BYA KULUMBULULA
Lekai Kyubilo kya Kwisuka
Kwisuka ke kyubilo kifichisha bingi Lesa ku muchima, kabiji kilengela muntu kwitemwa ne kutendeka kulanguluka kuba bintu byatama.a Muntu wisuka wakonsha kutendeka kumona bantu bakwabo amba ke bingijishotu bya kupwishishamo kilaka kya kwilaala. Kabiji uno muntu wakonsha kutendeka kumona kwilaala amba kechi kyubilo kimwesha butemwe pakachi ka ba mulume ne mukazhi ne, bino amba ke kyubilo kisangajikatu muntu pa kakimye kacheche ne kupwisha kilaka kya kwilaala. Bino kupwisha kilaka kya kwilaala mu jino jishinda ke kwa kakimyetu kacheche. Kwambatu kine, mu kifulo kya kwipaya binungwa bya mubiji nabiji “bulalelale, bubipisho, [ne] milanguluko yatama ibindankanya muchima,” kwisuka kulengela muntu kukebesha kwibyuba.—Kolose 3:5.
Mutumwa Paulo wanembele’mba: ‘Anweba batemwe, twayai twitokeshe ku bubipisho bonse bwa mubiji ne bwa mupashi, pa kuba’mba twikale bazhila byo tubena kwakamwa Lesa.’ (2 Kolinda 7:1) Umvwe kibena kwimukatazha kulondela bino byambo kange mulefulwe ne. Yehoba kimye kyonse ‘waswila jimo kulekela mambo’ bantu ne kwibakwasha. (Salamo 86:5; Luka 11:9-13) Kumvwa kutama ku muchima ne kwibikishako kwenu kuba’mba muleke kino kyubilo, nangwa kya kuba ja kamo kamo mwikyuba, kukamwesha’mba mubena kukeba kwikileka. Kabiji vulukainga kino kuba’mba: “Lesa wakila michima yetu kabiji wayuka bintu byonse.” (1 Yoano 3:20) Lesa kechi umonatu bundengamambo bwetu bonka ne; bino umona ne byo tuji. Byo etuyuka bulongo, wakonsha kwituteleka byo tumusashijila kufuma panshi ya muchima wetu kuba’mba etubile lusa. Onkao mambo, na kwipelula kange muleke kulomba kwi Lesa na mukoyo, byonkatu byuba mwana mucheche ubula kuleka kunyemena kwi shanji umvwe watanwa mu lukatazho ne. Yehoba ukemukwasha kwikala na jiwi ja mu muchima jawama. (Salamo 51:1-12, 17; Isaya 1:18) Pa kuba’mba kikale bino, mwakonsha kwibikako kuba bintu kwesakana na byo mubena kulombapo. Mwakonsha kuchinuzhuka kutamba bipikichala bya bantu baji mulekese ne kwichina kala na bantu batama.b
Umvwe kimukatazha kuleka kyubilo kya kwisuka, buulaipo nsemi mwina Kilishitu nangwa mwina Kilishitu mukwenu uji na byubilo byawama kabiji wimuta muchima kuba’mba emukwashe.c—Byambo bya Maana 1:8, 9; 1 Tesalonika 5:14; Titusa 2:3-5.
a Kwisuka kulumbulula kukaisha kaisha binungwa bya lusemo bya mwanamulume nangwa bya mwanamukazhi kuba’mba apwishe kilaka kya kwilaala.
b Pa kuba’mba kibakwashe kwingijisha bulongo kompyuta wa pa nzubo, bisemi byavula bibika kompyuta pabena kumweka ku bonse. Nangwa byonkabyo, bino bintu kechi bitanwatu pa kompyuta ne, bino bitanwa ne pa tumafoni twa mu lupi ne biñambañambatu bikwabo. Kabiji bisemi bimo bipota mitanchi ya pa kompyuta ya kwingijisha kufumyamo bintu bibena kubula kukebewa kutamba. Nangwa byonkabyo, kafwako mutanchi waketekelwa bulongo ne.
c Pa mambo a mashinda akwashañana pa bya kuleka kyubilo kya kwisuka, monai kibaba kya kuba’mba “Abacaice Bepusha Ukuti . . . Kuti Nacita Shani pa Kuti Ndeke Ukucita Ici Cintu Cabipa?” kiji mu Loleni! wa November 2006, ne mapa 178-182 mu buku wa Ifipusho Abacaice Bepusha—Ifyasuko Fibomba, Volyumu 1.