Jashi ja Mvula Bantu Jiikajila

Mutende wa Kine ne Luzhikijilo—Bikekalako Kimye Ka?

Bantu bakeba mutende ne luzhikijilo pa myaka yavula. Bino bantu bakankalwa kutana mutende mwine. Mambo ka? Baibolo witubula bintu bibiji byalengela bantu kukankalwa kutana mutende. Kabiji wapana ne mulaye wawama wa kuba’mba: Lesa ukaletela bantu mutende wa kine wa myaka ne luzhikijilo ntanda yonse.

Uno mutende ne luzhikijilo ukeyako byepi kabiji kimye ka? Mwafwainwa kuba byepi pa kuba’mba mukamwenemo bino bintu byawama kulutwe? Ano mepuzho akakumbulwa mu jashi ja mvula bantu jiji na mutwe wa kuba’mba, “Mutende wa Kine ne Luzhikijilo—Bikekalako Kimye Ka?” Jino jashi jafuma mu Baibolo, jikambiwa ntanda yonse kukila mu byalo 230. Ku mapunzha avula, jikambiwa pa Nzubo ya Bufumu ya Bakamonyi ba kwa Yehoba pa Mulungu, April 18, 2010. Bakamonyi baji ko mwikela bakemubula kimye ne mpunzha. Mwane mwaitwa kutanwako.