Mambo ka Lesa o Aswishisha Bantu Baji na Bulume Kumanyika Bakwabo?

Mu Baibolo muji mashimikila aamba pa bantu bo bamanyikile ku bantu baji na bulume. Langulukai byo kyajinga ne Nabota.a Ahaba, wajinga mfumu wa bena Isalela mu kitota kya myaka kya bu 10 B.C.E, waswishishe mukazhanji aye Yezebeli kwipaya Nabota ne baana banji pa kuba’mba atambule bujimi bwanji bwa miñanzañanza. (1 Bamfumu. 21:1-16; 2 Bamfumu 9:26) Mambo ka Lesa o aswishishe Nabota kwingijisha bulume mu jishinda jabula kufwainwa?

Lekai twambe pa kino kishinka kyanema kya kuba’mba: Lesa kechi ubepa ne. (Titusa 1:2) Kino kyakwatankana byepi na byubilo byatama bya kumanyika bantu? Ku ntendekelotu, Lesa wajimwineko bantu kuba’mba kumusatukila mukafuma lufu. Kufumatu kimye kya bunsatuki mu Bujimi bwa Edena, lufu lwaishile ku bantu monka mwaambijile Lesa. Lufu lwamwekele patanshi ku muntu panyuma ya kuba Kaina waipaya mulongo wanji Abela kupichila mu kumumanyika.—Ntendekelo 2:16, 17; 4:8.

Kufumatu kyokya kimye, Baibolo waambapo pa kino amba: “Muntu umo byo oba bunkambo pa muntu mukwabo mu kumuyanjisha.” (Musapwishi 8:9) Nanchi bino byambo bya kine nyi? Yehoba wajimwine mukoka wa bena Isalela, ko kuba’mba bantu banji amba bakekala na bamfumu bakanama ne kujijila Lesa kuba’mba ebakwashe. (1 Samwela 8:11-18) Mfumu Solomone naye wamanyikile bingi bantu banji kupichila mu kwibapa mingilo yakosa. (1 Bamfumu 11:43; 12:3, 4) Bamfumu batamine nabiji Ahaba bamanyikanga bingi bantu. Akilangulukai pa kino: Umvwe kya kuba Lesa kechi waswishishe bino byubilo bya kumanyika bantu ne, nanchi byambo byanji inge byajinga bya kine nyi?

Vulukai ne kuba’mba Satana wamba amba bantu bengijila Lesa na mambo a kuba’mba wibobila byawama. (Yoba 1:9, 10; 2:4) Umvwe kya kuba Lesa wazhikijile bakalume banji ku lumanamo, nanchi byambo byaambile Satana inge kechi byajinga bya kine ne nyi? Kabiji umvwe kya kuba Lesa wazhikijile bantu bonse ku lumanamo, nanchi kino inge kechi kyalengejile bantu kutendeka kumulangulukila bya bubela ne nyi? Na mambo a luno luzhikijilo, bantu bavula inge balanguluka kuba’mba bakonsha kwilama abo bene kwakubula Lesa. Bino Mambo a Lesa amba kyapusanako kuba’mba, muntu kechi wakonsha kwilama mwine bunke ne. (Yelemiya 10:23) Pa kuba’mba lumanamo lukapwe, kanatu Bufumu bwa Lesa bukeye.

Nanchi ko kuba’mba Lesa ubena kutalapotu pa lumanamo nyi? Ine. Akimonai bintu bibiji byo auba: Kitanshi, walengela lumanamo kuyukanyikwa byo luji. Mambo anji atokeshapo bulongo pa byonse byaubile Yezebeli kwi Nabota. Baibolo waamba kuba’mba ubena kutundaika bino byubilo byatama ke kalama uji na bulume ukeba kubula kumuyuka. (Yoano 14:30; 2 Kolinda 11:14) Baibolo wamutongola kuba’mba Satana Diabola. Pa kusolola ulengela bubi ne lumanamo, Lesa witukwasha byo twafwainwa kuchinuzhuka buno bubi. Mu kuba bino, wazhikijila bumi bwetu bwa myaka ne myaka bwa kulutwe.

Kya bubiji, Lesa witupa luketekelo lwa kuba’mba ukapwisha lumanamo lonse. Byonkatu byo asolwele Ahaba ne Yezebeli, kwibachibila mambo, kwibakambula ne bakwabo bajinga nobe aye, byobyo akakambula ne bonse baji na byubilo byatama kulutwe. (Salamo 52:1-5) Kabiji Lesa walaya kuba’mba katatakatu akafumyepo bubi ne lumanamo ku bantu bamutemwa.b Nabota ne baana banji bajinga ba kishinka bakekala mu paladisa myaka ne myaka mu kyalo mwabula nshiji.—Salamo 37:34.