LUFUNJISHO 38

Santainga pa Bumi Bwimupa Lesa

Buku ye Bapulinta

Kuji bintu byavula bingi byo twafwainwa kuba ne kwikala na lusekelo mambo a kuba’mba tukiji na bumi. Nangwatu inge tubena kupita mu makatazho, twakonsha kwikala na lusekelo mu bwikalo bwetu. Tumwesha byepi amba tumusanchila Yehoba pa kwitupa bumi? Kabiji ñanyi ene mambo a kumusanchilapo?

1. Mambo ka o twafwainwa kunemekela bumi?

Twafwainwa kusanta pa bumi bo tuji nabo mambo Shetu aye Yehoba ye witupabo. Ye “Nsulo ya bumi” mambo ye walengele byumi byonse. (Salamo 36:9) “Aye ye upa bantu bonse bumi, muya ne bintu byonse.” (Byubilo 17:25, 28) Yehoba witupa bintu byo tukeba pa kuba’mba twikale na bumi. Kabiji upana bintu bitukwasha kuba’mba twikale na lusekelo mu bwikalo bwetu.—Tangai Byubilo 14:17.

2. Tumwesha byepi kwi Yehoba amba twanemeka bumi bo etupa?

Kufumatu kimye bainenu kyo bemwimichile, Yehoba wimutele bingi muchima. Mu Baibolo, kalume wa Lesa umo aye Davida walombele kwi Lesa amba: “Meso enu ammwene saka nji munda.” (Salamo 139:16) Yehoba wanemeka bingi bumi bwenu. (Tangai Mateo 10:29-31.) Kimukola bingi Yehoba ku muchima inge muntu waipaya mukwabo kyanshijitu nangwa wiipaya aye mwine.a (Kulupuka 20:13) Kabiji kimukola bingi Yehoba ku muchima inge kya kuba twabika bumi bwetu mu kizumba nangwa inge twabula kulondela mizhilo yaamba pa kuzhikijila bumi bwa bakwetu. Inge twazhikijila bumi bwetu ne bwa bakwetu pamo, tumwesha’mba twanemeka bumi bwitupa Lesa.

FUNJILAIPO BIKWABO

Monaipo mashinda amo mo mwafwainwa kumweshesha’mba musanta pa bumi bwimupa Lesa.

3. Tai muchima pa butuntulu bwenu bwa mubiji

Na mambo a kuba’mba twalayile Yehoba amba kimye kyonse tukoobanga bintu byo akeba, o ene mambo o tumwingijila na muchima yense. Kijitu nobe twapana mibiji yetu kwikala kitapisho kwi Lesa. Tangai Loma 12:1, 2, ne kwisamba ano mepuzho:

Ñanyi kintu kyafwainwa kwimutundaika kuta bingi muchima pa butuntulu bwenu bwa mubiji?
Ñanyi mashinda amo o mwakonsha kwingijisha pa kuba bino?

Mwanamukazhi wamita ubena kwisamba na dokotala.

4. Izhikijilainga anweba bene ne bakwenu pamo

Baibolo witutundaika kuchinuzhuka makayo akonsha kwitukozha nangwa kwitwipaya atweba bene ne bakwetu pamo. Tambai VIDYO muyuke bintu bimo byakonsha kwimukwasha pa kuba’mba mwizhikijile.

VIDYO: Taiko Muchima ku Kwizhikijila (8:34)

Tangai Byambo bya Maana 22:3, ne kwisamba byo mwafwainwa kwizhikijila anweba bene ne bakwenu . . .

mu nzubo yenu.
inge mubena kwingila nkito.
inge mubena kupama mpila.
inge mubena kwendesha motoka, kukyofwa nkinga nangwa bemusendakotu.

Mwanamulume uji mu motoka ubena kwikasa mushipi.

5. Nemekai bumi bwa mwana ukiji munda

Mwanamukazhi waimita ubena kukwataula pa jivumo janji.

Davida walumbulwile kuba’mba Yehoba umona byonsetu byubiwa ku mwana ubena kukoma munda mwainanji. Tangai Salamo 139:13-17, ne kwisamba buno bwipuzho:

Kwi Yehoba, nanchi bumi bwa muntu butendekela pa kimye kyaimita inanji inyi, nyi pa kusemwa?

