Galeshians

3 E Galeshian dɛn we nɔ gɛt sɛns! Udat dɔn ful una, pan ɔl we dɛn bin dɔn sho una klia wan se dɛn nel Jizɔs Krays na di tik? 2 Na wan tin a want fɔ aks* una: Na bikɔs una bin de du wetin lɔ se mek una gɛt di spirit, ɔ na bikɔs una bin gɛt fet pan wetin una yɛri? 3 Fɔ se una nɔ rili gɛt sɛns? Afta una dɔn bigin mek di spirit gayd una, naw una want fɔ fala di we aw mɔtalman de tink? 4 Fɔ se ɔl di sɔfa we una bin de sɔfa na fɔ natin? If na tru se na fɔ natin. 5 So, fɔ se di wan we de gi una di spirit ɛn we de du pawaful tin dɛn midul una de du dat bikɔs una de du wetin lɔ se, ɔ na bikɔs una gɛt fet pan wetin una yɛri? 6 Jɔs lɛk aw Ebraam “put fet pan Jiova,* ɛn bikɔs ɔf dat Gɔd tek am as pɔsin we de du wetin rayt.”

7 Fɔ tru, una no se na di wan dɛn we gɛt fet na dɛn na Ebraam in pikin dɛn. 8 Di skripchɔ bin dɔn sho bifo tɛm se Gɔd go si pipul dɛn na ɔda neshɔn dɛn as pipul dɛn we de du wetin rayt bikɔs ɔf dɛn fet, so bifo tɛm i tɛl Ebraam di gud nyuz se: “Yu go mek ɔl di neshɔn dɛn gɛt blɛsin.” 9 So di wan dɛn we gɛt fet de gɛt blɛsin wit Ebraam, we bin gɛt fet.

10 Ɔl di wan dɛn we abop pan di du we dɛn de du wetin lɔ se gɛt swɛ, bikɔs dɛn rayt se: “Ɛnibɔdi we nɔ kɔntinyu fɔ du ɔl di tin dɛn we dɛn rayt pan di Lɔ skrol gɛt swɛ.” 11 Pantap dat, i klia se lɔ nɔ de mek Gɔd tɔk se ɛnibɔdi de du wetin rayt na in yay, bikɔs “di wan we de du wetin rayt go liv bikɔs i gɛt fet.” 12 Di Lɔ nɔ gɛt natin fɔ du wit fet. Bɔt “ɛnibɔdi we de du dɛn tin ya go liv bikɔs ɔf dɛn.” 13 Krays dɔn bay wi; i dɔn pul di swɛ we di Lɔ put pan wi bay we i dɔn gɛt di swɛ fɔ wi, bikɔs dɛn rayt se: “Ɛnibɔdi we dɛn ɛng pan tik gɛt swɛ.” 14 Dis apin fɔ lɛ di neshɔn dɛn gɛt Ebraam in blɛsin tru Krays Jizɔs, so dat wi go gɛt di spirit we dɛn bin dɔn prɔmis wi bikɔs ɔf wi fet.

15 Mi brɔda dɛn, a de yuz mɔtalman ɛgzampul: We agrimɛnt dɔn ol wata, ilɛk na mɔtalman agrimɛnt, nɔbɔdi nɔ go pwɛl am ɔ ad ɛnitin to am. 16 Gɔd mek di prɔmis to Ebraam ɛn to in pikin. I nɔ se, “ɛn to yu pikin dɛn,” lɛk se dɛn bɔku. Bɔt i se, “ɛn to yu pikin,” dat na wan pɔsin, we na Krays. 17 Apat frɔm dat, a de tɔk dis: Di Lɔ, we kam afta 430 ia, nɔ pwɛl di agrimɛnt we Gɔd bin dɔn mek, we fɔ mek di prɔmis nɔ ol wata. 18 If di tin we Gɔd de gi na bikɔs ɔf lɔ, dat min se nɔto bikɔs ɔf prɔmis igen; bɔt bikɔs Gɔd gud, i dɔn gi am to Ebraam tru wan prɔmis.

19 Wetin mek di Lɔ bin de naw? I kam fɔ sho di bad tin dɛn we pipul dɛn de du te di pikin we dɛn mek di prɔmis to kam; Gɔd gi di Lɔ to enjɛl dɛn ɛn dɛn gi am to wan midulman. 20 Midulman nɔ kin de we na wan pɔsin nɔmɔ de, bɔt na Gɔd in wangren mek di prɔmis. 21 So fɔ se di Lɔ de agens Gɔd in prɔmis dɛn? Nɔ-o! If lɔ bin de we de gi layf, Gɔd bin fɔ se pɔsin de du wetin rayt bikɔs ɔf lɔ. 22 Bɔt di Skripchɔ dɔn an ova ɔltin to sin, so dat di wan dɛn we de sho se dɛn gɛt fet go gɛt di prɔmis we pɔsin de gɛt bikɔs i gɛt fet pan Jizɔs Krays.

23 Bɔt bifo di fet kam, na lɔ bin de gayd wi, dɛn bin dɔn an ova wi to am; wi bin de wet fɔ di fet we dɛn bin gɛt fɔ sho wi. 24 So di Lɔ na bin pɔsin we de gayd* wi fɔ kɛr wi go to Krays, so dat Gɔd go tɔk se wi de du wetin rayt bikɔs ɔf fet. 25 Bɔt naw we di fet dɔn kam, wi nɔ de ɔnda di pɔsin we de gayd* wi igen.

26 Infakt, una ɔl na Gɔd in pikin dɛn bikɔs una gɛt fet pan Krays Jizɔs. 27 Una ɔl we baptayz insay Krays dɔn wɛr Krays. 28 Ju ɔ Grik nɔ de, slev ɔ pɔsin we fri nɔ de, man ɔ uman nɔ de, bikɔs una ɔl we gɛt wanwɔd wit Krays Jizɔs na wan. 29 Pantap dat, if una na Krays in yon, una na Ebraam in pikin dɛn fɔ tru, ɛn una go gɛt wetin Gɔd bin dɔn prɔmis.