Emɔs
4 “Una yɛri dɛn wɔd dɛn ya, una dɛn kaw dɛn na Beshan,
Una we de na di mawntin dɛn na Sameria,
Una dɛn uman dɛn we de kruk di wan we nid ɛp
Ɛn we de sɔprɛs di wan we po,
We de tɛl dɛn man* dɛn se, ‘Briŋ kam sɔntin fɔ wi fɔ drink!’
2 Jiova we na di Masta We De Rul Ɔlman dɔn yuz in olinɛs fɔ swɛ se,
‘“Luk! Di tɛm go kam we dɛn go yuz buchaman uk fɔ es una
Ɛn fishin uk fɔ es di wan dɛn we lɛf.”’
3 Jiova se, “Una go pas na di spes dɛn we de na di wɔl, ɛn go stret bifo una;
Dɛn go drɛb una go Amɔn.”
4 ‘Una kam na Bɛtɛl ɛn kɔmit sin,*
Una kam na Gilgal ɛn kɔmit mɔ sin!
Una briŋ una sakrifays dɛn na mɔnin,
Ɛn una tayt* dɛn di tɔd de.’
5 Jiova we na di Masta We De Rul Ɔlman se, ‘E pipul dɛn na Izrɛl, una bɔn bred we gɛt yist as sakrifays fɔ tɛl tɛnki;
Una tɔk lawd wan bɔt di sakrifays dɛn we una dɔn mek-ɔp una maynd fɔ gi!
Bikɔs na dis una lɛk fɔ du.’
6 Jiova se, ‘A mek angri de na ɔl una siti dɛn
Ɛn mek it nɔ de na ɔl una os dɛn
Bɔt una nɔ kam bak to mi.
7 A mek bak ren nɔ kam fɔ tri mɔnt bifo di avɛst;
A mek ren kam na wan siti, bɔt i nɔ kam na ɔda siti.
Wansay go gɛt ren,
Bɔt ɔdasay go dray bikɔs ren nɔ kam de.’
8 Jiova se, ‘Pipul dɛn na tu ɔ tri siti dɛn go staga go na wan siti fɔ drink wata,
Ɛn dɛn nɔ go satisfay;
Bɔt una nɔ kam bak to mi.’
9 Jiova se, ‘A mek di ples wam pasmak fɔ una plant dɛn ɛn dɛn meleju.
Una ad pan una gadin dɛn ɛn vayn gadin dɛn,
Bɔt di grasɔpa* dɛn go it una fig stik dɛn ɛn una ɔliv stik dɛn;
Stil, una nɔ kam bak to mi.’
10 Jiova se, ‘A sɛn pan una sik we de prɛd lɛk di wan na Ijipt.
A kil una yɔŋman dɛn wit sɔd ɛn kapchɔ una ɔs dɛn.
A mek una kamp smɛl te di sɛnt rich na una nos,
Bɔt una nɔ kam bak to mi.’
11 Jiova se, ‘A ovatro una siti
Lɛk aw a ovatro Sɔdɔm ɛn Gomɔra.
Una tan lɛk wud we dɛn drɔ kɔmɔt na faya,
Bɔt una nɔ kam bak to mi.’
12 E Izrɛl, na dat a go du to una.
E Izrɛl, una rɛdi fɔ mit una Gɔd,
Bikɔs na dis a go du to una.
13 Luk! In na di Wan we mek di mawntin dɛn ɛn di briz;
I de tɛl mɔtalman wetin i de tink,
I de tɔn doklin to daknɛs,
Ɛn i de waka na di ay ples dɛn na di wɔl;
In nem na Jiova, di Gɔd we gɛt bɔku bɔku sojaman dɛn.”