Nanchi Mukamuketekela Lesa Nyi?
FWANYIKIZHAI kuba’mba muji na mulunda ye mwatemwa bingi, pano wauba kintu kyatama kimulengela kukumya bingi. Bamo bejizhañanya pa bintu byo auba ne kumupamo mambo ne kwamba’mba mulunda nenu wakanama. Nanchi mukafikenatu mwaswa byo baamba, nangwa mukapembelela mulunda nenu kwimubuula biji jashi nyi? Umvwe kya kuba ufwapo pa kuba’mba emulumbulwile byo aubile, nanchi mukatekanya ne kubula kumupamo mambo nyi?
Mwafwainwa kuyuka bishinka pa kuba’mba mukumbule. Mwakonsha kwishikisha amba, ‘Nanchi uno mulunda na muyuka byepi? Kabiji ki ka kyo na mutemenwa?’ Kyawama kuba bino. Akilangulukai pa kino: Nanchi kechi twakonsha kulondela jifunde jimotu kwishikisha bwipuzho bwa kukeba kuyuka inge Lesa wakanama ne nyi?
Kimye kimo mwakonsha kukankalwa kuyuka bulongo bintu Lesa byo oba nangwa kukumya pa bintu byo aswisha kubiwa. Bantu bavula bakonsha kwimubula amba Lesa wakanama kabiji bakonsha kwimubula amba mu mupemo mambo byonka byo boba. Nanchi mukatekanya kufika ne kimye kyo mukayuka bishinka byavula pe aye nyi? Saka mukyangye kumupamo Lesa mambo, mwafwainwa kufunda byavula pe aye. Ishikishai amba, ‘Ñanyi bintu byawama Lesa byo angubila?’
Umvwe muji na makatazho mu bwikalo bwenu, mwakonsha kwamba’mba Lesa kechi wangubilapo bintu byawama ne. Pano akilangulukai pa kino. Lesa witupa byawama, kechi uleta makatazho mu bwikalo bwetu ne. Byonka byo twamona kala, Satana ye ‘kalama wa ino ntanda,’ kechi Yehoba ne. (Yoano 12:31) Onkao mambo, Satana ye ubena kulengela makatazho onse aji mu ino ntanda. Nanchi kechi mwakonsha kuswa kuba’mba bumbulwakulumbuluka ne bintu bimwekatu kwa kubula kuketekela nabyo byakonsha kulengela makatazho ne nyi?
Pano nga Lesa waubapo ka? Baibolo waamba kuba’mba Lesa ye “walengele jiulu ne ntanda” kabiji mibiji yetu ‘yalengelwe yakatazha’ kabiji waamba’mba Yehoba ye “Lesa yenka walama mweo wenu mu kuboko kwanji.” (Masalamo 124:8; 139:14; Danyela 5:23) Nanchi bino byonse byalumbulula ka?
Ko kuba’mba bumi, byo twenda, byonsetu byanji aye Mulenga wetu. (Byubilo 17:28) Kino kilumbulula kuba’mba bumi, ntanda, butemwe ne bulunda bo twiyowa, bulume bwa kutompa, kukwata, ne kununsha byonse bye ke bupe bwafuma kwi Lesa. (Yakoba 1:17) Nanchi kechi mwaswa kuba’mba ano mapesho alengela uno kwikala ke Mulunda ye twafwainwa kuketekela ne kunemeka ne nyi?
Kimo kimye kyakonsha kwimukatazha pa kuba’mba muketekele Lesa. Kampe mwiumvwa kuba’mba kechi mwamuyuka bulongo kya kuba’mba mwamuketekela bulongo ne. Inge byobyo kiji kwakamwa ne. Mu bino bibaaba bipi, kechi twakonsha kwamba pa bintu byonse bilengela bamo kwamba’mba Lesa wakanama ne. Nanchi kechi kyanema kuyuka Lesa bulongo ne nyi?a Twaketekela kuba’mba byo mubena kufunda pe Lesa mu kayuka bukine pe aye. Nanchi wakanama nyi? Ine: “Mambo Lesa butemwe.”—1 Yoano 4:8.
[Tubyambo twa mushi]
a Kyakumwenako, yukilaipo ne bikwabo pa ene mambo Lesa kyo aswishisha bubi mu kitango 11 kya buku wa kuba’mba Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Kipikichala pa peja 7]
Lesa witupa byawama kechi uleta makatazho mu bwikalo bwetu ne.