Kakitenguluzha Ka Mepuzho

◼ Maola anga o mwafwainwa kufunjisha muntu Baibolo?

Kimye kya kufunda na bantu kechi kyapimwa ne. Nangwa byonkabyo, kuyuka bulongo biji bantu bo tufunjisha ne kusaka amba bakome ku mupashi, twafwainwa kwibafunjishanga mafuka aesakanatu. Tusaka amba bo tufunjisha bayuke ne kumvwisha, kabiji bengijishenga bintu byo babena kufunda. Mu mwaka wa 2005 twatambwijile buku wa kuba’mba Nanchi Baibolo Kine Ufunjisha’mba Ka? Muntu wafwainwa kufunda uno buku yense mu kimyetu kicheche, kabiji ba “michima ya bukishinka” bafwainwa kufunda kupichila mu kwingijisha uno buku pa kuba’mba bepane ne kubatizhiwa.—Byu. 13:48.

Nangwa byonkabyo, bonse bo tufunjisha Baibolo kechi bakomenatu pamo ku mupashi ne. Bantu bamo kechi baji na kanswatu kusaka kuyuka bukine nangwa kukwatakanya bukiji bintu byo babena kufunda ne. Bakwabo nabo bapayankanatu na bintu bikwabo. Kimye kimo kyafwainwa kusenda kimye kyabaya pa kuba’mba mupwishe bitango bimo biji mu buku. Bino byafwainwa kwitukwasha kuyuka bulongo mwa kubila.

Basapwishi bavula babena kwibikako bingi kufunjisha bantu bavula pa ñondo pa ñondo. Na mambo a kupayankana, kimye kimo tufundatu na muntu pa kakimye kacheche ne kuya pa muntu mukwabo ye tufunjisha. Bantu bo mufunda nabo bakonsha kukoma byepi ku mupashi? Akifwanyikizhai byo kikala pa kwambula mujilo. Mwibikako bingi pa kuba’mba mujilo ambuke. Umvwe kya kuba nkunyi yakepapo pa kyoto kabiji kechi mwatako muchima kupupushila ne, ubatu saka afutumukatu kya kuba kechi mwakonsha kutekapo bya kuja ne. Po pamotu na muntu ye tufunjisha, nangwa kya kuba kechi tufunda nanji kimye kyabaya ne, nanchi twikalako na kimye kya kumukwasha kuba’mba omvwishe byambo byo abena kufunda, kwibikwatakanya, ne kulanguluka byo afwainwa kwibingijisha nyi?—be ji. 60 mafu. 1-3.

Kwesekana na muntu ye tufunjisha, kimye kimo twakonsha kupwisha kitango kimo mu jiola jimo nangwa kukilapo pacheche, kwakubula kufunda lubilo amba kanatu tupwishe. Muntu ye tufunjisha ukanunguluka bulongo umvwe saka tulama kimye kyo twaitabanzhana kufunda mu mulungu ne kwikala na kimye kyawama kya kwisamba pa bintu byo abena kufunda.

Nanchi twakonsha kukwasha bo tufunjisha Baibolo kukosesha bulunda bwabo na Lesa nyi? Umvwe saka twingijisha bulongo mabuku alumbulula Baibolo ne kimye kyetu, tukwashanga bantu bavula kwikala bana ba bwanga ne kubatizhiwa “moba onse kukafikatu ne ku mpelo ya buno bwikalo.”—Mat. 28:20.