Kwingijila Lesa ye Muchi Wanji
Bapainiya babiji ba mu kyalo kya Kenya byo batwelele mu nzubo imo, bakuminye bingi pa kutana mwanamulume ye bamwenekotu kya ku mutwe saka alala pa mwanya. Uno muntu wajinga na ka mubiji kacheche ne tumaboko twipi. Byo batwelele besambile nanji pa mulaye wa Lesa wa kuba’mba: “Walemana kulu ukakilauka nobe lupala,” byo aumvwine bino byambo watendekele kumwemwesela.—Isa. 35:6.
Bano bapainiya baishile kuyuka kuba’mba Onesmus wasemekelwe na kikola kinekenesha bikupa kyo batela’mba osteogenesis. Bikupa byanji byanekenene kya kuba inge babula kumukwata bulongo byakonsha kumokoka. Na mambo a kuba kafwako muchi wakonsha kupwisha kino kikola ne, Onesmus waketekejile kuba’mba mu bwikalo bwanji bonse ukayandangatu ne kwendela mu kakinga ka balemana.
Onesmus waswile kufunda Baibolo. Nangwa byonkabyo, bainanji bamukanyanga kutanwa ku kupwila kwa bwina Kilishitu, mambo balangulukilenga kuba’mba kwakonsha kumulengela kwikozha ne kunungapo misongo ikwabo. Onkao mambo, balongo bakopanga majashi a pa kupwila ne kutwajila Onesmus ku nzubo kuba’mba atelekengako. Byo afunjile pa bañondo batanu, Onesmus wafuukwilepo kutendeka kutanwa ku kupwila nangwa kya kuba kino kyabikile bumi bwanji mu kizumba.
Abya kutanwa ku kupwila kwa bwina Kilishitu kwalengejile Onesmus kunungako misongo nyi? Ine. Onesmus uvuluka’mba: “Kutanwa ku kupwila kwandengelanga kubula kuta muchima pa misongo yami.” Wataine kuba’mba luketekelo lwa katataka lo ajinga nalo lo lwamulengelanga kumvwako bulongo. Bainanji Onesmus byo bamwene lupimpu mu mwanabo, baumvwine bingi bulongo kya kuba nabo baswile kufunda Baibolo. Baambile’mba: “Kwingijila Lesa ye muchi wa mwanami.”
Kechi papichile ne moba avula ne, Onesmus waikele musapwishi wabula kubatizhiwa. Mu kuya kwa kimye wabatizhiwe, luno ke nkwasho mu kipwilo. Nangwa kya kuba kechi wenda nangwa kwingijisha maboko anji ne, Onesmus wakebelenga bingi kwingila papelela bulume bwanji mu mwingilo wa Yehoba. Wakebelenga kwingilako bupainiya bwa kukwasha, pano bino wakankazhaminenga kunembesha. Mambo ka? Mambo wayukile kuba’mba kechi wakonsha kwingila bunke kwa kubula wa kumushinjikako mu kakinga kanji ne. Byo abujile balongo byo akebelenga kuba, bamubujile kuba’mba bakamukwashanga. Ne kya kine Onesmus bamukwashishe kwingila bupainiya bwa kukwasha.
Onesmus wakebelenga ne kwingila bupainiya bwa kimye kyonse, pano bino, napo wakankazhaminenga na mambo a lukatazho lwanji. Nangwa byonkabyo, juba jimo kinembelo kya juba kyamutundaikile bingi. Kino kinembelo kyajinga Salamo 34:8, po tutanga’mba: “Mutompai, mumone byo awama aye Yehoba.” Panyuma ya kulanguluka pa kino kinembelo, Onesmus wafuukwilepo kutendeka bupainiya bwa kimye kyonse. Aluno mu mulungu umo uya na kusapwila moba ana, kabiji uji na mafunjisho a Baibolo avula bingi abena kuba bulongo. Mu 2010, watainwe ku Sukulu wa Mwingilo wa Bupainiya. Onesmus waumvwine bingi bulongo pa kutana kuba’mba pa balongo babiji bebafunjishenga uno sukulu pajinga ne mulongo wamusapwijile kimye kitanshi.
Luno Onesmus ubena kunangijila myaka ya kusemwa 40. Bansemi banji bafwa, nangwa byonkabyo, balongo ne banyenga mu kipwilo bamulama ne kumubila byonse byo akeba pa juba pa juba. Usanta bingi pa bintu byawama byo eyowa, kabiji ubena kutengela kimye kikafika byambo bya kuba’mba “kafwako nangwa umo wikala mu yewa muzhi ukamba’mba: Nakolwa, ne.”—Isa. 33:24.
[Kipikichala pa peja 15]
[Kipikichala pa peja 15]