Sɔlɔmɔn in Siŋ
1 Sɔlɔmɔn in siŋ we fayn pas ɔl ɔda siŋ dɛn:*
2 “Lɛ i kis mi, lɛ i kis mi wit in mɔt,
Bikɔs di tin dɛn we yu de du fɔ sho se yu lɛk mi bɛtɛ pas wayn.
3 Di ɔyl dɛn we yu de rɔb gɛt swit smɛl.
Yu nem tan lɛk we dɛn tɔn ɔyl we gɛt swit smɛl.
Na dat mek di yɔŋgal dɛn lɛk yu.
4 Kɛr mi go,* lɛ wi rɔn.
Di kiŋ dɔn kɛr mi go insay in rum dɛn!
Lɛ wi gladi, lɛ wi gladi bikɔs ɔf yu.
Lɛ wi tɔk bɔt di tin dɛn we yu de du fɔ sho se yu lɛk mi,
Yu lɔv bɛtɛ pas wayn.
No wɔnda we mek dɛn* lɛk yu.
5 E di uman dɛn na Jerusɛlɛm, a blak, bɔt a fayn,
A tan lɛk di tɛnt dɛn na Kida,
Ɛn a tan lɛk di klos dɛn we dɛn yuz fɔ mek Sɔlɔmɔn in tɛnt.
6 Una nɔ luk mi bikɔs a blak,
Na di san dɔn mek a blak.
Mi mama in bɔypikin dɛn bin vɛks pan mi;
Dɛn se mek a tek kia ɔf di vayn gadin dɛn,
Bɔt a nɔ tek kia ɔf mi yon vayn gadin.
Wetin mek a fɔ waka midul yu kɔmpin dɛn ship dɛn
Lɛk uman we kɔba in fes wit vel?”*
8 “E uman we fayn pas ɔl di ɔda uman dɛn,
If yu nɔ no, fala di ship dɛn futmak
Ɛn tek kia ɔf yu yɔŋ got dɛn nia di shɛpad dɛn tɛnt dɛn.”
9 “Mi lɔv, yu tan lɛk wan pan di* uman ɔs dɛn pan Fɛro in chariɔt dɛn.
10 Yu jɔ fayn wit di juɛlri dɛn we de de,
Yu nɛk fayn wit bid dɛn.
11 Wi go mek fɔ yu gold juɛlri dɛn
Ɛn dɛkɔret dɛn wit silva.”
12 “We di kiŋ sidɔm na in rawnd tebul,
Mi pafyum de pul fayn sɛnt.
13 Di wan we a lɛk tan lɛk wan bag ma*
We gɛt swit smɛl ɛn we de midul mi bɔbi dɛn ol nɛt.
14 Di wan we a lɛk tan lɛk wan bɔnch lali* to mi
We de gro na di vayn gadin dɛn na Ɛngɛdi.”
15 “Luk! Mi lɔv, yu fayn.
Yu rili fayn. Yu yay dɛn tan lɛk dɔv yay.”
16 “Luk! Di wan we a lɛk, yu fayn ɛn yu de mek a gladi.
Di lif dɛn na wi bed.
17 Di bim* dɛn na wi os na sida tik dɛn,
Wi ruf na junipa tik dɛn.