Brandon waambile’mba: “Bansemi ne bantutu kechi bakonsha kukuketekela na mambo a kintu kimotu kyo wauba ne. Bakonsha kukuketekelatu inge bamona bintu byo wauba pa kimye kyabaya.”

JIFUNDE JA MU BAIBOLO: “Vwalai muchima wa . . . butekanye.”—Kolose 3:12.