MEPUZHO AFUMA KU BATANGA
Nanchi bena Isalela baipayanga bambanzhi kupichila mu kwibakobeka ku bichi nyi?
▪ Bisaka byavula byajingako kala byaipayanga bambanzhi kupichila mu kwibapopa pa bichi. Bena Loma bakasanga nangwa kupopa muntu pa kichi, waikalapo moba avula kufika ne kimye kyo akoka na bibena kukola, na kilaka, nzala ne na mashika ne kyuya. Bena Loma bamonanga’mba kuba bino jo jishinda ja kumanyikilamo bambanzhi bo balengulwile.
Nga bena Isalela ba kala baubanga byepi? Nanchi bena Isalela nabo baipayanga bambanzhi kupichila mu kwibakobeka ku bichi nyi? Mizhilo ya Mosesa yaambile’mba: “Umvwe muntu walenga mambo afwainwa lufu, ne kumwipaya bamwipaya, ne anweba mwamukobeka ku kichi, mubiji wanji kechi akekale bufuku bonse ku kichi ne, bino mwafwainwa kumuzhika pa jonkaja juba.” (Mpitu. 21:22, 23) Onkao mambo, mu kimye kyanembejilwemo Binembelo bya Kihebelu, muntu walenganga mambo afwainwa lufu, patanshi bamwipayanga bino baya na kumukobeka ku kichi.
Pa mambo a kino, kinembelo kya Bena Levi 20:2 kyaamba’mba: “Muntu yense wa mu bena Isalela nangwa mwenyi wikala mu Isalela, ukapana mwananji kwi Moloka ukepayiwa; bena ntanda bo bakamwipaya na kumwasa mabwe.” Yense “wisamba na mipashi, nangwa wayukana nayo” bafwainwe kumwipaya. Bafwainwe kumwipaya byepi? Kupichila mu ‘kumwasa mabwe.’—Levi 20:27.
Mu Mpitulukilo ya mu mizhilo 22:23, 24 tutangamo amba: “Umvwe kukekale kamwale ye baambisha kala, kabiji umvwe muntu akasambakane nanji mu muzhi ne kumona nanji mambo, bakebatwale bonse babiji ku kibelo kya yewa muzhi, kabiji mukebase mabwe bakafwe, aye kamwale mambo kechi watamine muteto byo ajinga mu muzhi ne, ne wa mulume mambo wamulengesha bumvu muka mukwabo; pa kuba byobyo mukafumya bubi mukachi kenu.” Mu bena Isalela ba kala pa kyo kya kimye, kwasa muntu mabwe, jo jajinga jishinda ja kwipayilamo bantu balenganga mambo a bulala.a
Mpitulukilo ya mu mizhilo 21:23 yaamba’mba: “Awa ye bakobeka ku kichi wafingwa kwi Lesa.” Kukobeka kitumbi kya muntu watama, “wafingwa kwi Lesa” pa kichi kwalengelanga bena Isalela kwikala na moyo ne kwikala kya kwibajimunako.
[Tubyambo twa mushi]
a Bashayuka bavula baswa kuba’mba kwesakana na Mizhilo ya Mosesa, mbanzhi bamwipayanga saka bakyangye kumukobeka pa kichi. Nangwa byonkabyo, kuji bishinka bimwesha kuba’mba mu myaka kitota kitanshi, bambanzhi bavula bebapopanga pa bichi saka baji bomi ku Bayudea bino bafwila ponka pa kichi.
[Mabulañano pa peja 13]
Kyamweka mu kimye kyanembejilwemo Binembelo bya Kihebelu, muntu walenganga mambo afwainwa lufu, patanshi bamwipayanga apa bino bamukobeka ku kichi