Kufuma mu Butala Bwetu

Kulamawizha bya Buneme Byetu bya Kala

BANTU ba Yehoba bamwingijila myaka yavula bingi kabiji bapita mu bintu byapusana pusana. Mashimikila awama ne bikwabotu bimwesha byo bapitamo kechi bitanwatu mu mabuku etu ne, bino ne mu bipikichala, mu makalata, mu mashimikila a bwikalo bwa bantu ne byakishakulu byaamba pa mpopwelo yetu, mwingilo wetu wa kusapwila ne mwapita mpopwelo yetu. Mambo ka a kulamina ne kupesapesa bino bintu byamwekele kala? Kala mu bena Isalela mitwe ya bisemi yabulanga baana mizhilo ne mingilo yakukumya ya Yehoba pa kuba’mba ‘bamuketekele Lesa.’—Sala. 78:1-7.

Kupesapesa mu byakishakulu kwakwasha pakatampe mu kufika kwa nkebelo ya Yehoba. Kyakumwenako, balwanyi byo bakebelenga kukanya mwingilo wa kushimika nzubo ya Lesa mu Yelusalema, kupesapesa mu bya kala byalaminwe mu matala a mu Ekabatana, muzhi mukatampe wa bena Media kwalengejile kutana buku Mfumu Kilusa mo anembele byambo bya kuswisha mwingilo wa kushimika nzubo ya Lesa. (Eze. 6:1-4, 12) Onkao mambo, nzubo ya Lesa beishimukulwile kwesakana na mwayijile kyaswa muchima wanji. Kabiji kupesapesa mu byakishakulu kwakwashishe ne Luka nembi wa Mambo Awama ‘kunemba monka mo byalondankena.’—Luka 1:1-4.

Jibumba Jitangijila janemeka bingi byamwekele kala mu jibumba ja Lesa. Umo wa mu jibumba jitangijila byo aambilenga pa buneme bwa kulamawizha bya buswanyi bya mu jibumba ja Lesa waambile’mba: “Pa kuba’mba tuyuke ko tubena kuya, twafwainwa kuyuka ko twafuma.” Onkao mambo, Dipatimenti itala pa bya mu Butala bwetu kyo yalengelwe katataka pa ofweshi mukatampe wa ntanda yonse mu Brooklyn, ku New York, kabiji ubena kutangijilwa na Kavoto ka Kunemba.

“BUKU WA KISEMI” NE “BYAKISHAKULU” BYETU

Byakishakulu bizhiya mu kuya kwa moba, kabiji ne atweba bavula kampe twilangulusha pa kubula kulamawizha bya mu kisemi kyetu. Dipatimenti itala pa bya mu Butala bwetu, iji na mwingilo wabaya wa kulamawizha byakishakulu byetu bibena kuvujilakotu. Bipikichala byalamwa mu Butala nabyo ke lubaji lwa “buku wa kisemi” kyetu. Mabuku etu akala, mashimikila awama a bantu ne byakishakulu bya mu jibumba jetu ke bya buneme biji mu Butala bwetu. Bino “byakishakulu” bitulengela kuyuka mwapita jibumba ja Lesa ne kwitulengela kutwajijila kuya kulutwe na kuchinchika mu kisemi kyetu kya ku mupashi.

Twimutundaika kumona biji mu Dipatimenti itala pa bya mu Butala bwetu kupichila mu kibaba kya katataka kya kuba’mba, “Kufuma mu Butala Bwetu.” Kikalupukanga ja kamo kamo mu Kyamba kya Usopa kya kufundamo. Kyakumwenako, mu Kyamba kya Usopa kikalondelapo, tubena kulanguluka kunemba kibaba muji jishimikila jikakumbula bwipuzho bwa kuba’mba: Dawn Mobile ye mu ka? Bañanyi bamwingijishanga? Wajingako kimye ka, kabiji waingilanga ñanyi mwingilo?

Byonkatu buku wa kisemi byo etuvululamo bya kala, ne biji mu Butala bwetu bitulengela kumona mo twapita ne kuyuka bashakulu betu, bajinga na lwitabilo, bachinchikile bingi. Kabiji bitulengela ne kuyuka buwame ne makatazho aji mu kwingijila Shetu wa mwiulu ne kuyuka byo atangijila ne kukwasha bantu banji kwakubula kukankalwa. (Mpitu. 33:27) Twaketekela kuba’mba Yehoba usakupesha mwingilo wa kulamawizha byakishakulu bya ku mupashi bya jibumba jetu pa kuba’mba tutwajijile kukwatankana kuba kyaswa muchima wanji.

[Kitenguluzha/Kipikichala pa peja 31]

Bingila ino Dipatimenti

Pa kunengezha mabuku a bwina Kilishitu, maselechi a DVD, ne bikwabotu bilumbulula bya mu Baibolo, banembi betu, basendwe, bapesapesa ne bakwabotu bengijisha bya mu Butala. Onkao mambo, Dipatimenti itala pa bya mu Butala bwetu yatako bingi muchima kulamawizha ne kubungizha bya kala kufuma ku maofweshi a misampi, ma dipatimenti a pa Betele, mu bipwilo, ku bantu ne ku bipamo bikwabotu. Akimonai byo bengila:

Kukonkanya ne Kupesapesa: Bintu bibena kunungwakotu ku Butala bwetu. Byavula pa bino ke byobya bibingula bantu baji mu bisemi byaingijila Yehoba mu bukishinka pa myaka yavula. Kupesapesa ne kwesakanya bino bintu kwitukwasha kumvwisha mwapita mpopwelo yetu ne mwapichile bwikalo bwa bantu bajingako kyo kyo kimye.

Byo Bebitanchika: Bintu byalama Dipatimenti itala pa bya mu Butala bwetu byavula bingi, bimo byaikala kukila pa myaka kitota kimo. Muji bintu byavula byapusana pusana, bebitanchika bulongo kabiji banemba ne mutanchi pa kuba’mba kikapele kwibimona pa kukeba kwibingijisha kulutwe.

Kwibiwamisha ne Kwibilamawizha: Mabuku ne bintutu bikwabo byabula kukosa bebiwamisha ne kwibilamawizha kwingijisha mashinda akatataka. Mabuku, bipikichala, mashimikila epi a mu mapepala a byambo, mafilimu, ne maselechi bebibika pa kompyuta. Bakonsha kwibitana pa kompyuta kukila kwingijisha bine bintu bya kala byo balama.

Pa Kwibilamina ne pa Kwibitana: Bintu bya kala byo balama bebitanchika bulongo ne kwibilama bulongo kabiji bebilamawizha ku mumfunte ne kyeya kyakonsha kwibyonauna. Kabiji babena kulenga ne mutanchi wa pa kompyuta wa kwibakwasha kupesapesa ne kwibitana bukiji bino bya buneme byetu bya kala.

[Bipikichala pa peja 32]

1. Kipabi kya kuyukanyikisha vidyo ya “Photo-Drama of Creation.” 2. Pepala wa kwibaswisha kutambisha ino vidyo. 3. Motoka uji na bya kwambilamo. 4. Nkupiko ya Kyamba kya Usopa kya April 15, 1912. 5. Pepala wakumwesha kukaswa kwa ba J. F. Rutherford. 6. Maikolofoni wa mu waileshi wa WBBR. 7. Kijimba kya maselechi. 8. Kyola kya mabuku. 9. Buku wa kunembamo. 10. Nkalata yo batumijile ba J. F. Rutherford.