Mizhilo ya Yehoba yo apeele bena Isalela yazhikijilanga banabakazhi baimita ne?mwana ukiji munda. Tangai Kulupuka 21:22, 23, ne kwisamba ano mepuzho:

Yehoba wamonanga byepi muntu wipaya mwana ukiji munda kya mapuso?
Yehoba umvwa byepi ku muchima inge muntu waipaya mwana kyanshijitu?b
Nga anweba mulangulukapo’mba ka pe Lesa byo amona bantu boba bino?

Tambai VIDYO.

VIDYO: Monainga Bumi Byonka Yehoba byo Ebumona (5:00)

Nangwatu mwanamukazhi wanemeka bumi, kimye kimo inge bintu byamukatazha wakonsha kulanguluka’mba kufumya jivumo kyo kintutu kyo afwainwa kuba. Tangai Isaya 41:10, ne kwisamba ano mepuzho:

Inge mwanamukazhi bintu byamupezha maana kabiji wakebeshatu kufumya jivumo, bañanyi bo afwainwa kubuula kuba’mba bamukwashe? Kabiji mambo ka a kubila bino?

BANTU BAMO BAMBA’MBA: “Bimye bimo makatazho o alengela mwanamukazhi kufumya jivumo.”

Ñanyi kintu kimulengela kushiinwa’mba Yehoba wanemeka bumi bwa mwanamukazhi waimita ne bwa mwana ukiji munda?

ÑANYI BISHINKA BYO MWAFUNDA?

Baibolo witufunjisha kwitemwa, kwinemeka ne kuzhikijila bumi bwitupa Yehoba. Akino kyavwangamo bumi bwetu ne bwa bakwetu pamo.

Mepuzho a kupitulukamo

Mambo ka bumi bwa muntu o bwanemena kwi Yehoba?
Nanchi Yehoba umvwa byepi ku muchima inge muntu waipaya mukwabo nangwa wiipaya aye mwine kyanshiji?
Mambo ka o musanchila Lesa pa bumi bo emupa?

Mwapwisha kufunda pa:

Ubai bino

Monaipo jishinda jimo jakonsha kwimukwasha kuzhikijila bumi bwenu.

Bikwabo:

Kikonkwanyi kyenu kikwabo

KEBAI BISHINKA BIKWABO

Twafwainwa kumusanchila byepi Yehoba pa bumi bo etupa?

Lwimbo 141—Bumi ke Kintu kya Kukumya (2:41)

Taanai mukumbu wa buno bwipuzho: Nanchi Lesa wakonsha kulekeleko mambo mwanamukazhi wakifumyapo kala jivumo nyi?

“Nanchi Baibolo Waambapo’mba ka pa Kufumya Jivumo?” (Kibaaba kiji pa jw.org)

Kuyuka Lesa byo amona bumi kuketukwasha kusala bya kisangajimbwe bikabula kubika bumi bwetu mu kizumba.

“‘Nanchi Mwafwainwa Kwivwanga mu Makayo’ Akonsha Kubika Bumi Bwenu mu Kizumba Nyi?” (Labainga!, October 8, 2000)

Muntu uji na milanguluko ya kwikujika wafwainwa kuba byepi? Monai Baibolo byo afwainwa kumukwasha.

“Mbena Kukeba Kufwa—Abya Baibolo Wakonsha Kunkwasha Inge Naikala na Milanguluko ya Kukeba Kwikujika Nyi?” (Kibaaba kiji pa jw.org)

a Yehoba wata bingi muchima bantu balajika michima. (Salamo 34:18) Wayuka kine kintu kilengela bamo kukeba kwiipaya kabiji ukebesha kwibakwasha. Pa kuba’mba mumone Lesa byo afwainwa kwimukwasha kuchinuzhuka ino milanguluko ya kukeba kwikujika, tangai kibaaba kya kuba’mba “Mbena Kukeba Kufwa—Abya Baibolo Wakonsha Kunkwasha Inge Naikala na Milanguluko ya Kukeba Kwikujika Nyi?” Kino kibaaba kiji mu kipungu kya kuba’mba Kebai Bishinka Bikwabo mu yenka uno mutwe.

b Aba bakifumyapo kala jivumo kechi bafwainwa kukizhamo kwizhachisha ne. Yehoba wakonsha kwibalekelako mambo. Inge mubena kukeba kuyukilapo byavula, monai mutwe wa kuba’mba “Nanchi Baibolo Waambapo’mba ka pa Kufumya Jivumo?” uji mu kipungu kya kuba’mba Kebai Bishinka Bikwabo” mu yenka uno mutwe.