Mepuzho Kufuma Kubatanga

Bintu ka bimo byakonsha kulengela muntu kulangulukapo kubatizwa jibiji?

Na mambo a bintu bimo, muntu wabatizwa wakonsha kukeba kumwesha’mba wanemeka bingi lubatizhilo lwanji kabiji wakonsha kulangulukapo kubatizwa jibiji. Kyakumwenako, pa kimye kyo akebelenga kubatizwa, kampe awo muntu waubilengapo bintu bimo byatama mu bufyamfya abyo byakonsheshe kumulengela kumupanga mu kipwilo inge kya kuba wajinga wabatizwa kala pa kyokyo kimye. Nanchi wakonsha kwipana kwi Lesa umvwe kyaikala bino nyi? Uno muntu wakonshatu kwipana bulongo kwi Yehoba panyuma ya kuleka bino byubilo byo bakanya mu binembelo. Ne mu jino jishinda, muntu wabatizwe saka alenga mambo akatampe wakonsha kulangulukishapo bulongo ne kumona inge wafwainwa kubatizwa jibiji.

Pano kyakonsha kwikala byepi umvwe muntu kechi walengelepo mambo kimye kyo akebelenga kubatizwa ne, pano bino panyuma ya kubatizwa walenga mambo afwainwa kumulengela kavoto ka mambo? Twambe amba panyuma ya kubatizwa waamba amba kechi wayukile kyo aubilenga kimye kya lubatizhilo lwanji ne, kabiji ne kuba’mba lubatizhilo lwanji kechi lwalumbulukile ne. Pa kusambakana na uno walenga mambo, bakulumpe mu kipwilo kechi bafwainwa kumwipuzha mepuzho pa mambo a lubatizhilo lwanji ne kukeba kuyuka inge wiumvwa amba kwipana kwanji ne lubatizhilo lwanji byajingatu bulongo ne. Awo muntu waumvwine jashi ja mu Binembelo jaambile pa buneme bwa lubatizhilo. Wakumbwile mepuzho aamba pa mambo a kwipana ne lubatizhilo. Kabiji wavwajile ne bivwalo bingi ne kumwibizha mu mema. Onkao mambo, kyayilamo kwitaba amba waumvwishishe bulongo buneme bwa lubatizhilo. Ne mu jino jishinda bakulumpe mu kipwilo bakonsha kumumona amba ke muntu wabatizwa.

Umvwe muntu waipuzha pa mambo a buneme bwa lubatizhilo, bakulumpe mu kipwilo bafwainwa kumubula byambo biji mu Kyamba kya Usopa kya Kizungu kya March 1, 1960, peja 159 ne peja 160, kabiji ne kya February 15, 1964, kufuma pa peja 123 kufika pa peja 126, muji bishinka byaamba pa kubatizwa jibiji. Kiji ku muntu mwine kumona inge wakonsha kufuukulapo kubatizwa jibiji na mambo a bintu bimo (nabiji kubula kumvwisha bulongo Baibolo pa kimye kyo abatizwe).

Bintu ka bimo bena Kilishitu byo bafwainwa kulangulukapo pa mambo a kwikala mu nzubo imo na bantu bakwabo?

Muntu yense ukebewa mpunzha pa kwikala. Nangwa byonkabyo, lelo jino, bantu bavula kechi baji na mazubo a kyabo kyabo ne. Bwikalo bwa muntu, butuntulu bwa mubiji, nangwa bintu bikwabo byakonsha kulengela balongo ba palepalepa ne balongotu ba kipi kwikala pamo. Mu mapunzha amo mwaya ntanda, balongo bakonsha kwilumbika mu kakibamba kamo mwabula ne pa kutula bintu bya bufyamfya.

Jibumba ja Yehoba kechi jiji na mwingilo wa kupana mizhilo yonse yaamba pa mambo a mazubo afwainwa mwakwikala ba mu kipwilo kya ntanda yonse ne. Bena Kilishitu batundaikwa kumona byaamba mafunde a mu Binembelo pa kuba’mba bayuke inge ngikelo yabo yaitabilwa kwi Lesa nangwa ne. Ñanyi mafunde amo?

