Mpelo ya Bintu Byonse Byatama

BI KA byo ubena kumona pape? Ee, nzhita iji pa bambili batoka. Pano akimona ko ibena kufumina. Bambili babena kunyema lubilo kufuma mwiulu kupita mu makumbi! Nanchi mwiulu kine muji bambili nyi?

Ine, bano kechi bambili bakine ne. Twayuka bino mambo a kuba’mba bambili kechi banyema pa makumbi ne, kechi ibyo nenyi? Bino Baibolo waamba’mba mwiulu muji bambili. Wayuka ene mambo kyo aambila bino nyi?

Ke na mambo a kuba’mba bambili bebengijishe pavula bingi mu kulwa nkondo. Onkao mambo, Baibolo witubula bantu baji pa bambili saka bafuma mwiulu, kibena kumwesha’mba Lesa ukaleta nkondo ya kulwa na bantu panopantanda. Nanchi wayuka mpunzha ya ino nkondo byo itelwa nyi? Amagedonyi. Ino nkondo ikapwishatu pelu bintu byonse byatama biji panopantanda.

Yesu ye ukatangijila mu kulwa ino nkondo pa Amagedonyi. Vuluka kuba’mba Yesu, ye ye basala kwi Yehoba kwikala ke mfumu wa kafulumende wanji. O ene mambo Yesu kyo avwajila munchinya wa bufumu. Kabiji mpoko ibena kumwesha’mba ukepaya balwanyi ba Lesa bonse. Nanchi twafwainwa kukumya amba Lesa ukonauna bantu bonse batama nyi?

Akimona Jishimikila 10. Bi ka byo wamonapo? Ee, Muyulo mukatampe waonawine bantu batama. Ñanyi waletele uno Muyulo? Yehoba Lesa. Kabiji akimona ne Jishimikila 15. Ki ka kibena kumwekana pano? Sodoma ne Gomola ubena kupya na mujilo watumine Yehoba.

Zhikula pa Jishimikila 33. Mona kibena kumweka ku bambili ne makalaki a nkondo a bena Ijipita. Ñanyi walengejile mema kwibalobesha? Yehoba. Waubile kino mu kuzhikijila bantu banji. Mona Jishimikila 76. Wamona pano kuba’mba Yehoba walekele bantu banji bena Isalela konaunwa na mambo a bubi bwabo.

Onkao mambo, kechi twafwainwa kukumya ne, mambo Yehoba ukatuma nzhita yanji ya mwiulu kwiya na kupwisha bintu byonse byatama bibena kubiwa panopantanda. Akilangulukapotu kino byo kikalumbulula! Zhikula peja yalondelapo kabiji tumone byo kiji.