BAIBOLO UPIMPULA BWIKALO BWA BANTU
“Bakebelenga’mba nemwene amiwa mwine bukine bwa mu Baibolo”
BYASHIMIKIZHA BA LUIS ALIFONSO
MWAKA WA KUSEMWA: 1982
KYALO: DOMINICAN REPUBLIC
MWAPITA BWIKALO BWANJI: NAKOMEJILE MU BUPOPWESHI BWA MORMON
BWIKALO BWA KALA: Nasemekejilwe ku Santo Domingo, mu Dominican Republic, najinga mukala pa baana bana. Bansemi bafunjile bingi kabiji bakebelenga baana babo kwikala na byubilo byawama. Myaka ina saka nkyangye kusemwa, bansemi betu basambakene mishonale wa Mormon. Bansemi betu byo batemenwe mvwajilo, nsakwilo ne byubilo byawama byajinga na bansongwalume, bafuukwilepo kuba’mba kisemi kyetu kitendeke kuya ku Chechi ya Jesus Christ of Latter-day Saints, nangwa’mba Mormon.
Byo nakomene, natendekele kutemwa mingilo ya mu chechi kabiji nanemekele byafunjishanga ba Mormon pa bwikalo bwa kisemi ne byubilo byawama. Natemenwe bingi pa kwikala Mormon kabiji nakebeshenga kwikala mishonale.
Byo nafikizhe myaka 18, kisemi kyetu kyavilukijile ku United States pa kuba’mba nkaye na kufunda ku sukulu mukatampe. Byo papichile mwaka umo, bamama babanyike ne bamwatawabo bajinga Bakamonyi ba kwa Yehoba, betufwakashijile ku Florida. Betwichile kuya na kutanwa ku kushonkena. Natemenwe bingi pa kumona kuba’mba bonse bo naikajile nabo batangilenga binembelo ne kunemba bishinka. Ne amiwa nalombele kipepala ne kinembesho ne kutendeka kunemba bishinka.
Panyuma ya kushonkena bamama babanyike ne bamwatawabo bañambijile’mba byonkeba kwikala mishonale, bakonsha kunkwasha kuyuka byavula bya mu Baibolo. Natemenwe bingi mambo pa kyo kya kimye, nayukiletu bya mu Buku wa ba Mormon kwapwa kechi nayukile bya mu Baibolo ne.
BAIBOLO BYO APIMPWILE BWIKALO BWAMI: Pa kwisamba bya mu Baibolo pa foni, bamama babanyike ne bamwatawabo bantundaikanga kwesakanya byo naitabilamo na mafunjisho a mu Baibolo. Bakebelenga’mba nemwene amiwa mwine bukine bwa mu Baibolo.
Naitabijile mu bintu byavula bingi bya ba Mormon, bino kechi nayukile byaamba Binembelo pa byo naitabijilemo ne. Bamama babanyike bantumijile magazini wa Awake! wa November 8, 1995, wanembwa na Bakamonyi ba kwa Yehoba, mwajinga ne mitwe imo yaamba pa byaitabilamo ba Mormon. Nakuminye bingi pa kutana kuba’mba kechi nayukile mafunjisho onse a ba Mormon ne. Kino kyandengejile kukeba byavula pa Keyala wa ba Mormon pa kuba’mba nshiinwe’mba byajinga mu Awake! bya kine. Byaambile Awake! byajinga bya kine, nayukile byavula kimye kyo nayile mu mazubo a ba Mormon mo basungila bya kishakulu ku Utah.
Naitabijile kuba’mba Buku wa ba Mormon ne Baibolo kechi byapusana ne. Bino byo natendekele kutanga Baibolo kya kine, popo namwene lupusano lwajinga pa mafunjisho a ba Mormon ne byaamba Baibolo. Kyakumwenako, pa Ezikyo 18:4, Baibolo waamba’mba mweo ufwa. Pakuba Buku wa ba Mormon, pa Alma 42:9 waamba’mba: “Mweo kechi wakonsha kufwa ne.”
Kununga pa kupusana kwa byo baitabijilemo, nakumyanga bingi pa byafunjishanga ba Mormon pa kwikyombesha kwa byalo. Ba Mormon bafunjishanga’mba bujimi bwa Edena bwajinga mu kyalo kya Jackson County ku Missouri, mu U.S.A. Kabiji bantangi bafunjishanga’mba, “Lesa ukalama ntanda yonse kupichila mu kafulumende wa United States.”
Nalangulukanga kuba’mba byafunjishanga ba Mormon kana bikobiwa ne mu byalo bikwabo nangwa ne. Juba jimo mabanga navundumwine jino jashi kimye kyo nesambilenga na Mormon wakyanyike wafunjilenga bumishonale byo antumijile foni. Namwipwizhe inge wafwainwa kutemwa kulwa na mukwabo Mormon inge kyalo kyanji ke kilwe na kyalo kyabo. Nakuminye bingi byo akumbwile amba ee! Nalangulukilepo bingi pa mafunjisho o naitabijilemo kabiji nashikishe ne bantangi ba mu chechi ya Mormon. Bambujile kuba’mba mepuzho ami aji pa oa abula mikumbu akakumbulwa inge kyeya kyasama.
Nakuminye bingi pa byo bakumbwile, kya kuba nepeselepesele amiwa mwine ne kumona ene mambo o nakebejilenga kwikala mishonale wa ba Mormon. Navulukile kuba’mba nakebelenga kwikala mishonale, byonkatu byo nakonsha kwikala mu kabungwe kakwasha bantu. Kintu kikwabo kyo nakebejilenga kwikala mishonale ke kya kuba’mba bantu bakampenga munema. Pano bino kechi nayukile byavula pe Lesa ne. Nangwa kya kuba natanganga Baibolo bimye byavula, kechi neinemekele ne. Kechi nayukile Lesa byo akebelenga’mba pano pa ntanda nangwa bantu bekale ne.
BYO NAMWENAMO: Pa bintu byonafunjile mu lufunjisho lwa Baibolo na Bakamonyi ba kwa Yehoba pajinga ne jizhina ja Lesa, byubiwa inge muntu wafwa ne mwingilo wa kwa Yesu mu kufikizha kyaswa muchima wa Lesa. Mu kuya kwa kimye, natendekele kuyuka byavula pa uno buku kabiji naumvwanga bingi bulongo kubulako bakwetu byo nafundanga. Nayukile kuba’mba Lesa koaji, pano luno nakonsha ne kwisamba nanji mu lulombelo byo aji Mulunda nami. Pa 12 July, mu 2004 nabatizhiwe ne kwikala Kamonyi wa kwa Yehoba, kabiji byo papichile bañondo batanu na umo natendekele mwingilo wa kimye kyonse wa bwina Kilishitu.
Naingijile pa myaka itanu pa ofweshi mukatampe wa Bakamonyi ba kwa Yehoba mu Brooklyn, ku New York. Naumvwanga bingi bulongo kukwasha kulenga ma Baibolo ne mabuku alumbulula Baibolo akwasha bantu bavula mwaya ntanda, kabiji nkitwajijila kukwasha bantu kufunda pe Lesa.