Nanchi Kilishitendomu Wimenako Yelusalema Wa Kala Nyi?

Pa myaka yapitapo, mabuku etu alumbululanga’mba Kilishitendomu wimenako bena Yelusalema ba kala basatukijile Lesa. Bintu byaubanga bantu mu Yelusalema nabiji kupopwela bankishi ne mazhikakanwa byo bintu bibena kumweka ne mu Kilishitendomu lelo jino. Nangwa byonkabyo, pa myaka icheche yapitapo, mabuku etu kuvwangakotu ne uno buku ye mubena kutanga kechi aamba pa bintu byamwekele kala kuba’mba bimenako bintu bya mu ano moba, Baibolo byo yabula kwambapo ne. Nanchi kujipo bishinka bya mu Baibolo byafwainwa kwitulengela kwamba’mba Kilishitendomu wimenako Yelusalema wa kala nyi? Ine.

Akilangulukai pa bino bishinka: Yelusalema ye muzhi mwajinga bupopweshi bwa kine, bino basatukijile Lesa mu kuya kwa moba. Pa kuba mu Kilishitendomu mukyangye kwikalapo bupopweshi bwa kine. Kufumatu kimye Kilishitendomu kyo atendekele mu kitota kya myaka kya buna kufika ne lelo jino, bafunjishatu bya bubela.

Kabiji Yelusalema byo bamonawine ku bena Babilona, Yehoba walengejile Yelusalema kumushimukulula ne kubwezha bupopweshi bwa kine byonka byo bwajinga patanshi. Pakuba Lesa ukyangye kupeshapo kala bantu ba mu Kilishitendomu. Kabiji Lesa byo akonauna Kilishitendomu pa malwa akatampe, ukazhiya kikupu.

Pano tusakupwisha’mba ka kwesakana na bishinka byo twisambapo? Inge twalanguluka pa bungauzhi bwafikile pa bena Yelusalema baubanga byatama, twakonsha kwamba’mba byo bintu bibena kumweka ne mu Kilishitendomu lelo jino. Nangwa byonkabyo, kafwako bishinka bya mu Binembelo byakonsha kwitulengela kwamba’mba Kilishitendomu wimenako Yelusalema wa kala ne.