Sam
To di wan we de dayrɛkt; di myuzik we nem “Nɔ Dɔnawe wit Mi.” Devid in siŋ. Miktam.*
58 Yu go ebul fɔ tɔk bɔt wetin rayt we yu sɛt mɔt?
Mɔtalman go ebul fɔ jɔj di rayt we?
2 Yu de plan wetin bad na yu at,
Ɛn yu de mek fɛt-fɛt de na di land.
3 Wikɛd pipul dɛn kɔrɔpt frɔm we dɛn bɔn dɛn;*
Dɛn wewɔd, dɛn na layman dɛn frɔm di tɛm we dɛn bɔn dɛn.
4 Di wɔd dɛn we dɛn de tɔk tan lɛk snek pɔyzin;
Dɛn dɛf lɛk kobra we de lɔk in yes.
5 I nɔ go lisin to di wan dɛn we de kɔntrol snek,
Ilɛk uskayn juju dɛn yuz.
6 E Gɔd, pul dɛn tit dɛn na dɛn mɔt!
E Jiova, brok dɛn layɔn dɛn ya dɛn jɔ dɛn!
7 Lɛ dɛn lɔs lɛk wata we de dren.
Mek I bɛn in bo ɛn lɛ in aro dɛn mek dɛn fɔdɔm.
8 Mek dɛn tan lɛk snel we de mɛlt as i de waka;
Mek dɛn tan lɛk pikin we day na in mama in bɛlɛ, ɛn i nɔ ɛva si di san.
9 Bifo di chukchuk stik in hit mit yu pɔt,
Gɔd go mek big big briz blo fɔ pul di chukchuk stik we sok ɛn di wan we de kech.
10 Di wan we de du wetin rayt go gladi, bikɔs i dɔn si we Gɔd de tɔn-am-gi;
In fut go sok wit di wikɛd wan dɛn blɔd.
11 Dɔn pipul dɛn go se: “Fɔ tru, bɛnifit de we pɔsin du wetin rayt.
Fɔ tru, Gɔd de we de jɔj di wɔl.”