Sam
106 Prez Ja!*
Tɛl Jiova tɛnki bikɔs i gud;
In lɔv we nɔ de chenj go de sote go.
2 Udat go tɔk bɔt ɔl di pawaful tin dɛn we Jiova dɔn du
Ɔ tɔk bɔt ɔl di tin dɛn we i dɔn du we mek i fit fɔ gɛt prez?
3 Di wan dɛn we de du tin fia wan
Ɛn di wan dɛn we de du wetin rayt ɔltɛm, gɛt gladi-at.
4 E Jiova, mɛmba mi we yu de sho sɔri-at to yu pipul dɛn.
Tek kia ɔf mi ɛn sev mi,
5 So dat a go ɛnjɔy di gudnɛs we yu de sho to di wan dɛn we yu dɔn pik;
So dat a go gladi togɛda wit yu pipul dɛn,
Ɛn a go blɔf we a de prez yu wit yu pipul dɛn we na yu prɔpati.
6 Wi dɔn sin jɔs lɛk aw wi gret gret granpa dɛn bin sin;
Wi dɔn du bad; wi dɔn du wikɛd tin dɛn.
7 Wi gret gret granpa dɛn na Ijipt
Nɔ bin sho tɛnki fɔ di wɔndaful tin dɛn we yu bin du;
Dɛn nɔ bin mɛmba yu pasmak lɔv we nɔ de chenj,
Bɔt dɛn mek trangayes na di Rɛd Si.
8 Bɔt i sev dɛn bikɔs ɔf in nem,
Fɔ mek pipul dɛn no aw i pawaful.
9 I kɔmand di Rɛd Si, ɛn i dray;
I mek dɛn waka na di say we dip na di si lɛk se na dɛzat.*
10 I sev dɛn frɔm di wan dɛn we et dɛn,
Ɛn i pul dɛn kɔmɔt na dɛn ɛnimi dɛn an.
11 Di wata kɔba dɛn ɛnimi dɛn;
Wan pan dɛn sɛf nɔ sɔvayv.*
12 Dɔn dɛn put fet pan in prɔmis;
Dɛn bigin fɔ siŋ fɔ prez am.
13 Bɔt kwik kwik wan dɛn fɔgɛt wetin i du;
Dɛn nɔ wet fɔ in advays.
14 Dɛn alaw di tin dɛn we dɛn want fɔ kɔntrol dɛn na di wildanɛs;*
Dɛn tɛst Gɔd na di dɛzat.
15 I gi dɛn wetin dɛn aks fɔ,
Bɔt i put sik pan dɛn we mek dɛn* wik ɛn day.
16 Dɛn jɛlɔs Mozis na di kamp,
Ɛn dɛn jɛlɔs Erɔn we na Jiova in oli wan.
17 Di grɔn opin ɛn swɛla Detan,
Ɛn i kɔba di wan dɛn we bin de togɛda wit Abayram.
18 Faya kech pan dɛn;
Faya bɔn di wikɛd wan dɛn.
19 Dɛn mek pikin kaw na Ɔrɛb,
Ɛn dɛn butu bifo statyu we dɛn mek wit mɛtal;
20 Dɛn ɛkschenj in glori
Fɔ kaw we de it gras in statyu.
21 Dɛn fɔgɛt Gɔd we sev dɛn,
We du pawaful tin dɛn na Ijipt,
22 We du wɔndaful tin dɛn na di land we nem Am,
Ɛn we du pawaful tin dɛn na di Rɛd Si.
23 I bin want fɔ gi kɔmand fɔ mek dɛn dɔnawe wit dɛn,
Bɔt Mozis, we na di wan we i dɔn pik, bin beg fɔ dɛn
Fɔ mek i nɔ dɔnawe wit dɛn bikɔs i vɛks.
24 Dɛn bin et di fayn land;
Dɛn nɔ bin gɛt fet pan in prɔmis.
25 Dɛn kɔntinyu fɔ grɔmbul na dɛn tɛnt dɛn;
Dɛn nɔ bin lisin to Jiova.
26 So i es in an ɛn swɛ dɛn se
I go mek dɛn day na di wildanɛs;*
27 I go mek dɛn pikin dɛn day na di neshɔn dɛn,
Ɛn i go skata dɛn ɔlsay na di land.
28 Dɔn dɛn wɔship Beal na Piɔ,
Ɛn dɛn it sakrifays dɛn we dɛn mek to dayman.*
29 Dɛn mek i vɛks bikɔs ɔf di tin dɛn we dɛn de du,
Ɛn bad bad sik kam pan dɛn.
30 Bɔt we Finias grap ɛn du sɔntin,
Di sik bin stɔp.
31 Ɛn Gɔd tek am as pɔsin
We de du wetin rayt sote go.
33 Dɛn bin mek Mozis vɛks,
Ɛn i tɔk we i nɔ tink.
34 Jiova bin tɛl dɛn fɔ dɔnawe wit di pipul dɛn,
Bɔt dɛn nɔ bin du am.
35 Bifo dat, dɛn bin de kip kɔmpin wit di pipul dɛn na di neshɔn dɛn,
Ɛn dɛn falamakata* di we aw dɛn de du tin.
36 Dɛn kɔntinyu fɔ wɔship dɛn aydɔl dɛn,
Ɛn i bin tan lɛk trap fɔ dɛn.
37 Dɛn bin de sakrifays dɛn bɔypikin dɛn
Ɛn dɛn galpikin dɛn to dimɔn dɛn.
38 Dɛn kɔntinyu fɔ kil dɛn inosɛnt bɔypikin dɛn
Ɛn galpikin dɛn bay we dɛn sakrifays dɛn
To di aydɔl dɛn na Kenan;
Di land bin dɔti bikɔs ɔf di kil we dɛn bin de kil.
39 Dɛn nɔ bin klin bikɔs ɔf di tin dɛn we dɛn bin de du;
Dɛn bin de wɔship lay lay gɔd dɛn bay wetin dɛn bin de du.
40 So Jiova vɛks pan in pipul dɛn,
Ɛn i bigin fɔ et in prɔpati.
41 I bin de an ova dɛn ɔltɛm to di neshɔn dɛn,
So dat di wan dɛn we et dɛn go rul dɛn.
42 Dɛn ɛnimi dɛn bin de sɔprɛs dɛn,
Ɛn dɛn bin de ɔnda dɛn kɔntrol.*
43 I bin de sev dɛn bɔku tɛm,
Bɔt dɛn bin de mek trangayes ɛn nɔ obe am,
Ɛn i bin de disgres dɛn fɔ dɛn sin dɛn.
44 Bɔt i bin de si di sɔfa we dɛn bin de sɔfa,
Ɛn i bin de yɛri di kray we dɛn bin de kray fɔ ɛp.
45 I bin de mɛmba in agrimɛnt fɔ dɛn sek,
Ɛn i bin de fil sɔri fɔ dɛn bikɔs ɔf in pasmak lɔv we nɔ de chenj.
46 I bin de mek ɔl di wan dɛn we kech dɛn
Fil sɔri fɔ dɛn.
47 Sev wi, E Jiova wi Gɔd,
Ɛn gɛda wi frɔm di neshɔn dɛn
So dat wi go prez yu oli nem
Ɛn gladi we wi de prez yu.
48 Una prez Jiova, we na Izrɛl in Gɔd, sote go.
Ɛn lɛ ɔl di pipul dɛn se, “Emɛn!”*
Prez Ja!*