Job
17 “A nɔ gɛt trɛnk igen ɛn a nɔ gɛt bɛtɛ tɛm igen;
Di grevyad de wet fɔ mi.
2 Di wan dɛn we de provok mi de rawnd mi,
Ɛn mi yay mɔs si di bad bad tin dɛn we dɛn de du.
3 Duya tek di tin we a de gi yu as garanti ɛn kip am.
Udat bak go ɛp mi?
4 Yu dɔn ayd ɔndastandin frɔm dɛn at,
Na dat mek yu nɔ ɔnɔ dɛn.
5 Dɛn de sheb wetin dɛn gɛt wit dɛn padi dɛn,
We i bi se angri de mek dɛn pikin dɛn yay dak.
6 I dɔn mek pipul dɛn de fityay mi,
Ɛn dat dɔn mek dɛn de pit na mi fes.
7 Pen dɔn mek a nɔ de si fayn,
Ɛn mi wan ol bɔdi dɔn dɔn.
8 Pipul dɛn we de waka tret wit Gɔd sɔprayz we dɛn de si dis,
Ɛn di inosɛnt wan dɛn at pwɛl bikɔs ɔf di wan dɛn we nɔ lɛk Gɔd.*
9 Di wan we de du wetin rayt de kɔntinyu fɔ du wetin rayt,
Ɛn di wan we in an klin de gɛt mɔ trɛnk.
10 Una ɔl kin kam ɛn bigin fɔ agyu bak,
Bɔt a nɔ si ɛniwan pan una we gɛt sɛns.
11 Mi tɛm dɔn dɔn;
Mi plan dɛn, di tin dɛn we a want fɔ du, dɔn pwɛl.
12 Dɛn de kɔntinyu fɔ mek nɛt tɔn to santɛm,
Dɛn de se, ‘Do go klin jisnɔ bikɔs di ples dak.’
13 If a wet, di Grev* go bi mi os;
A go prɛd mi bed na daknɛs.
14 A go tɛl di grev se, ‘Yu na mi papa!’
Ɛn a go tɛl di tumbu dɛn se, ‘Una na mi mama ɛn mi sista dɛn!’
15 So usay mi op de?
Udat go si am fɔ mi?