Rɛvɛleshɔn

10 Ɛn a si wan ɔda strɔng enjɛl de kɔmɔt na ɛvin kam dɔŋ, di klawd rap pan am, ɛn renbo bin de na in ed, ɛn in fes bin tan lɛk di san, ɛn in fut dɛn bin fiba pila dɛn we tan lɛk faya, 2 ɛn i gɛt wan smɔl skrol we opin na in an. Ɛn i put in rayt fut na di si, ɛn in lɛft fut na di wɔl, 3 ɛn i ala lawd lawd wan lɛk we layɔn de ala. Ɛn we i ala lawd wan, di vɔys dɛn we di sɛvin tɛnda dɛn gɛt, tɔk.

4 We di sɛvin tɛnda dɛn tɔk, a bin want fɔ rayt, bɔt a yɛri wan vɔys na ɛvin tɔk se: “Sil* di tin dɛn we di sɛvin tɛnda dɛn tɔk, ɛn nɔ rayt dɛn.” 5 Di enjɛl we a bin si tinap na di si ɛn na di wɔl es in raytan ɔp na ɛvin, 6 ɛn i swɛ to di Wan we de liv sote go, we mek di ɛvin ɛn di tin dɛn we de de, di wɔl ɛn di tin dɛn we de de, ɛn di si ɛn di tin dɛn we de de. I swɛ se: “No westɛm nɔ go de igen. 7 Bɔt na insay di dez dɛn we di nɔmba sɛvin enjɛl bin want fɔ blo in trɔmpɛt, di oli sikrit we Gɔd bin dɔn tɔk as gud nyuz to in slev dɛn, we na di prɔfɛt dɛn, apin.”

8 Ɛn a yɛri di vɔys we kɔmɔt na ɛvin tɔk to mi bak se: “Go, tek di skrol we opin na di enjɛl we tinap na di si ɛn na di wɔl, in an.” 9 A go to di enjɛl ɛn tɛl am mek i gi mi di smɔl skrol. I tɛl mi se: “Tek am ɛn it am, i go mek yu bɛlɛ bita, bɔt i go swit lɛk ɔni insay yu mɔt.” 10 A tek di smɔl skrol na di enjɛl in an ɛn it am, ɛn i bin swit lɛk ɔni insay mi mɔt, bɔt we a it am, i mek mi bɛlɛ bita. 11 Ɛn dɛn tɛl mi se: “Yu fɔ kɔntinyu fɔ tɔk wetin Gɔd tɛl yu bɔt pipul dɛn, neshɔn dɛn, difrɛn langwej dɛn, ɛn bɔku kiŋ dɛn.”