Kintu kitanshi ke kumona kyafwainwa kwitumwekela mu bwikalo bwetu ne ku mupashi inge ke twikale na bantu bakwabo. Bantu ka bo tubena kwambapo? Nanchi bapopweshi ba Yehoba nyi? Nanchi bekela mwayila mafunde a mu Baibolo nyi? Mutumwa Paulo wanembele amba: ‘Kechi mujimbaikwe ne: Kwendañana na babi ko kuvulañanya bisela byawama.’—1 Ko. 15:33.

Binembelo bilumbulula kuba’mba Yehoba wakanya bulalelale ne bukende. (Hebe. 13:4) Onkao mambo inge kya kuba ndajilo yakonsha kulengela wamulume ne wamukazhi babula kwisongola ke bekale pamo uba nobe besongola nanchi ne, kechi kyaitabizhiwa kwi Lesa ne. Mwina Kilishitu kechi wafwainwa kwikala mu nzubo mubiwa byubilo byatama ne.

Kabiji Baibolo watundaika bonse bakeba kwitabilwa kwi Lesa ‘kuchina bulalelale.’ (1 Ko. 6:18) Onkao mambo kyawama bena Kilishitu kuchinuzhuka kwikala bwikalo bwakonsha kwibabika mu kizumba kya kwivwanga mu byubilo byatama. Kyakumwenako, akilangulukai pa bena Kilishitu bavula balaala mu nzubo imo. Nanchi ino ndajilo yakonsha kwibatwala mu lweseko nyi? Pano kyakonsha kwikala byepi inge kya kuba wamulume ne wamukazhi babula kwisongola bashalatu babiji na mambo a kuba bakwabo bo bekala nabo bafumapo pa kakimye kacheche? Kabiji kechi kyawama wamulume ne wamukazhi babula kwisongola bino saka befwalama kwikala mu nzubo imo ne. Kyawama kubula kwitwezha mu luno lukatazho. Po pamotu ne mu mazubo a bamishonale, wamulume ne wamukazhi babula kwisongola kechi bafwainwa kwikala pamo nangwa kushala bubiji bwabo mu nzubo ne.

Kabiji kechi kyawama bantu bekana kutwajijila kwikala pamo mu nzubo imo ne. Byo bauba beyukila jimo, kyakonsha kupela bingi kuba byubilo byatama.—Mana. 22:3.

Kishinka kyanema kyapelako kyo twafwainwa kulangulukapo ke kumona bantu ba mu kimasamasa byo bamona bintu byo asalapo kuba muntu. Kyawama mwina Kilishitu kulangulukapo bulongo pa bwikalo bo amona amba bujitu bulongo, pano bino bwakonsha kulengela ba mu kimasamasa kunyinyita. Kechi tukeba byubilo byetu kulengela jizhina ja Yehoba kunenwa bibi ne. Paulo waambile bino kuba’mba: “Kechi mwikale ke ba kwituntulako Bayudea, nangwa Bangiliki, nangwa kipwilo kya Lesa ne: byonka byo ngeseka ne amiwa kwibatokesha bantu bonse ku michima mu bintu byonse byo nguba, kechi nekebela byawama ami mwine ne, kana kwibakebela byawama bakwetu bavula, namba bapuluke.”—1 Ko. 10:32, 33.

Kwikala na nzubo yafwainwa bulongo ya kwikalamo kechi kwapela ku boba bakeba kulama mizhilo yaoloka ya Yehoba ne. Pano bino, bena Kilishitu bafwainwa “kweseka kuyuka bimutokesha ku muchima aye Nkambo.” Bafwainwa kumona amba kafwako kintu kya bunya kibena kubiwa mu mazubo abo ne. (Efi. 5:5, 10) Kino kikebewa bena Kilishitu kulomba lutangijilo lwa Lesa ne kwingila papelela bulume bwabo kwizhikijila bene na bene ku mubiji ne mu milanguluko kabiji ne kulamawizha jizhina jawama ja Yehoba.