Nkunwa Ya Bukine Ifika Ne Mu Mapunzha Aji Kwalepa
KYALO kya Tuva kiji mu Russia kyaikela na ku kabeta ka ku bulenge bwa Siberia, ne Mongolia ku kabeta ka ku bulenge ne musela. Bantu bavula mu Tuva bekala mwalepa kabiji mwakatazha kufika mambo awama a Bufumu. Nangwa byonkabyo, kala bantu baendanga kufuma ku mapunzha apusana pusana a mu Tuva aji kwalepa kwiya na kukonkana mu muzhi mukatampe wa Kyzyl wa mu kino kyalo na kwisamba bya kupwisha makatazho. Painiya umo wa jizhina ja Maria, mu kyzyl, waumvwine bya kukonkana kwa bantu, kabiji kino wikimwene kwikala jishuko ja kusapwila mambo awama.
Maria washimikizha kyamwekele amba: “Pa sukulu po mfunjisha banengezhezhe kukonkana kwa kwisamba pa mambo a byubilo byabula kufwainwa byaubiwenga. Kwakonsheshe kutanwa bantu makumi atanu bafumine mu mapunzha a mwalepesha a mu Tuva. Pa bano pajinga bafunjishi, bashayuka bafunda ndangulukilo ya bantu, kipanyi kitala pa baana, ne bakwabotu.” Kwi Maria, kuno kukonkana kwajinga jishuko janji ja kusapwila, pano bino kechi kyamupelejile kuba bino ne. Walumbulula’mba: “Kwesakanatu na kisemwa kyami, ne muntu wa bumvu bingi, kabiji kinkatazha bingi kusapwila busapwishi bwa kushukilwa. Nangwa byonkabyo, nalombele Yehoba kunkwasha kushinda moyo ye najinga nanji ne kwingijisha kano ka kimye kushimuna bukine.” Abya uno nyenga waubile kino nyi?
Maria watwajijila’mba: “Nakebele magazini wa Awake! waambile pa moyo wa kuchina bintu. Nalangulukile namba, ‘bashayuka bafunda ndangulukilo ya bantu bakonsha kutemwa kwiitanga,’ onkao mambo nasendele ino magazini ku sukulu. Aja juba, pa boba bafunjishi bakonkene umo watwelele mu ofweshi wami, kabiji namupele magazini. Watambwile na lusekelo. Waambile ne kuba’mba naye wajinga na moyo wa kuchina bintu. Juba jalondejilepo, namuletejile buku wa Ifipusho Abacaice Bepusha—Ifyasuko Fibomba, Volyumu 1. Uno buku naye wamutambwile na lusekelo. Byo atambwile na lusekelo, kyandengejile kulanguluka namba ne bafunjishi bakwabo bakonsha kutambulako uno buku. Onkao mambo natwajile kitenguluzha mwajinga mabuku a Ifipusho Abacaice Bepusha ne mabuku akwabotu pa sukulu.” Kechi papichile ne kimye kyabaya ne, kitenguluzha kyashajiletu kwa kubula mabuku. Maria washimuna kyamwekele’mba: “Bafunjishi bakwabo ba yewa mufunjishi ye napele buku wa kuba’mba Ifipusho Abacaice Bepusha batwelele mu ofweshi wami ne kwipuzha’mba: ‘Kwepi ko babena kupana mabuku?’” Ano mabuku aishile pa mpunzha pafwainwa!
Juba ja kukonkana japeleleko jajinga ja pa Kibelushi. Jajinga juba ja kwa Maria ja kukokoloka, onkao mambo, washile mabuku pa matebulu avula mu ofweshi wanji. Washile wanemba pa kipabi’mba: “Ku bafunjishi! Mwakonsha kutolapo mabuku o mukeba ne a bakwenu bakonsha kutemwa kwiatanga. Ano mabuku awama akemukwasha kwingila bulongo pa nkito ne kukosesha bisemi byenu.” Nga aba bantu baubilepo byepi? “Byo naile mu ofweshi wami nataine mabuku avula basenda. Nakasendele mabuku akwabo akatataka ne magazini.” Ku mpelo ya kuno kukonkana, Maria washile magazini 380, mabuku 173, ne mabuloshuwa 34. Aba bonse baishile ku kokwa kukonkana byo babwelele mu mapunzha mo baikalanga ne kwingijila, bayile na mabuku. Maria waambile’mba: “Ne walusekelo bingi kuba’mba nkunwa ya bukine pano yafika ne mu mapunzha aji kwalepesha a mu Tuva!”—Sapwi. 11:6.
[Mapu pa paja 32]
(Umvwe mukeba bine byambo, monai mu buku)
RUSSIA
KYALO KYA TUVA