Sam

28 E Jiova, mi Rɔk, na yu a de kɔntinyu fɔ kɔl;

Nɔ lɔk yu yes pan mi.

If yu kɔntinyu fɔ sɛt mɔt pan mi,

A go tan lɛk di wan dɛn we de go dɔŋ di ol.*

 2 Yɛri di kray we a de kray to yu fɔ ɛp mi

As a de es mi an ɛn fesin di rum we de insay insay na yu oli ples.

 3 Nɔ drɛg mi togɛda wit di wikɛd wan dɛn,

Di wan dɛn we de du wetin bad,

 4 Pe dɛn bak fɔ dɛn we dɛn,

Akɔdin to di bad tin dɛn we dɛn dɔn du.

Pe dɛn bak fɔ di tin dɛn we dɛn dɔn du wit dɛn an,

Akɔdin to wetin dɛn dɔn du.

 5 Dɛn nɔ de pe atɛnshɔn to di tin dɛn we Jiova dɔn du,

Ɔ to di tin dɛn we i de du wit in an.

 6 Lɛ Jiova gɛt di prez,

Bikɔs i dɔn yɛri di beg we a de beg am fɔ ɛp mi.

 7 Na Jiova de gi mi trɛnk, ɛn in na mi shild;

Na in a abop pan.

I dɔn ɛp mi, ɛn a gladi,

So a go yuz mi siŋ fɔ prez am.

 8 Jiova de gi trɛnk to in pipul dɛn;

In na aydin ples, ɛn i de sev di wan we i dɔn anɔynt.